కర్ణాటక ముఖ్యమంత్రి అభ్యర్థనను తిరస్కరించిన విప్రో ఛైర్మన్ అజీమ్ ప్రేమ్ జీ

విప్రో వ్యవస్థాపకుడు, చైర్మన్ అజీమ్ ప్రేమ్‌జీ- కర్ణాటక ముఖ్యమంత్రి సిద్ధరామయ్య మధ్య జరిగిన ఒక సంఘటన సోషల్ మీడియాలో పెద్ద దుమారం రేపుతోంది. ఇది వివిధ సోషల్ మీడియా ప్లాట్‌ఫామ్‌లలో షేర్ అవుతోంది. నిజానికి, కర్ణాటక ముఖ్యమంత్రి సిద్ధరామయ్య అజీమ్ ప్రేమ్‌జీకి ఒక విజ్ఞప్తి చేశారు. అజీమ్ ప్రేమ్‌జీ తన విజ్ఞప్తిని అంగీకరిస్తారని సిద్ధరామయ్య భావించారు. కానీ ఆయన దానిని తిరస్కరించారు. ముఖ్యమంత్రి సిద్ధరామయ్య ఈ ప్రాంతంలో రోడ్డు రద్దీని తగ్గించడంలో అజీమ్ ప్రేమ్‌జీ సహాయం కోరారు. కంపెనీ ప్రాంగణాన్ని బయటి ట్రాఫిక్‌ కోసం తెరవాలని ఆయన విప్రో ఛైర్మన్‌ను అభ్యర్థించారు. అజీమ్ ప్రేమ్‌జీ ముఖ్యమంత్రి ప్రతిపాదనను తిరస్కరించారు.

బెంగళూరులో ట్రాఫిక్ ఒక ప్రధాన సమస్య. ఈ సమస్యను పరిష్కరించడానికి రాష్ట్ర ప్రభుత్వం కృషి చేస్తోంది. ముఖ్యమంత్రి సిద్ధరామయ్య సెప్టెంబర్ 19న అజీమ్ ప్రేమ్‌జీకి సహాయం కోరుతూ లేఖ రాశారు. ఆ లేఖలో, విప్రో తన సర్జాపూర్ క్యాంపస్‌ గుండా ప్రజా వాహనాలకు అనుమతి ఇవ్వాలని ముఖ్యమంత్రి సిద్ధరామయ్య అడిగారు. ముఖ్యమంత్రి అభ్యర్థనను తిరస్కరించి ప్రేమ్‌జీ స్పందించారు.

విప్రో కంపెనీ చైర్మన్ అజీమ్ ప్రేమ్‌జీ స్పందిస్తూ.. ఇది కంపెనీ యాజమాన్యంలోని ప్రైవేట్ ఆస్తి అని, ప్రజా రవాణా కోసం కాదని అన్నారు. ప్రభుత్వ వాహనాలను ప్రాంగణంలోకి అనుమతించడం వల్ల చట్టపరమైన, పరిపాలనా పరమైన సవాళ్లు ఎదురవుతాయని ఆయన అన్నారు. ట్రాఫిక్ ప్రవాహాన్ని మెరుగుపరచడానికి కార్పొరేట్ మద్దతు కోసం సిద్ధరామయ్య చేసిన విజ్ఞప్తిని కూడా ఆయన ప్రశంసించారు.

విప్రో చైర్మన్ అజీమ్ ప్రేమ్‌జీ ప్రభుత్వానికి తన పూర్తి మద్దతు ఉంటుందని ప్రతిజ్ఞ చేశారు. ట్రాఫిక్ జామ్‌లను తగ్గించడానికి ప్రభుత్వానికి సహకరిస్తామని ఆయన చెప్పారు. రద్దీని పరిష్కరించడానికి సమగ్ర రోడ్‌మ్యాప్‌ను అభివృద్ధి చేయాలని సూచించారు. ఇది ట్రాఫిక్ జామ్‌లకు గల కారణాలను గుర్తించడానికి ప్రయత్నించి, సర్వే ఖర్చులను విప్రో భరిస్తుందని స్పష్టం చేశారు.

బెంగళూరులోని ఔటర్ రింగ్ రోడ్డులో అనేక పెద్ద కంపెనీల కార్యాలయాలు ఉన్నాయి. దీని ఫలితంగా తరచుగా ట్రాఫిక్ జామ్‌లు ఏర్పడుతున్నాయి. రద్దీ కారణంగా నివాసితులు చాలా కాలంగా ఇబ్బంది పడుతున్నారు. ఇటీవల, లాజిస్టిక్స్ స్టార్టప్ బ్లాక్‌బక్ తన కార్యాలయాన్ని నగరంలోని ఔటర్ రింగ్ రోడ్డు నుండి మార్చాలని నిర్ణయించుకుంది. అనేక ఇతర చిన్న కంపెనీలు కూడా వేరే చోటికి మారాయి. కంపెనీల తరలింపును నిరోధించడానికి ప్రభుత్వం నిరంతర ప్రయత్నాలు చేస్తోంది. కానీ అది విజయవంతం కాలేదు.

మరిన్ని జాతీయ వార్తల కోసం ఇక్కడ క్లిక్ చేయండి..