ODI Records: వన్డేల్లో అత్యధిక మెయిడెన్ ఓవర్లు వేసిన బౌలర్.. లిస్టులో భారత్ ప్లేయర్.. ఎవరంటే?

వన్డే క్రికెట్‌లో మెయిడెన్ ఓవర్ వేయడం ఏ బౌలర్‌కైనా చాలా కష్టం. ఎందుకంటే పరిమిత ఓవర్ల క్రికెట్‌లో, బ్యాట్స్‌మెన్ నిరంతరం పరుగులు సాధించడానికి ప్రయత్నిస్తారు. ఆధునిక క్రికెట్‌లో, వన్డే మ్యాచ్‌లో 3 లేదా 4 మెయిడెన్ ఓవర్లు వేయడం కూడా పెద్ద విషయమే. కానీ వన్డే క్రికెట్ చరిత్రలో ఒక బౌలర్ 8 మెయిడెన్ ఓవర్లు బౌలింగ్ చేశాడని మీకు తెలుసా..? అవును. ఒకే వన్డే మ్యాచ్‌లో 8 మెయిడెన్ ఓవర్లు. అలాగే, వన్డే మ్యాచ్‌లో అత్యధిక మెయిడెన్ ఓవర్లు బౌలింగ్ చేసిన నలుగురు బౌలర్ల గురించి తెలుసుకుందాం.

బిషన్ సింగ్ బేడీ (భారత్) – 8 మెయిడెన్లు

వన్డే క్రికెట్‌లో అత్యధిక మెయిడెన్ ఓవర్లు వేసిన బౌలర్ల జాబితాలో భారత దిగ్గజ స్పిన్నర్ బిషన్ సింగ్ బేడి అగ్రస్థానంలో ఉన్నాడు. వన్డే మ్యాచ్‌లో ఎనిమిది మెయిడెన్ ఓవర్లు వేసిన రికార్డు ఆయన సొంతం. అయితే, ఇది 60 ఓవర్ల ఫార్మాట్‌లో జరిగింది. ఆ సందర్భంలో, బేడి తన 12 ఓవర్లలో ఎనిమిది మెయిడెన్ ఓవర్లు బౌలింగ్ చేశాడు.

ఫిల్ సిమ్మన్స్ (వెస్టిండీస్) – 8 మెయిడెన్స్

వన్డే క్రికెట్‌లో అత్యధిక మెయిడెన్ ఓవర్లు వేసిన బౌలర్ల జాబితాలో వెస్టిండీస్ ఫాస్ట్ బౌలర్ ఫిల్ సిమ్మన్స్ రెండవ స్థానంలో ఉన్నాడు. బిషన్ సింగ్ బేడీ వేసినన్ని మెయిడెన్ ఓవర్లు సిమ్మన్స్ బౌలింగ్ చేశాడు. వన్డే మ్యాచ్‌లో అతను ఎనిమిది మెయిడెన్ ఓవర్లు వేశాడు. అయితే, ఈ మ్యాచ్‌లో సిమ్మన్స్ కేవలం 10 ఓవర్లు మాత్రమే బౌలింగ్ చేశాడు.

రిచర్డ్ హాడ్లీ (న్యూజిలాండ్) – 6 మెయిడెన్స్

ఒకే వన్డే మ్యాచ్‌లో అత్యధిక మెయిడిన్ ఓవర్లు వేసిన బౌలర్ల జాబితాలో న్యూజిలాండ్ లెజెండరీ ఫాస్ట్ బౌలర్ రిచర్డ్ హాడ్లీ మూడవ స్థానంలో ఉన్నాడు. హాడ్లీ తన 12 ఓవర్లలో ఆరు మెయిడిన్ ఓవర్లు బౌలింగ్ చేశాడు.

జాన్ స్నో (ఇంగ్లాండ్) – 6 మెయిడెన్స్

వన్డే క్రికెట్‌లో అత్యధిక మెయిడెన్ ఓవర్లు వేసిన బౌలర్ల జాబితాలో ఇంగ్లాండ్ ఫాస్ట్ బౌలర్ జాన్ స్నో నాల్గవ స్థానంలో ఉన్నాడు. అతను 12 ఓవర్లలో ఆరు మెయిడెన్ ఓవర్లు బౌలింగ్ చేశాడు.

గమనించదగ్గ విషయం ఏమిటంటే, ఈ రికార్డులు 60 ఓవర్ల వన్డే క్రికెట్‌లో నమోదయ్యాయి. బౌలర్లు మ్యాచ్‌కు 12 ఓవర్లు బౌలింగ్ చేయగలిగారు. ప్రస్తుతం, వన్డే మ్యాచ్‌లు 50 ఓవర్ల ఫార్మాట్లలో జరుగుతున్నాయి. ఇక్కడ ఒక బౌలర్ గరిష్టంగా 10 ఓవర్లు బౌలింగ్ చేయగలరు. అందువల్ల, ఈ రికార్డులను బద్దలు కొట్టడం ఇప్పుడు దాదాపు అసాధ్యం..!

మరిన్ని క్రికెట్ వార్తల కోసం ఇక్కడ క్లిక్ చేయండి..