ఈ శతాబ్దపు మూడవ అతి ప్రమాదకర జూనోటిక్‌ వైరస్‌ కరోనావైరస్‌
సాధారణ జలుబుతో మొదలుపెట్టి ప్రాణాంతక శ్వాసకోశవ్యాధికి కారణమవుతోన్న కరోనా వైరస్‌ ఈ శతాబ్దపు మూడవ అతి ప్రమాదకర జూనోటిక్‌ వైరస్‌ అట. డిసెంబర్‌ 31 నాటికే ప్రపంచ ఆరోగ్య సంస్థ అంతుపట్టని ఓ వైరస్‌ చైనాలో కొంప ముంచుతోందని హెచ్చరిక జారీ చేసింది. చైనాలో న్యుమోనియా కేసులు ఇబ్బడిముబ్బడిగా పెరగటానికి కారణమైన వైరస్‌ వైద్య ప్రపంచానికి సవాల్‌ విసిరింది. అప్పట్లో టెంపరరీగా నావల్‌ కరోనావైరస్‌ అని నామకరణం చేసారు.
పునుగు పిల్లుల నుంచి సార్స్‌, ఒంటెల నుంచి మెర్స్‌ (మిడిల్‌ ఈస్ట్‌ శ్వాసకోశవ్యాధి) ఉద్భవించడం చూసాం. కానీ కరోనావైరస్‌కి క్యారియర్‌ ఏ జంతువనే విషయం ఇప్పటికీ అంతుబట్టని మిస్టరీగా మిగిలిపోయింది.
సార్స్‌, మెర్స్‌ లాగానే కరోనా వైరస్‌ ఒక వ్యక్తి నుంచి మరో వ్యక్తికి లాలాజలం డ్రాప్‌లెట్స్‌ ద్వారా వ్యాప్తి చెందుతుంది. ఈ వైరస్‌ శరీరంలో పెరగటానికి అంటే ఇన్‌క్యుబేషన్‌ పీరియడ్‌కి 2 నుండి 10 రోజుల సమయం పడుతుంది. ఇతర దేశాలలో బయటపడిన 37 కేసుల్లో మూడు కేసుల్ని కేవలం లక్షణాల ద్వారా నిర్థారించారు.
ఇక లక్షణాల విషయానికొస్తే శ్వాసకోశ నాళం పై భాగాన్ని ఇన్‌ఫెక్షన్‌ తీవ్రంగా బాధిస్తుంది. జ్వరం, దగ్గు, గొంతునొప్పి, ముక్కు దిబ్బడ, తలనొప్పి, కండరాల నొప్పి ఉంటాయి. వృద్దులలో తీవ్రత పాళ్ళు ఎక్కువే. నిమోనియా, శ్వాసతీసుకోవడంలో ఇబ్బంది లేదా వేగం పెరగడం, నీళ్ళు గొంతులోకి దిగకపోవడం, విపరీతమైన ఛాతీ నొప్పి. మూత్రం పరిణామం తగ్గి అవయవాల పనితీరు దెబ్బతినడం, తెల్లరక్తకణాల సంఖ్య తగ్గడం జరుగుతుంది.
సార్స్‌, మెర్స్‌ లాగానే కరోనాకు చికిత్స కనిపెట్టలేదు. వ్యాక్సిన్‌ కోసం పరిశోధన ఇంకా కొనసాగుతోంది. ఇక డాక్టర్లు ఆక్సిజన్‌ థెరపీతో పాటు యాంటీబయాటిక్‌లను సపోర్ట్‌ థెరపీగా అందిస్తున్నారు. పేషంట్లు మాస్క్ ముసుగు తొలగించకూడదు. క్వారంటైన్‌ వీలు కాని వారు మరొక వ్యక్తకి కనీసం ఒక మీటర్‌ దూరం పాటించాలి. ఇక మెడికల్‌ స్టాఫ్‌ ప్రత్యేక రక్షణ మాస్క్‌లు ధరించడం తప్పనిసరి. డిస్పోజెబుల్‌ వైద్య సామగ్రినే ఉపయోగించాలి. ముఖాన్ని చేతులతో అస్సలు అంటకుండా జాగ్రత్త పడుతున్నారు.
