MLC 2023: IPL ట్రోఫీ ఇచ్చిన కిక్.. అమెరికాలోనూ అదరగొట్టిన సూపర్ కింగ్స్.. పాక్ బౌలర్ దెబ్బకు నైట్ రైడర్స్ ఓటమి..
MLC 2023: ఫాఫ్ డు ప్లెసిస్ నేతృత్వంలోని టెక్సాస్ సూపర్ కింగ్స్ మేజర్ లీగ్ క్రికెట్ మొదటి సీజన్ మొదటి మ్యాచ్లో విజయం సాధించడం ద్వారా లీగ్లో శుభారంభం చేసింది.
Updated on: Jul 14, 2023 | 3:10 PM
అమెరికాలో తొలిసారిగా నిర్వహిస్తున్న మేజర్ లీగ్ క్రికెట్ తొలి సీజన్లో ఫాఫ్ డు ప్లెసిస్ నేతృత్వంలోని టెక్సాస్ సూపర్ కింగ్స్ జట్టు తొలి మ్యాచ్లో విజయం సాధించి లీగ్లో శుభారంభం చేసింది. ఐపీఎల్ ఫ్రాంచైజీ చెన్నై సూపర్ కింగ్స్ యాజమాన్యంలోని టెక్సాస్ సూపర్ కింగ్స్ తమ తొలి మ్యాచ్లో లాస్ ఏంజెల్స్ నైట్ రైడర్స్ను 69 పరుగుల తేడాతో ఓడించింది. ఈ మ్యాచ్లో తొలుత బ్యాటింగ్ చేసిన టెక్సాస్ ఆరు వికెట్ల నష్టానికి 181 పరుగులు చేసింది. అనంతరం లక్ష్య ఛేదనకు దిగిన లాస్ ఏంజెల్స్ జట్టు 14 ఓవర్లలో 112 పరుగులకే ఆలౌటైంది.
ప్రారంభ MLC లీగ్లో ఆరు జట్లు పోటీపడుతున్నాయి. వీటిలో నాలుగు IPL ఫ్రాంచైజీలకు చెందినవి. లీగ్లో మొదటి మ్యాచ్ ఐపీఎల్ ఫ్రాంచైజీల యాజమాన్యంలోని జట్ల మధ్య జరిగింది. ఐపీఎల్లో ఆర్సీబీకి కెప్టెన్గా వ్యవహరించిన డుప్లెసిస్ గతంలో చెన్నై సూపర్ కింగ్స్ తరపున చాలా కాలం పాటు ఆడిన సంగతి తెలిసిందే.
కాన్వే, మిల్లర్ హాఫ్ సెంచరీలు..
ఈ మ్యాచ్లో సూపర్ కింగ్స్ తరపున డెవాన్ కాన్వే, డేవిడ్ మిల్లర్ హాఫ్ సెంచరీలు సాధించారు. ఓపెనర్గా బరిలోకి దిగిన కాన్వాయ్ 37 బంతుల్లో 7 ఫోర్లు, ఒక సిక్స్ సాయంతో 55 పరుగులు చేశాడు. అలాగే, డేవిడ్ మిల్లర్ 42 బంతుల్లో రెండు ఫోర్లు, 4 సిక్సర్ల సాయంతో 61 పరుగులు చేశాడు. కెప్టెన్ ఫాఫ్ డు ప్లెసిస్ ప్రత్యేకంగా ఏమీ చేయలేక రెండో ఓవర్ రెండో బంతికి ఖాతా తెరవకుండానే లాకీ ఫెర్గూసన్ చేతికి చిక్కాడు. ఆ తర్వాత లహిరు కుమార్ రెండు పరుగులు మాత్రమే చేయగలిగాడు.
చివరగా మిచెల్ సాంట్నర్ 14 బంతుల్లో 21 పరుగులు, డ్వేన్ బ్రావో ఆరు బంతుల్లో 16 పరుగులు చేసి జట్టును పటిష్ట స్కోరుకు తీసుకెళ్లారు. లాస్ ఏంజెల్స్ తరపున అలీఖాన్, లక్కీ ఫెర్గూసన్ రెండేసి వికెట్లు తీశారు.
రస్సెల్ ఒంటరి పోరాటం చేసినా.. తప్పని ఓటమి..
ఈ లక్ష్యాన్ని చేధించేందుకు బరిలో దిగిన లాస్ ఏంజెల్స్ జట్టు తరపున విజయం కోసం ఆండ్రీ రస్సెల్ చాలా ప్రయత్నించాడు. కానీ, విజయం సాధించలేకపోయాడు. తన ఇన్నింగ్స్లో 34 బంతులు ఎదుర్కొన్న రస్సెల్ ఏడు ఫోర్లు, మూడు సిక్సర్ల సాయంతో 55 పరుగులు చేశాడు. అయితే ఆ జట్టుకు శుభారంభం లభించలేదు. మార్టిన్ గప్టిల్ ఖాతా తెరవకుండానే ఔట్ కాగా, ఉన్ముక్త్ చంద్, రిలే రస్సో చెరో నాలుగు పరుగులు దాటలేకపోయారు. నితీష్ కుమార్ కూడా ఖాతా తెరవలేకపోయారు. దీంతో లాస్ ఏంజెల్స్ కేవలం 20 పరుగులకే నాలుగు వికెట్లు కోల్పోయింది.
ఇక్కడి నుంచి మళ్లీ రస్సెల్, జస్కరన్ మల్హోత్రా జట్టు ఇన్నింగ్స్ను చక్కదిద్దేందుకు ప్రయత్నించారు. మల్హోత్రా 11 బంతుల్లో రెండు ఫోర్లు, రెండు సిక్సర్లతో 22 పరుగులు చేసి ఔట్ కాగా, కెప్టెన్ సునీల్ నరైన్ (15) రస్సెల్కు మద్దతుగా నిలిచేందుకు ప్రయత్నించినా ఫలితం లేకపోయింది. అనంతరం జట్టు స్కోరు 109 పరుగుల వద్ద ఉండగా అర్ధసెంచరీ చేసిన రస్సెల్ కూడా పెవిలియన్ చేరాడు.
పాకిస్థాన్ పేసర్ మాయాజాలం..
సూపర్ కింగ్స్ తరపున మహ్మద్ మొహ్సిన్ అద్భుతంగా బౌలింగ్ చేశాడు. తన ఖాతాలో మూడు ఓవర్లు వేసిన మొహ్సిన్ ఎనిమిది పరుగులిచ్చి నాలుగు వికెట్లు పడగొట్టాడు. మొహ్సిన్ పెషావర్లో జన్మించిన పాకిస్థాన్ ఆటగాడు. వీరితో పాటు రస్టీ థెరాన్, గెరాల్డ్ కోయెట్జీలు చెరో రెండు వికెట్లు తీయగా, కాల్విన్ సావేజ్, బ్రావో ఒక్కో వికెట్ తీశారు.
మరిన్ని క్రీడా వార్తల కోసం ఇక్కడ క్లిక్ చేయండి..
