Rohit Sharma : హిట్‌మ్యాన్ రోహిత్ శర్మ భార్య రేంజే వేరు..కొత్తగా కొన్న ఇంటి ధర ఎన్ని కోట్లో తెలుసా ?

Rohit Sharma : టీమిండియా స్టార్ క్రికెటర్, హిట్‌మ్యాన్ రోహిత్ శర్మ సతీమణి రితికా సజ్దే వార్తల్లో నిలిచారు. ముంబైలోని అత్యంత ఖరీదైన ప్రాంతంలో ఆమె ఒక విలాసవంతమైన అపార్ట్‌మెంట్‌ను కొనుగోలు చేశారు. దీని ధర వింటే ఎవరైనా షాక్ అవ్వాల్సిందే. రోహిత్ శర్మ ఐపీఎల్ జీతం కంటే కూడా ఈ ఇంటి ధర చాలా ఎక్కువగా ఉండటం ఇప్పుడు సోషల్ మీడియాలో హాట్ టాపిక్‌గా మారింది.

ముంబైలోని ప్రభాదేవి ప్రాంతంలో ఉన్న అత్యంత విలాసవంతమైన అహూజా టవర్స్‎లో రితికా సజ్దే ఈ కొత్త అపార్ట్‌మెంట్‌ను కొనుగోలు చేశారు. దీని మొత్తం ధర రూ.26.30 కోట్లు. కేవలం ఈ ఇంటి రిజిస్ట్రేషన్ కోసమే ఆమె భారీగా ఖర్చు చేశారు. డిసెంబర్ 12, 2025న జరిగిన ఈ లావాదేవీలో రూ.1.31 కోట్ల స్టాంప్ డ్యూటీ, రూ.30,000 రిజిస్ట్రేషన్ ఛార్జీలు చెల్లించినట్లు సమాచారం. ఇది ఒక రెసిడెన్షియల్ బిల్డింగ్ అయినప్పటికీ, అక్కడ ఉండే సౌకర్యాలు మాత్రం ఫైవ్ స్టార్ హోటల్ రేంజ్‌లో ఉంటాయి.

రితికా కొన్న ఈ అపార్ట్‌మెంట్ వైశాల్యం సుమారు 2,760.40 చదరపు అడుగులు. ముంబై లాంటి నగరంలో ఇంత పెద్ద ఫ్లాట్ దొరకడం విశేషం. దీనితో పాటు మూడు కార్లను పార్క్ చేసుకునేందుకు ప్రత్యేకంగా స్థలాన్ని కేటాయించారు. ఈ ఆస్తిని ఆమె అజింక్య డివై పాటిల్, పూజా అజింక్య పాటిల్ నుంచి కొనుగోలు చేసినట్లు తెలుస్తోంది. ప్రభాదేవి ప్రాంతం ముంబైలోని బిజినెస్ హబ్‌లకు, బాంద్రా-వర్లీ సీ లింక్‌కు అతి సమీపంలో ఉండటం వల్ల ఇక్కడ స్థిరాస్తి ధరలు ఆకాశాన్ని తాకుతుంటాయి.

ఈ ఇంటి ధరను రోహిత్ శర్మ ఐపీఎల్ జీతంతో పోలుస్తూ నెటిజన్లు ఆశ్చర్యం వ్యక్తం చేస్తున్నారు. ఐపీఎల్‌లో రోహిత్ శర్మ జీతం ఏడాదికి రూ.16 కోట్లు. కానీ రితికా కొన్న అపార్ట్‌మెంట్ ధర అంతకంటే మరో రూ.10 కోట్లు ఎక్కువగా ఉండటం గమనార్హం. రితికా కేవలం రోహిత్ భార్యగానే కాకుండా, స్పోర్ట్స్ మేనేజర్‌గా కూడా మంచి గుర్తింపు తెచ్చుకున్నారు. గతంలో ఆమె కార్నర్‌స్టోన్ స్పోర్ట్ అండ్ ఎంటర్‌టైన్‌మెంట్ సంస్థలో పని చేస్తూ పలువురు అగ్రశ్రేణి అథ్లెట్ల బ్రాండ్ ఎండార్స్‌మెంట్లను పర్యవేక్షించేవారు.

రితికా కొత్త ఇల్లు ఉన్న ప్రభాదేవి ఏరియా వెస్ట్రన్ ఎక్స్‌ప్రెస్ హైవే, సేనాపతి బాపట్ మార్గ్ వంటి ప్రధాన రహదారులకు అనుసంధానించబడి ఉంటుంది. ఇక్కడ నివసించే వారు సెలబ్రిటీలు, బడా పారిశ్రామికవేత్తలే ఉంటారు. రోహిత్ శర్మ, రితికా ఇప్పటికే ముంబైలో ఒక అద్భుతమైన నివాసంలో ఉంటున్నారు.. ఇప్పుడు ఈ కొత్త అపార్ట్‌మెంట్‌ను పెట్టుబడి కోసమా లేక నివాసం కోసమా కొనుగోలు చేశారనేది తెలియాల్సి ఉంది.

మరిన్ని క్రికెట్ వార్తల కోసం ఇక్కడ చూడండి.