బోనాలు

ఆషాడ మాసం వస్తుంటే చాలు తెలంగాణ సంస్కృతి సంప్రదాయాలకు అద్దంపట్టే బోనాల పండగ సందడి మొదలవుతుంది. ఆషాఢ మాసానికి తెలంగాణ సంస్కృతీ సాంప్రదాయలకు విడదీయరాని అనుబంధం శతాబ్దాలుగా పెనవేసుకుని విరాజిల్లుతోంది బోనాల పండగ. ఈ పండుగను ప్రధానంగా హైదరాబాద్ , సికింద్రాబాద్ జంట నగరాల్లోని పరిసర ప్రాంతాల్లో జరుపుకుంటారు. తెలంగాణ ఆడబడుచులు అంగరంగ వైభవంగా జరిగే బోనాల జాతరకు ముహర్తం ఫిక్స్ అయింది. రాష్ట్ర పండుగ అయిన బోనాల పండుగ 2025 ఏడాదికి సంబంధించి ఆషాడం బోనాల షెడ్యూల్ ను తెలంగాణ రాష్ట్ర ప్రభుత్వం ప్రకటించింది. జూన్‌ 26వ తేదీ గురువారం చారిత్రక గోల్కొండ కోటలోని శ్రీ జగదాంబిక అమ్మవారికి మొదటి బోనం సమర్పించడంతో బోనాలు సంబురాలు మొదలవుతాయి

తెలుగు పంచాంగం ప్రకారం ఆషాఢ మాసంలోని మొదటి గురువారం లేదా తొలి ఆదివారం రోజున గోల్కొండలోని జగదాంబిక దేవాలయంలో బోనాల సంబురాలకు శ్రీకారం చుడతారు. బంగారు బోనంతో సంబురాలు ప్రారంభమవుతాయి. ఈ ఏడాది బోనాలు జూన్‌ 26వ తేదీన ప్రారంభమై జూలై 24వ తేదీతో ముగియనున్నాయి. ఈ ఏడాది భారీ సంఖ్యలో భక్తులు బోనాల జాతరకు తరలిరానున్నారు అని భావిస్తున్న తెలంగాణా రాష్ట్ర సర్కార్ ఇప్పటికే ఏర్పాట్లు మొదలు పెట్టింది. గత అనుభవాలను దృష్టిలో పెట్టుకుని ఎటువంటి ఇబ్బందులు తలెత్తకుండా ఏర్పాట్ల కోసం రూ. 20 కోట్ల రూపాయలను కేటాయించింది.

వర్షాకాలంలో తలెత్తే సీజనల్ వ్యాధులు, ఇబ్బందులు రాకుండా మమ్ము కాచి కాపాడు అమ్మ అంటూ మహిళలు బోనం ఎత్తుతారు. అన్నం, పాలు, పెరుగుతో తయారు చేసిన బోనాన్ని మట్టి కుండలో పెట్టి గ్రామ దేవతలైన పోచమ్మ, ఎల్లమ్మ, మైసమ్మ, బాలమ్మ, ముత్యాలమ్మ, మహంకాళమ్మ, పెద్దమ్మలకు పసుపు కుంకుమలు, చీరసారెలతో సమర్పిస్తారు