Video: అప్పుడలా.. ఇప్పుడిలా.. RCB దెబ్బకు యూ టర్న్ తీసుకున్న అంబటి రాయుడు

అంబటి రాయుడు మరోసారి తన మాట మార్చి వార్తల్లో నిలిచాడు. మొదట RCBను విమర్శించిన రాయుడు, తాజాగా వారిపై ప్రశంసల వర్షం కురిపించి అభిమానులను ఆశ్చర్యపరిచాడు. ఈ మార్పుపై RCB ఫ్యాన్స్ తీవ్రంగా స్పందిస్తూ, అతన్ని ట్రోల్ చేస్తున్నారు. రాయుడు దీనిపై తనదైన శైలిలో సమాధానమిచ్చినా, అభిమానులు మాత్రం అతని మాటలను నమ్మలేకపోతున్నారు.

Ambati Rayudu Rcb

Narsimha |

Updated on: Mar 25, 2025 | 9:18 AM

టీమిండియా మాజీ క్రికెటర్, తెలుగు తేజం అంబటి రాయుడు మరోసారి తన మాట మార్చి వార్తల్లో నిలిచాడు. క్రికెట్ కెరీర్‌లో ఎన్నో అనిశ్చిత నిర్ణయాలు తీసుకున్న రాయుడు, రాజకీయ జీవితంలో కూడా అదే విధంగా కొనసాగాడు. ఇప్పుడు కామెంటేటర్, క్రికెట్ విశ్లేషకుడిగా కూడా తన మాటలతో మార్పులు చేస్తూ అభిమానులను ఆశ్చర్యపరిచాడు. IPL 2025 సీజన్ ప్రారంభానికి ముందు రాయుడు, రాయల్ ఛాలెంజర్స్ బెంగళూరు (RCB)పై తీవ్ర విమర్శలు చేశారు. ఓ తెలుగు పాడ్‌కాస్ట్ ఇంటర్వ్యూలో, “ఈ ఏడాది RCB టైటిల్ గెలవద్దని కోరుకుంటున్నాను” అంటూ జోకులు పేల్చాడు.

ఈ వ్యాఖ్యలు RCB అభిమానులకు కోపాన్ని తెప్పించాయి. IPL 2025 సీజన్‌లో బెంగళూరు జట్టు శుభారంభం చేయగానే, రాయుడిపై విరుచుకుపడ్డారు. సోషల్ మీడియా వేదికగా అతనిని ట్రోల్ చేస్తూ, “RCB విజయం రాయుడికి చెంపదెబ్బ” అంటూ కామెంట్లు చేశారు. అయితే, ఈ విమర్శల కారణంగా రాయుడు పూర్తిగా తన మాట మార్చేశారు.

తాజాగా ESPN క్రిక్‌ఇన్ఫో షోలో, RCB మాజీ ఆటగాడు వరుణ్ ఆరోన్‌తో కలిసి మాట్లాడిన రాయుడు, RCBపై ప్రశంసల వర్షం కురిపించాడు. “ఈ సారి RCB బలంగా ఉంది. టైటిల్ గెలిచే టీమ్‌లా కనిపిస్తోంది” అని అభిప్రాయపడ్డాడు. గతంలో విమర్శించిన రాయుడు ఇప్పుడు RCBపై పొగడ్తల జల్లు కురిపించడం ఆశ్చర్యానికి గురిచేసింది.

“ఈ సారి RCB చాలా పటిష్టంగా ఉంది. టైటిల్ గెలిచే టీమ్‌లా కనిపిస్తోంది వరుణ్.. ఇలా ఎందుకు చెబుతున్నానంటే.. అతను RCB డైహార్డ్ ఫ్యాన్!” అని రాయుడు నవ్వుతూ చెప్పాడు. ఇది విన్న వరుణ్ ఆరోన్ నవ్వును ఆపుకోలేకపోయాడు. “ధన్యవాదాలు.. రాయుడు చెప్పిన మాటలు ఆశ్చర్యానికి గురి చేశాయి. ఈ రోజు అతను పూర్తిగా RCB మనిషిలా మారిపోయాడు” అని వరుణ్ అన్నారు.

ఈ యూ-టర్న్‌పై రాయుడిని అభిమానులు ఆగ్రహంగా చూస్తున్నారు. కొద్ది రోజుల కిందటే RCB గురించి నెగటివ్‌గా మాట్లాడిన రాయుడు, ఇప్పుడు పొగడ్తలు కురిపించడంతో అభిమానులు అతని మాటల్ని నమ్మలేకపోతున్నారు. రాయుడు దీనిపై స్పందిస్తూ, “నేను ప్రతీసారి RCB సామర్థ్యం గురించి మాట్లాడుతాను. కానీ కొంతమంది నిజాన్ని జీర్ణించుకోలేరు” అంటూ సెటైర్లు వేశారు.

ప్రస్తుతం ఈ వీడియో నెట్టింట వైరల్‌గా మారింది. “మాట మార్చడం రాయుడికి అలవాటే”, “ఒకసారి విమర్శలు, మరొకసారి పొగడ్తలు.. ఏది నిజం?” అంటూ అభిమానులు కామెంట్లు పెడుతున్నారు. RCB ఫ్యాన్స్ నుంచి విపరీతమైన స్పందన రావడంతో రాయుడు మళ్లీ ఏదైనా వివరణ ఇస్తాడా? లేక ఎప్పటిలాగే తన స్టేట్‌మెంట్‌ను మర్చిపోతాడా? అనే ఉత్కంఠ కొనసాగుతోంది.