Hyderabad: హైదరాబాద్ వాసులకు బిగ్ అలర్ట్.. 37శాతం డేంజర్ జోన్లోనే.. ఆధ్యయనంలో షాకింగ్ నిజాలు..
వేగంగా విస్తరిస్తున్న హైదరాబాద్ను వరద ముప్పు వెంటాడుతోంది. TISS అధ్యయనం ప్రకారం.. మూడింట ఒక వంతు గ్రేటర్ హైదరాబాద్ ప్రాంతం అధిక వరద ప్రమాదంలో ఉంది. విచ్చలవిడి పట్టణీకరణ, పూడిక పేరుకుపోయిన నాలాలు, చెరువుల ఆక్రమణలు ప్రధాన కారణాలు. వ్యవస్థాగత లోపాలు నగరంలో వరద తీవ్రతను పెంచుతున్నాయి.
Updated on: Jan 05, 2026 | 6:46 PM
భాగ్యనగరం వేగంగా విస్తరిస్తోంది.. కానీ అదే వేగంతో వరద ముప్పు కూడా పొంచి ఉంది. గత రెండు దశాబ్దాలుగా జరిగిన విచ్చలవిడి పట్టణీకరణ వల్ల గ్రేటర్ హైదరాబాద్లోని దాదాపు మూడింట ఒక వంతు ప్రాంతం అధిక వరద ముప్పు ఎదుర్కొంటోందని టాటా ఇన్స్టిట్యూట్ ఆఫ్ సోషల్ సైన్సెస్ తాజా అధ్యయనంలో తేలింది. 2000 సంవత్సరం నుండి గ్రేటర్ హైదరాబాద్ పరిధి 45శాతం మేర పెరిగింది. ఈ క్రమంలో నగర విస్తీర్ణం 293 చ.కి.మీ నుండి 425 చ.కి.మీలకు పెరిగింది. నగర భూభాగంలో 11శాతం ప్రాంతం అత్యధిక ముప్పు కింద ఉండగా, మరో 26శాతం ప్రాంతం అత్యంత దుర్బలమైనదిగా గుర్తించారు. నేలంతా కాంక్రీట్ మయం కావడంతో వర్షపు నీరు భూమిలోకి వెళ్లే దారి లేక, రోడ్లపైనే ప్రవాహాలుగా మారుతోంది.
హైదరాబాద్లో వరదలకు కేవలం వర్షం మాత్రమే కారణం కాదు.. వ్యవస్థాగత లోపాలు కూడా ప్రధాన కారణమని పరిశోధకులు తేల్చారు. నాలాల్లో పూడిక పేరుకుపోవడం వల్ల నీరు ప్రవహించే సామర్థ్యం తగ్గింది. ప్లాస్టిక్, ఘన వ్యర్థాలను కాలువల్లో వేయడం వల్ల తుఫాను నీటి నెట్వర్క్ దాదాపుగా స్తంభించిపోయింది. చెరువులు కుంచించుకుపోవడం, కాలువల అనుసంధానం లేకపోవడం పరిస్థితిని మరింత దిగజార్చింది.
హైదరాబాద్ నగరానికి తలమానికమైన మూసీ నది ఉప్పొంగడం వల్ల 1908లో భారీ వరదలు సంభవించాయి. ఆ తర్వాత ఇటీవలే 2025లో మూసీ నది ఉధృతంగా ప్రవహించి ఎన్నో ప్రాంతాలను నీట ముంచింది. ఆ సమయంలో తెలుగు రాష్ట్రాల్లోని ఎన్నో ప్రాంతాలకు ప్రయాణ వారధిగా ఉన్న ఎంజీబీఎస్ కూడా భారీ వరదతో నీట మునగడం మనకు తెలిసిందే. తద్వారా అల్లకల్లోల పరిస్థితులు ఏర్పడి ఆర్టీసీ బస్సులను సైతం దారి మళ్లించారు. ఇదిలా ఉండగా 2020 అక్టోబర్లో భారీ వర్షాలకు ఘట్కేసర్ వంటి ప్రాంతాల్లో రికార్డు స్థాయిలో వర్షం కురిసి నగరాన్ని వరదలు ముంచెత్తాయి.
పరిష్కారాలు..
తుఫాను నీటి వ్యవస్థలను పునరుద్ధరించకపోతే భవిష్యత్తులో అస్థిర వర్షపాతం వల్ల నగరం అతలాకుతలం అవుతుందని పట్టణ ప్రణాళికదారులు హెచ్చరిస్తున్నారు.
సి-ఛానల్ డ్రెయిన్లు: అదనపు నీటిని మళ్లించడానికి రివర్స్ డ్రైనేజీ వ్యవస్థలను ఏర్పాటు చేయాలి.
హైడ్రాలిక్ యంత్రాలు: లోతట్టు ప్రాంతాల్లో భారీ పంపులను వ్యూహాత్మకంగా అందుబాటులో ఉంచాలి.
సహజ పారుదల: నీటి ప్రవాహానికి ఆటంకం లేకుండా సరైన వాలు ఉండేలా రోడ్ల నిర్మాణం జరగాలని నిపుణులు సూచిస్తున్నారు.
మరిన్ని తెలంగాణ వార్తల కోసం ఇక్కడ క్లిక్ చేయండి..
