Election 2026 Results News

భారతదేశంలో 2026 ఎన్నికల సంగ్రామం ఐదు రాష్ట్రాల అసెంబ్లీ ఎన్నికలతో మొదలవుతుంది. పశ్చిమ బెంగాల్, అస్సాం, తమిళనాడు, కేరళ, పుదుచ్చేరి అసెంబ్లీలకు ఏప్రిల్‌లో ఎన్నికలు జరిగాయి. ఈ ఐదు రాష్ట్రాల అసెంబ్లీ ఎన్నికల ఫలితాలు మే 4న వెలువడనున్నాయి.
పశ్చిమ బెంగాల్‌లో 294 అసెంబ్లీ స్థానాలకు రెండు దశల్లో ఎన్నికలు జరిగాయి. ఏప్రిల్ 23, 29 తేదీలలో పోలింగ్ జరిగింది. 2011 నుండి ఈ రాష్ట్రంలో తృణమూల్ కాంగ్రెస్ (TMC) అధికారంలో కొనసాగుతోంది. మమతా బెనర్జీ ముఖ్యమంత్రిగా పనిచేస్తున్నారు. 2021 ఎన్నికలు బెంగాల్ రాజకీయాల్లో ఒక కీలక మార్పును సూచించాయి. కాంగ్రెస్, వామపక్ష పార్టీలు బలహీనపడగా.. బీజేపీ క్రమంగా బలపడుతోంది. ఈ ఎన్నికల్లో అధికార టీఎంసీని మట్టికరిపించి అక్కడ అధికారాన్ని చేజిక్కించుకోవాలని బీజేపీ ఉవ్విళ్లూరుతోంది.
పశ్చిమ బెంగాల్‌కు పొరుగు రాష్ట్రమైన అస్సాం అసెంబ్లీకి కూడా ఎన్నికలు జరిగాయి. ఏప్రిల్ 9న ఒకే దశలో పోలింగ్ జరిగింది. ఈ రాష్ట్రంలో కాంగ్రెస్, భారతీయ జనతా పార్టీ(బీజేపీ)ల మధ్య ప్రధాన పోటీ నెలకొని ఉంది.
అలాగే దక్షిణ రాష్ట్రాలైన తమిళనాడు, కేరళ, అలాగే కేంద్రపాలిత ప్రాంతమైన పుదుచ్చేరిలో కూడా ఏప్రిల్‌లో పోలింగ్ జరిగింది. అస్సాం, కేరళ, పుదుచ్చేరిలలో ఏప్రిల్ 9న పోలింగ్ జరిగింది. తమిళనాడులో ఏప్రిల్ 23న పోలింగ్ జరిగింది. పశ్చిమ బెంగాల్ మినహా, మిగిలిన అన్ని రాష్ట్రాల్లో ఒకే దశలో పోలింగ్ జరిగింది.
పశ్చిమ బెంగాల్‌లో 294 అసెంబ్లీ సీట్లు, అస్సాంలో 126 సీట్లు, తమిళనాడులో 234 సీట్లు, కేరళలో 140 సీట్లు, పుదుచ్చేరిలో 30 సీట్లు ఉన్నాయి.