Used mobiles: ఇవి చూసుకోకుండా సెకండ్స్‌లో ఫోన్ కొంటే నష్టపోతారు!

ఇలాంటివి కొనేముందు కొన్ని జాగ్రత్తలు తీసుకోవాలి. అది ఓరిజినలా? కాదా ? లేదా ఎవరైనా దొంగిలించి అమ్ముతున్నారా? అన్న విషయాన్ని నిర్ధారించుకోవాలి. ముఖ్యంగా ఈ ఫెస్టివల్ సేల్స్‌లో రిఫర్బిష్డ్ మొబైల్స్ కూడా డిస్కౌంట్‌లో లభిస్తాయి. కాబట్టి వీటిని తీసుకునేముందు ఇవి తెలుసుకోండి.

పోర్టల్‌లో చెక్ చేసి..

సెకండ్ హ్యాండ్ మొబైల్ కొనేముందు అది చోరీకి గురైన మొబైల్ అవునా? కాదా? అన్నది తెలుసుకునేందుకు ‘సెంట్రల్‌ ఎక్విప్‌మెంట్‌ ఐడెంటిటీ రిజిస్టర్‌’ పోర్టల్‌ను సంప్రదించాలి. సీఈఐఆర్ వెబ్‌సైట్ (ceir.gov.in) లోకి వెళ్లి  అక్కడ అప్లికేషన్‌ మెనూలో ‘IMEI Verification’ అనే ఆప్షన్‌పై క్లిక్ చేయాలి. తర్వాత మీ మొబైల్‌ నెంబర్‌ ఎంటర్ చేస్తే  ఓటీపీ వస్తుంది. అది ఎంటర్ చేశాక ఐఎంఈఐ నెంబర్ టైప్ చేయాలి. ఐఎంఈఐ నెంబర్‌ కోసం మొబైల్ లో ‘*#06#’ డయల్ చేయాల్సి ఉంటుంది. ఆ తర్వాత ‘సబ్మిట్‌’ నొక్కితే మొబైల్ వివరాలు వస్తాయి. అలా ఆ ఫోన్‌ ఒరిజినలా? కాదా? అన్నది తెలుసుకోవచ్చు. ఒకవేళ అది దొంగిలించిన ఫోన్ అయితే ఆ నెంబర్‌‌పై కంప్లెయింట్ రిజిస్టర్ అయ్యి ఉంటుంది. ఆ వివరాలు పోర్టల్‌లో కనిపిస్తాయి.

రిఫర్బిష్డ్ మొబైల్స్ కొనేముందు..

ఇక రిఫర్బిష్డ్ మొబైల్స్ విషయానికొస్తే.. ఇవి పాక్షికంగా వాడిన మొబైళ్లు. అంటే ఆన్‌లైన్‌లో ఆర్డర్ చేసి.. ఫోన్‌లో ఏదైనా సమస్య ఉంటే మళ్లీ రిటర్న్ చేసిన ఫోన్లు. ఇలాంటి మొబైల్స్‌ను రిపేర్ చేసి రిఫర్బిష్డ్ మొబైల్స్ పేరుతో అమ్మకానికి పెడుతుంటారు. ఇలాంటి మొబైల్స్ కొనేముందు సెల్లర్‌‌ను ముందుగా సంప్రదించి సమస్య ఏంటి అన్నది తెలుసుకుంటే మంచిది. అమెజాన్‌లో సెల్లర్‌‌తో ఛాట్ చేసే ఆప్షన్ ఉంటుంది. మొబైల్‌లో చిన్నచిన్న స్క్రాచ్‌లు ఉన్నకారణంగా రిటర్న్ చేసిన ఫోన్లు అయితే ఇబ్బంది ఉండదు. ఒకవేళ సాఫ్ట్‌వేర్ సమస్యలుంటే అది తర్వాత సమస్యగా మారొచ్చు.

వారెంటీ ఉంటేనే..

రిఫర్బిష్డ్ మొబైల్స్ కొనేముందు వారెంటీ ఉన్న వాటిని ఎంచుకోవాలి. మొబైల్ కండిషన్ ఎలా ఉందో సెల్లర్ ద్వారా ముందే చెక్ చేసుకోవాలి. మొబైల్‌లో ఏవైనా పార్ట్‌లు రీప్లేస్ చేశారేమో అడిగి తెలుసుకోవాలి. అలాగే ధర విషయంలో ఆచితూచి వ్యవహరించాలి. ఒకసారి బాక్స్ ఓపెన్ చేసిన తర్వాత అది సెకండ్ హ్యాండ్ కిందకు వస్తుంది కాబట్టి అసలు ధరలో కనీసం 40 శాతం తగ్గింపు ఉంటే అలాంటి మొబైల్స్ తీసుకోవచ్చు. రిఫర్బిష్డ్ మొబైల్స్ ఈఎంఈఐ నెంబర్‌‌ను కూడా ఒకసారి సీఈఐఆర్ పోర్టల్‌లో చెక్ చేయడం మంచిది.

మరిన్ని సైన్ అండ్ టెక్నాలజీ వార్తల కోసం ఇక్కడ క్లిక్ చేయండి..