రష్మిక మందన్నా

రష్మిక మందన్నా.. కన్నడ నాట పుట్టినా నేషనల్ క్రష్ గా దేశవ్యాప్తంగా గుర్తింపు తెచ్చుకున్న ప్రముఖ నటి. 2016లో కిరిక్ పార్టి అనే కన్నడ సినిమాతో ఇండస్ట్రీలోకి అడుగుపెట్టిందీ అందాల తార. ఛలో సినిమాతో తెలుగు ప్రేక్షకుల అభిమానాన్ని చూరగొంది. మొదటి సినిమాలోనే తన క్యూట్ క్యూట్ ఎక్స్‌ప్రెషన్స్ తో కుర్రకారు హృదయాలను గెల్చుకుంది. ఆతర్వాత గీత గవిందం, సరిలేరు నీకెవ్వరు, భీష్మ వంటి సినిమాలతో టాలీవుడ్ టాప్ హీరోయిన్ గా ఎదిగింది. ఇక పుష్ప సినిమాతో పాన్ ఇండియా హీరోయిన్ గా మారిపోయింది రష్మిక. ఇందులో తను పోషించిన శ్రీవల్లి పాత్రతో ఒక్కసారిగా దేశవ్యాప్తంగా గుర్తింపు తెచ్చుకుంది రష్మిక. ఇక వారిసు (తెలుగులో వారసుడు), సుల్తాన్ సినిమాలతో కోలీవుడ్ ఆడియెన్స్‌ను సైతం మెప్పించిందీ ముద్దుగుమ్మ.

పుష్ప సినిమాతో బాలీవుడ్ లో పాగా వేసిన రష్మికకు యానిమల్ రూపంలో మరొక సాలిడ్ హిట్ దొరికింది. ఇందులో ఆమె అభినయం విమర్శకుల ప్రశంసలు పొందింది. సినిమాల సంగతి పక్కన పెడితే రిలేషన్ షిప్ విషయంలోనూ తరచూ వార్తల్లో నిలుస్తోంది రష్మిక. విజయ్ దేవరకొండతో ఆమె ప్రేమలో ఉన్నట్లు రూమర్స్ వస్తుంటాయి. ఇక తన ఫస్ట్ సినిమా కిరిక్ పార్టి చిత్రీకరణ సమయంలో నటుడు రక్షిత్ శెట్టితో ప్రేమలో పడింది రష్మిక. ఇద్దరి అభిరుచులు కలవడంతో నిశ్చితార్థం కూడా చేసుకున్నారు. అయితే కొన్ని కారణాలతో పెళ్లిపీటలెక్కకుండానే ఇద్దరూ విడిపోయారు.