IPL 2025: ప్లేటు మార్చిన ఈడెన్ గార్డెన్స్ పిచ్ క్యూరేటర్.. మాములు యూ-టర్న్ కాదు కదా!

IPL 2025 ప్రారంభం కాగానే పిచ్ వివాదం చర్చనీయాంశంగా మారింది. కోల్‌కతా నైట్ రైడర్స్ (KKR) తమ హోమ్ గ్రౌండ్ అయిన ఈడెన్ గార్డెన్స్‌లో RCB తో జరిగిన మ్యాచ్ తర్వాత పిచ్ పై పెద్ద వివాదమే నెలకొంది. ఈడెన్ గార్డెన్స్ క్యూరేటర్ సుజన్ ముఖర్జీ మొదట ఫ్రాంచైజీలకు పిచ్ తయారీలో ఎటువంటి పాత్ర ఉండదని చెప్పినా, తర్వాత అతను తన మాటలను వెనక్కి తీసుకున్నాడు. ముఖర్జీ తన మొదటి వ్యాఖ్యలను మార్చుకుని KKR ప్రత్యేకమైన పిచ్ షరతులను కోరలేదని, తమ తటస్థ వైఖరిని కాపాడారని చెప్పారు. అయితే, KKR కెప్టెన్ అజింక్య రహానే స్పిన్-స్నేహపూర్వక పిచ్ కోరుకున్నాడనే వార్తలు రావడంతో ఈ వివాదం మరింత ముదిరింది.

KKR హోమ్ గ్రౌండ్ అయిన ఈడెన్ గార్డెన్స్ స్టేడియం స్పిన్నర్-ఫ్రెండ్లీ పిచ్‌గా ఉండాలని కోరుకున్నారనే వాదనల మధ్య క్యూరేటర్ సుజన్ ముఖర్జీ ముందుగా ఫ్రాంచైజీలకు పిచ్ తయారీలో ఎటువంటి హక్కులు లేవని స్పష్టం చేశాడు.

“ఫ్రాంచైజీలకు పిచ్‌లపై ఎటువంటి నియంత్రణ లేదు. నేను బాధ్యతలు చేపట్టినప్పటి నుండి, ఇక్కడి పిచ్‌లు ఇలాగే ఉన్నాయి,” అని రెవ్‌స్పోర్ట్జ్ ఇంటర్వ్యూలో చెప్పాడు.

అయితే, KKR కెప్టెన్ అజింక్య రహానే స్పిన్ అనుకూలమైన పిచ్ కోరుకున్నాడనే విషయం బయటకు రావడంతో, దీనిపై అభిప్రాయాలు మారాయి. ముఖర్జీ KKR డిమాండ్లను విస్మరించారనే ఆరోపణలు వచ్చాయి, కానీ ఆయన మాత్రం అటువంటి ఘటన జరగలేదని చెబుతూ తన వైఖరిని మార్చుకున్నారు.

స్పోర్ట్స్ టాక్‌కు ఇచ్చిన ఇంటర్వ్యూలో ముఖర్జీ KKR ను ఎప్పుడూ నిరాకరించలేదని, వారి ఫ్రాంచైజీతో మంచి సంబంధాలున్నాయని స్పష్టం చేశాడు.

“మొదటి మ్యాచ్ కోసం పిచ్ గురించి ఎవరూ నన్ను ఎటువంటి మార్పులు చేయమని అడగలేదు. ప్రాక్టీస్ సమయంలో కేవలం ఒక కోచ్ నన్ను పిచ్ ప్రవర్తన గురించి అడిగాడు. నేను ‘పిచ్ తిరుగుతుంది, కానీ బ్యాటింగ్‌కు అనుకూలంగా ఉంటుంది’ అని చెప్పాను.” ఇది స్పష్టం చేసిన తర్వాత కూడా, పిచ్ వివాదం తగ్గలేదు. పిచ్‌ను ఫ్రాంచైజీల కోసం ప్రత్యేకంగా తయారుచేయడం సరికాదని పలువురు మాజీ ఆటగాళ్లు, విశ్లేషకులు అభిప్రాయపడ్డారు.

న్యూజిలాండ్ మాజీ బౌలర్ సైమన్ డౌల్ కూడా ఈ అంశంపై తీవ్రంగా స్పందించాడు.”క్యూరేటర్ పని మ్యాచ్‌లపై అభిప్రాయాలు ఇవ్వడం కాదు, బదులుగా స్థానిక జట్టు అవసరాలకు అనుగుణంగా పిచ్‌ను సిద్ధం చేయడం” అని అన్నారు. అంటే, ఒక మ్యాచ్‌లో హోమ్ టీమ్‌కు ప్రయోజనం కలిగేలా పిచ్‌ను రూపొందించడం పరిపాటి అనే వాదన డౌల్ చేసారు.

మరిన్ని క్రీడా వార్తల కోసం ఇక్కడ క్లిక్ చేయండి..