రాత్రి పడుకునే ముందు పిస్తాపప్పు తింటే ఏమవుతుంది..? అసలు విషయం తెలిస్తే అవాక్కే..

నేటి ఉరుకుల పరుగుల జీవితంలో మన ఆహారపు అలవాట్లు పూర్తిగా మారిపోయాయి. ముఖ్యంగా సాయంత్రం వేళ ఆకలి వేయగానే చిప్స్, బిస్కెట్లు వంటి జంక్ ఫుడ్ వైపు మొగ్గు చూపుతుంటాం. ఇవి నోటికి రుచిగా అనిపించినా.. శరీరానికి మాత్రం తీవ్ర హాని చేస్తాయి. వీటికి ప్రత్యామ్నాయంగా ప్రకృతి ప్రసాదించిన డ్రై ఫ్రూట్స్ తీసుకోవడం వల్ల అద్భుతమైన ఆరోగ్య ప్రయోజనాలు పొందవచ్చని ప్రముఖ పోషకాహార నిపుణురాలు దీప్సిఖా జైన్ తెలిపారు.

పోషకాల గని.. ఈ డ్రై ఫ్రూట్స్

బాదం, జీడిపప్పు, వాల్‌నట్స్, ఎండుద్రాక్ష, పిస్తాపప్పులలో ప్రోటీన్లు, విటమిన్లు, ఖనిజాలు, ఫైబర్ పుష్కలంగా ఉంటాయి. ఇవి శరీరానికి తక్షణ శక్తిని అందించడమే కాకుండా వ్యాధి నిరోధక శక్తిని పెంచుతాయి. వాల్‌నట్స్, బాదంలో ఉండే ఒమేగా-3 ఫ్యాటీ యాసిడ్లు మెదడు చురుగ్గా పనిచేయడానికి తోడ్పడతాయి. వీటిలోని మంచి కొవ్వులు రక్తంలోని చెడు కొలెస్ట్రాల్‌ను తగ్గించి, గుండె జబ్బుల ప్రమాదాన్ని తగ్గిస్తాయి. ఎండుద్రాక్ష, ఖర్జూరం క్రమం తప్పకుండా తీసుకోవడం వల్ల హిమోగ్లోబిన్ శాతం పెరిగి రక్తహీనత సమస్య తగ్గుతుంది.

పిస్తాపప్పుల ప్రత్యేకత

పోషకాహార నిపుణురాలు దీప్సిఖా జైన్ ప్రకారం.. రాత్రి వేళ పిస్తాపప్పులు తినడం వల్ల నిద్ర నాణ్యత మెరుగుపడుతుంది. పిస్తాలో మెగ్నీషియం అధికంగా ఉంటుంది. ఇది మనస్సును ప్రశాంతపరిచి, గుండె లయను నియంత్రించడంలో సహాయపడుతుంది. కాళ్ళు బిగుసుకుపోయే సమస్య ఉన్నవారికి ఇది మేలు చేస్తుంది. దాదాపు 28 గ్రాముల పిస్తాలో 6 గ్రాముల ప్రోటీన్ ఉంటుంది. ఇందులో 9 రకాల ముఖ్యమైన అమైనో ఆమ్లాలు ఉండటం వల్ల కండరాల పునరుద్ధరణకు ఇది తోడ్పడుతుంది.

బరువు తగ్గాలనుకునే వారికి వరం

డ్రై ఫ్రూట్స్‌లో క్యాలరీలు ఎక్కువగా ఉన్నప్పటికీ, పరిమితంగా తీసుకుంటే బరువు తగ్గడానికి ఇవి ఎంతగానో సహాయపడతాయి. ముఖ్యంగా పిస్తాలో క్యాలరీలు తక్కువగా ఉండి ఫైబర్ ఎక్కువగా ఉంటుంది. ఇది కడుపు నిండుగా ఉన్న అనుభూతిని కలిగించి, అనవసరమైన చిరుతిళ్లపై కోరికను తగ్గిస్తుంది.

నిపుణుల సూచన

ఏదైనా అతిగా తింటే ప్రమాదకరమే. అందుకే రోజుకు 4-5 బాదం పప్పులు, 1-2 వాల్‌నట్స్, కొన్ని ఎండుద్రాక్షలు లేదా పరిమితంగా పిస్తాపప్పులు తీసుకోవడం ఆరోగ్యానికి శ్రేయస్కరం.