టెస్టుల్లో పక్కన పెట్టారని, టీ20ల్లో రెచ్చిపోయాడు.. కట్‌చేస్తే.. 18 బంతుల్లో సెలెక్టర్లకు ఇచ్చిపడేసిన బ్యాడ్ లక్కోడు

Sarfaraz Khan: భారత టెస్ట్ జట్టులో చోటు దక్కించుకోలేక నిరాశలో ఉన్న ముంబై స్టార్ బ్యాటర్ సర్ఫరాజ్ ఖాన్, తన బ్యాట్‌తో సెలెక్టర్లకు గట్టి సమాధానం చెప్పాడు. డిసెంబర్ 16న జరగనున్న ఐపీఎల్ 2026 వేలానికి కేవలం రెండు రోజుల ముందు, సయ్యద్ ముస్తాక్ అలీ ట్రోఫీ (SMAT)లో అతను ఆడిన ఒక ఇన్నింగ్స్ ఇప్పుడు క్రికెట్ వర్గాల్లో హాట్ టాపిక్‌గా మారింది.

18 బంతుల్లోనే అర్ధ శతకం (SMAT 2025)..

హర్యానాతో జరిగిన మ్యాచ్‌లో సర్ఫరాజ్ ఖాన్ ఆకాశమే హద్దుగా చెలరేగాడు. ముంబై జట్టు 235 పరుగుల భారీ లక్ష్యాన్ని ఛేదిస్తున్న క్రమంలో, క్రీజులోకి వచ్చిన సర్ఫరాజ్ బౌలర్లపై విరుచుకుపడ్డాడు. కేవలం 18 బంతుల్లోనే తన హాఫ్ సెంచరీ (50 పరుగులు) పూర్తి చేసుకున్నాడు. కేవలం 25 బంతుల్లో 64 పరుగులు (9 ఫోర్లు, 3 సిక్సర్లు) చేసి ఔటయ్యాడు. ఏకంగా 256.00 స్ట్రైక్ రేట్‌తో బ్యాటింగ్ చేయడం విశేషం.

టెస్టుల్లో నిరాశ.. ఐపీఎల్‌పై ఆశ..

దేశవాళీ క్రికెట్‌లో (రంజీ ట్రోఫీ) పరుగుల వరద పారించినా, సర్ఫరాజ్ ఖాన్‌ను ఇటీవల టెస్ట్ సిరీస్‌ల కోసం సెలెక్టర్లు పక్కనబెట్టారు. ఆ కసినంతా అతను ఈ టీ20 టోర్నీలో చూపిస్తున్నాడు. ఇదే టోర్నీలో అంతకుముందు అస్సాంపై 47 బంతుల్లోనే సెంచరీ (100) కూడా బాదాడు. ఇప్పుడు వేలానికి సరిగ్గా ముందు ఇలాంటి విధ్వంసకర ఇన్నింగ్స్ ఆడటంతో, ఫ్రాంచైజీల దృష్టిని ఆకర్షించాడు.

ఐపీఎల్ 2026 వేలంలో రచ్చ ఖాయమా?

సర్ఫరాజ్ ఖాన్ బేస్ ప్రైస్ రూ. 75 లక్షలుగా ఉంది. గతంలో ఐపీఎల్‌లో అంతగా రాణించలేకపోయిన సర్ఫరాజ్, ఈసారి తన కొత్త అవతారంతో ఫ్రాంచైజీలను మెప్పించాడు. ముఖ్యంగా మిడిల్ ఆర్డర్‌లో స్పిన్నర్లను సమర్థవంతంగా ఎదుర్కోగల ఆటగాడి కోసం చూస్తున్న జట్లు (CSK, DC, KKR) అతని కోసం పోటీ పడే అవకాశం ఉంది.

కాగా, ఈ మ్యాచ్‌లో సర్ఫరాజ్ ఖాన్ మెరుపులతో పాటు, యశస్వి జైస్వాల్ (101 పరుగులు) సెంచరీతో రాణించడంతో ముంబై జట్టు 235 పరుగుల భారీ లక్ష్యాన్ని విజయవంతంగా ఛేదించింది.

“నన్ను టెస్టులకు ఎంపిక చేయకపోతేనేం, టీ20ల్లో నా సత్తా ఏంటో చూపిస్తా” అని సర్ఫరాజ్ ఈ ఇన్నింగ్స్ ద్వారా చెప్పకనే చెప్పాడు. మరి రేపు జరగబోయే వేలంలో అతనికి ఎంత ధర పలుకుతుందో వేచి చూడాలి!