మీ నాలుకలోనే మీ ఆరోగ్య రహస్యాలు.. ఆ రంగులు ఈ ప్రమాదకర వ్యాధులకు సంకేతం..
మీ నాలుక రంగు మీ అంతర్గత ఆరోగ్యం గురించి చాలా విషయాలు చెబుతుంది. గులాబీ రంగు ఆరోగ్యకరమైన నాలుకను సూచిస్తే, తెల్లటి పూత, ఎరుపు, పసుపు, ఊదా లేదా ముదురు రంగులు వివిధ ఆరోగ్య సమస్యలకు సంకేతాలు కావచ్చు. విటమిన్ లోపాలు, ఇన్ఫెక్షన్లు, కామెర్లు లేదా గుండె సంబంధిత సమస్యలను నాలుక రంగు మార్పులు ప్రతిబింబిస్తాయి.
Updated on: Dec 19, 2025 | 7:27 AM
మనం ఏదైనా అనారోగ్యంతో ఆసుపత్రికి వెళ్లినప్పుడు వైద్యులు మొదట మన నాలుకను చూపించమని అడుగుతారు. ఎందుకంటే, మన శరీరంలోని అంతర్గత ఆరోగ్య స్థితిని ప్రతిబింబించే అద్దం వంటిది మన నాలుక. సాధారణంగా ఆరోగ్యవంతుల నాలుక గులాబీ రంగులో, కొద్దిగా తేమగా ఉంటుంది. అయితే ఈ రంగులో మార్పులు వస్తే అవి తీవ్రమైన ఆరోగ్య సమస్యలకు సంకేతమని వైద్య నిపుణులు హెచ్చరిస్తున్నారు.
ఏ రంగు ఏ వ్యాధికి సంకేతం?
తెల్లటి పూత: నాలుకపై తెల్లటి పొరలా ఏర్పడితే అది బాక్టీరియల్ ఇన్ఫెక్షన్ లేదా నోటి పరిశుభ్రత సరిగా లేకపోవడాన్ని సూచిస్తుంది. పిల్లలు, వృద్ధులు, మధుమేహం లేదా ఊపిరితిత్తుల వ్యాధి ఉన్నవారిలో ఇది ఎక్కువగా కనిపిస్తుంది. ఒక్కోసారి యాంటీబయాటిక్స్ వాడకం వల్ల కూడా ఇలా జరగవచ్చు.
ఎర్రటి నాలుక: నాలుక మరీ ఎర్రగా ఉంటే అది శరీరంలో విటమిన్ బి-12 లోపాన్ని లేదా తీవ్రమైన జ్వరాన్ని సూచిస్తుంది.
పసుపు రంగు: నాలుక పసుపు రంగులోకి మారితే అది కామెర్లు లేదా మధుమేహానికి ప్రాథమిక సంకేతం కావచ్చు. నోటి పరిశుభ్రత లోపించడం వల్ల కూడా ఇలా జరుగుతుంది.
ఊదా రంగు: నాలుక ఊదా రంగులో కనిపిస్తే అది గుండె సంబంధిత సమస్యలు లేదా శరీరంలో రక్త ప్రసరణ సరిగా జరగడం లేదని అర్థం.
ముదురు రంగు లేదా నలుపు: బాక్టీరియల్ ఇన్ఫెక్షన్ ఎక్కువగా ఉన్నప్పుడు లేదా ధూమపానం, మాదకద్రవ్యాల వ్యసనం ఉన్నవారిలో నాలుక ముదురు రంగులోకి మారుతుంది.
గోధుమ రంగు: నాలుక గోధుమ రంగులో ఉంటే అది శరీరంలో ఐరన్ లోపాన్ని సూచిస్తుంది.
నారింజ రంగు: నోరు పొడిబారడం, అపరిశుభ్రత వల్ల నాలుక నారింజ రంగులో కనిపిస్తుంది.
వైద్యుడిని ఎప్పుడు సంప్రదించాలి?
నాలుక రంగులో మార్పు అనేది కేవలం తాత్కాలికం కావచ్చు. కానీ ఈ క్రింది లక్షణాలు ఉంటే మాత్రం అశ్రద్ధ చేయకూడదు..
- నాలుక రంగు మార్పు రెండు వారాల కంటే ఎక్కువ కాలం కొనసాగడం.
- రంగు మార్పుతో పాటు జ్వరం, గొంతు నొప్పి లేదా కడుపు నొప్పి ఉండటం.
- నాలుకపై వింతైన మచ్చలు లేదా నొప్పి కలగడం.
జీర్ణ సమస్యలు, అధిక ఒత్తిడి, కొన్ని రకాల క్యాన్సర్ల లక్షణాలు కూడా నాలుకపైనే మొదట కనిపిస్తాయి. అందుకే ప్రతిరోజూ పళ్లు తోముకునే సమయంలో నాలుకను కూడా శుభ్రం చేసుకోవడం అలవాటు చేసుకోవాలి. ఏదైనా అసాధారణ మార్పు కనిపిస్తే వెంటనే వైద్య సలహా తీసుకోవడం ఉత్తమం.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..
