Delhi Airport: ఢిల్లీ విమానాశ్రయంలో రెండు విమానాలు ఢీః.. ప్రయాణికుల పరిస్థితి ఏంటి?

Delhi Airport: ఢిల్లీలోని ఇందిరాగాంధీ అంతర్జాతీయ విమానాశ్రయంలో గురువారం మధ్యాహ్నం రెండు విమానాలు ఒకదానికొకటి ఢీకొన్నాయి. స్పైస్‌జెట్- ఆకాశ ఎయిర్‌లైన్స్‌కు చెందిన విమానాలు స్వల్పంగా ఢీకొనడంతో ప్రయాణికులు ఒక్కసారిగా ఆందోళనకు గురయ్యారు. అయితే ఈ ప్రమాదంలో ఎవరికీ ఎటువంటి గాయాలు కాలేదని అధికారులు ధృవీకరించారు.

అసలేం జరిగింది?

గురువారం మధ్యాహ్నం సుమారు 2:15 గంటల సమయంలో ఈ ఘటన జరిగింది. లేహ్ (Leh) నుండి వచ్చిన స్పైస్‌జెట్ విమానం ల్యాండింగ్ తర్వాత గేట్ వైపు వెళ్తుండగా, అక్కడ నిలిపి ఉంచిన ఆకాశ ఎయిర్‌లైన్స్ విమానాన్ని ఢీకొట్టింది. ఆ సమయంలో ఆకాశ ఎయిర్‌లైన్స్ విమానం ఢిల్లీ నుండి హైదరాబాద్‌కు బయలుదేరడానికి సిద్ధంగా ఉంది.

జరిగిన నష్టం ఏమిటి?

ఈ స్వల్ప ఘర్షణ కారణంగా రెండు విమానాలు పాక్షికంగా దెబ్బతిన్నాయి. స్పైస్‌జెట్ విమానానికి సంబంధించిన కుడి వైపు ‘వింగ్లెట్’ (Winglet) దెబ్బతింది. ఆకాశ ఎయిర్‌లైన్స్ విమానానికి సంబంధించిన ఎడమ వైపు ‘హారిజాంటల్ స్టెబిలైజర్’ (Horizontal Stabilizer) కు నష్టం వాటిల్లినట్లు తెలుస్తోంది.

ఎయిర్‌లైన్స్ స్పందన

ఈ ఘటనపై ఆకాశ ఎయిర్‌లైన్స్ ఒక ప్రకటన విడుదల చేసింది. “మా విమానం స్థిరంగా నిలబడి ఉన్న సమయంలోనే మరొక విమానం వచ్చి ఢీకొట్టిందని ప్రాథమిక సమాచారం ద్వారా తెలిసింది. విమానంలోని ప్రయాణికులు, సిబ్బంది అందరినీ సురక్షితంగా కిందకు దించాము. హైదరాబాద్ వెళ్లాల్సిన ప్రయాణికుల కోసం ప్రత్యామ్నాయ ఏర్పాట్లు చేస్తున్నాము” అని సంస్థ ప్రతినిధులు తెలిపారు.

ఫ్లైట్‌రాడార్24 డేటా ప్రకారం, స్పైస్‌జెట్ విమానం గేట్ వైపు వస్తున్నప్పుడు, ఆకాశ విమానం వెనక్కి వెళ్తున్న క్రమంలో ఈ ప్రమాదం చోటుచేసుకున్నట్లు తెలుస్తోంది. ప్రస్తుతం ఈ ఘటనపై ఉన్నతాధికారులు విచారణ చేపట్టారు.

మరిన్ని జాతీయ వార్తల కోసం ఇక్కడ క్లిక్ చేయండి