Rohit – Kohli : సిడ్నీలో రో – కో జోడీ సునామీ.. ఏకంగా 7 భారీ రికార్డులను బద్దలు కొట్టిన రోహిత్ – కోహ్లీ

Rohit – Kohli : ఆస్ట్రేలియాతో సిడ్నీలో జరిగిన చివరి వన్డే మ్యాచ్‌లో టీమ్‌ఇండియా 9 వికెట్ల తేడాతో విజయం సాధించడానికి కారణం.. రోహిత్ శర్మ, విరాట్ కోహ్లీల అద్భుతమైన బ్యాటింగ్ ప్రదర్శన. ఈ ఇద్దరు దిగ్గజాలు కలిసి 168 పరుగుల అజేయ భాగస్వామ్యాన్ని నమోదు చేశారు. రోహిత్ 121 పరుగులు, కోహ్లీ 74 పరుగులు చేసి నాటౌట్‌గా నిలిచారు. ఈ భారీ భాగస్వామ్యం భారత జట్టును 69 బంతులు మిగిలి ఉండగానే 237 పరుగుల లక్ష్యాన్ని ఛేదించేలా చేసింది. ఈ క్రమంలో ఈ ఇద్దరు దిగ్గజాలు కలిసి ఏకంగా 7 క్రికెట్ రికార్డులను బద్దలు కొట్టారు, పలువురు దిగ్గజాల కీర్తి ప్రతిష్టలను అధిగమించారు.

భారత క్రికెట్ చరిత్రలో అత్యంత గొప్ప ఓపెనర్లలో ఒకరైన రోహిత్ శర్మ, ఛేజింగ్ మాస్టర్ విరాట్ కోహ్లీ కలిసి సిడ్నీలో ఆస్ట్రేలియాపై రికార్డుల సునామీ సృష్టించారు.

రోహిత్ శర్మ, విరాట్ కోహ్లీ బద్దలు కొట్టిన 7 ముఖ్యమైన రికార్డులు:

1. ఆస్ట్రేలియాపై అత్యధిక వన్డే సెంచరీలు

రోహిత్ శర్మ ఆస్ట్రేలియాపై వన్డేలలో అత్యధిక సెంచరీలు (9) నమోదు చేసిన ఆటగాడిగా సచిన్ టెండూల్కర్ (9) రికార్డును సమం చేశాడు. ఈ జాబితాలో విరాట్ కోహ్లీ 8 సెంచరీల మూడో స్థానంలో ఉన్నాడు.

2. ఓపెనర్‌గా అత్యధిక అంతర్జాతీయ సెంచరీలు

అంతర్జాతీయ క్రికెట్‌లో ఓపెనర్‌గా రోహిత్ శర్మ ఇప్పుడు మొత్తం 45 సెంచరీలు పూర్తి చేశాడు. ఈ విషయంలో అతను సచిన్ టెండూల్కర్ (45) రికార్డును సమం చేశాడు. డేవిడ్ వార్నర్ (49) మాత్రమే వీరిద్దరి కంటే ముందున్నాడు.

3. వన్డేల్లో అత్యధిక 100+ భాగస్వామ్యాలు

విరాట్ కోహ్లీ, రోహిత్ శర్మ జోడీ వన్డే క్రికెట్‌లో ఇప్పటివరకు 19 సార్లు 100 లేదా అంతకంటే ఎక్కువ పరుగుల భాగస్వామ్యాన్ని నెలకొల్పారు. ఈ జాబితాలో వీరిద్దరూ ఇప్పుడు తిలకరత్నే దిల్షాన్-కుమార సంగక్కర (20), సచిన్ టెండూల్కర్-సౌరవ్ గంగూలీ (26) తర్వాత నిలిచారు.

4. ఛేజింగ్‌లో అత్యధిక 50+ స్కోర్లు (వన్డేల్లో)

వన్డే క్రికెట్‌లో లక్ష్యాన్ని ఛేదించే సమయంలో అత్యధికంగా 50 లేదా అంతకంటే ఎక్కువ పరుగులు సాధించిన బ్యాటర్‌గా విరాట్ కోహ్లీ రికార్డు సృష్టించాడు. ఛేజింగ్‌లో కోహ్లీ సాధించిన 70వ 50+ స్కోరు ఇది. గతంలో సచిన్ టెండూల్కర్ 69 సార్లు ఈ ఘనత సాధించాడు.

5. వన్డేల్లో అత్యధిక పరుగులు

ఈ 74 పరుగుల ఇన్నింగ్స్‌తో విరాట్ కోహ్లీ వన్డే క్రికెట్‌లో అత్యధిక పరుగులు సాధించిన బ్యాటర్ల జాబితాలో రెండో స్థానానికి చేరుకున్నాడు. కోహ్లీ కుమార సంగక్కర (14,234) రికార్డును అధిగమించాడు. కోహ్లీ ప్రస్తుత పరుగులు 14,255. సచిన్ టెండూల్కర్ (18,426) మాత్రమే ఇప్పుడు కోహ్లీ కంటే ముందున్నాడు.

6. అంతర్జాతీయ క్రికెట్‌లో 50 సెంచరీలు

టెస్ట్, వన్డే, టీ20 ఫార్మాట్‌లలో కలిపి 50 సెంచరీలు పూర్తి చేసిన మూడవ భారతీయ ఆటగాడిగా రోహిత్ శర్మ నిలిచాడు. రోహిత్ కంటే ముందు సచిన్ టెండూల్కర్ (100 సెంచరీలు), విరాట్ కోహ్లీ (82 సెంచరీలు) మాత్రమే ఈ ఘనత సాధించారు.

7. కలిసి అత్యధిక మ్యాచ్‌లు ఆడిన రికార్డు

అంతర్జాతీయ క్రికెట్‌లో కలిసి అత్యధిక మ్యాచ్‌లు ఆడిన ఆటగాళ్ల జాబితాలో రోహిత్ శర్మ, విరాట్ కోహ్లీ జోడీ రాహుల్ ద్రవిడ్-సచిన్ టెండూల్కర్ రికార్డును సమం చేశారు. విరాట్-రోహిత్ కలిసి ఆడిన 391వ మ్యాచ్ ఇది. సచిన్-ద్రవిడ్ జోడీ కూడా 391 మ్యాచ్‌లు ఆడారు.

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..