నా భార్య వంట చేయడం లేదు.. విడాకులు ఇవ్వండి.. భర్తకు దిమ్మతిరిగే షాకిచ్చిన ధర్మాసనం..

ప్రస్తుత కాలంలో బంధాలు మరింత బలహీనంగా మారుతున్నాయి.. చిన్నచిన్న విబేధాలు, మనస్పర్థలతో.. భార్య లేదా భర్తలు వైవాహిక బంధాన్ని తెంచుకునే వరకు వెళ్తున్నారు.. ఇలాంటి ఎన్నో ఘటనలు రోజూ కనిపిస్తూనే ఉన్నాయి.. తన భార్య వంట చేయడం లేదని.. తన అమ్మతో ఇంటి పనులను పంచుకోవడం లేదంటూ ఓ భర్త దాఖలు చేసిన పిటీషన్ ను తెలంగాణ హైకోర్టు కొట్టివేసింది. విడాకులు కోరుతూ భర్త దాఖలు చేసిన అప్పీల్‌పై విచారణ అనంతరం తెలంగాణ హైకోర్టు కొట్టివేసింది. భార్య తన భర్తకు వంట చేయలేకపోవడం లేదా తన అత్తగారితో ఇంటి పనులను సమన్వయం చేసుకోలేకపోవడం మానసిక క్రూరత్వం కాదని ఆగ్రహం వ్యక్తంచేసింది. జస్టిస్ మౌషుమి భట్టాచార్య, జస్టిస్ నగేష్ భీమపాకలతో కూడిన ధర్మాసనం ఇచ్చిన తీర్పు.. వివాహాన్ని రద్దు చేయడానికి నిరాకరించిన కుటుంబ కోర్టు ఆదేశాలను సమర్థించింది.

మే 2015లో వివాహం చేసుకున్న ఈ జంట, గృహ విభేదాలు, 2017లో గర్భస్రావం వంటి వైద్యపరమైన సమస్య కారణంగా అక్టోబర్ 2018 నుండి విడివిడిగా నివసిస్తున్నారు. అప్పీలును విచారిస్తూ, వైవాహిక జీవితంలోని ‘చిన్న చిన్న చికాకులు’ ‘సాధారణ ఒడిదుడుకులు’ విడాకులకు ఆధారం కాదని హైకోర్టు పునరుద్ఘాటించింది.

గృహ కలహాలు

బెంచ్ కోసం ఆర్డర్ రాస్తూ, జస్టిస్ భీమపాక భర్త ప్రాథమిక ఫిర్యాదును పరిశీలించారు. అతని భార్య ఇంటి బాధ్యతలను నిర్వర్తించడంలో విఫలమైందనేది ఆ వాదన.. సికింద్రాబాద్‌కు చెందిన న్యాయ పట్టభద్రుడైన భర్త, ఎల్‌బి నగర్‌కు చెందిన టెక్నాలజీ ప్రొఫెషనల్ అయిన తన భార్య తనకు వంట చేయడం లేదని లేదా రోజువారీ పనులలో తన తల్లికి సహకరించడం లేదని ఆరోపించారు. అయితే, ఆ జంట పరిస్థితులు, చేస్తున్న ఉద్యోగాలను కోర్టు గమనించింది.

భర్త మధ్యాహ్నం 1 గంట నుండి రాత్రి 10 గంటల వరకు పనిచేసి, రాత్రి 11 గంటల ప్రాంతంలో ఇంటికి తిరిగి వస్తాడు. భార్య ఉదయం 9 గంటల నుండి సాయంత్రం 6 గంటల వరకు పనిచేసి, ఉదయం 6 గంటలకు నిద్రలేచి 9 గంటలకే ఇంటి నుండి బయలుదేరుతుంది. ఈ పరిస్థితులలో, ఆమె తన భర్తకు ఆహారం సిద్ధం చేయలేకపోవడాన్ని, అత్తకు సహకరించకపోవడాన్ని తీవ్రంగా పరిగణించలేమని లేదా క్రూరత్వంగా భావించలేమని న్యాయమూర్తి అభిప్రాయపడ్డారు.

భర్త విచారణ సమయంలో, తన భార్య గతంలో తన తల్లికి వంటగదిలో సహాయం చేసిందని, వారు కలిసి నివసించిన కాలంలో కుటుంబంతో స్నేహపూర్వకంగా సంభాషించిందని అంగీకరించాడని కూడా బెంచ్ నమోదు చేసింది.

మానసిక క్రూరత్వం కాదు..

కోడలు ఇంటి పనులకు సహాయం చేయడం లేదని అత్తగారు చేసే ఫిర్యాదు మానసిక క్రూరత్వం పరిమితిని అందుకోదని చట్టపరమైన స్థానాన్ని స్పష్టం చేస్తూ కోర్టు పేర్కొంది. ఐపీసీ సెక్షన్ 498-ఎ కింద భర్త అరెస్టుపై న్యాయమూర్తి మాట్లాడుతూ, భార్య ఫిర్యాదు చేయలేదు, భార్య తండ్రి ఫిర్యాదు చేశారని, అందువల్ల ఆమెను వేధించినట్లు ఆపాదించలేమని అన్నారు. గర్భస్రావం తర్వాత వైద్యపరంగా కోలుకున్నందున భార్య తన తల్లిదండ్రుల ఇంట్లో ఉండటం సమర్థనీయమేనని కోర్టు పేర్కొంది.

మానసిక క్రూరత్వాన్ని చాలా కాలం పాటు నిరంతరంగా కొనసాగించలేమని, వైవాహిక జీవితంలో అభిప్రాయబేధాలు, చిన్నపాటి గొడవలు వస్తుంటాయని దానికే విడిపోవాలనుకోవడం సమంజసం కాదని.. ధర్మాసనం అభిప్రాయపడింది. కుటుంబ కోర్టు నిర్ణయంలో ఎటువంటి చట్టవిరుద్ధత లేదని తేల్చి, న్యాయమూర్తులు అప్పీల్‌ను తోసిపుచ్చారు.

మరిన్ని తెలంగాణ వార్తల కోసం ఇక్కడ క్లిక్ చేయండి..