వాషింగ్ మెషీన్‌ కొంటున్నారా.. ఫ్రంట్ లోడ్, టాప్ లోడ్ ఏది బెస్ట్ తెలుసా?

ఆధునిక కాలంలో గృహోపకరణాల కొనుగోలు చేసేటప్పుడు కేవలం ధరను మాత్రమే కాకుండా, వాటి పనితీరు, నిర్వహణ ఖర్చులను పరిగణనలోకి తీసుకోవాలి. ముఖ్యంగా బట్టలు ఉతికేందుకు వాషింగ్​ మెషీన్​ కొనేటప్పుడు చాలామంది టాప్​లోడ్​ కొనాలా లేదా ఫ్రంట్​ లోడ్​ కొనాలా? అని తికమకపడుతుంటారు. బట్టల రకాన్ని బట్టి ఏ మిషన్ ఎంచుకుంటే ఎక్కువ కాలం మన్నుతాయో ఇప్పుడు వివరంగా తెలుసుకుందాం.

బట్టల శుభ్రత, నాణ్యతలో ఫ్రంట్ లోడ్..

టాప్ లోడ్ మిషన్లతో పోలిస్తే ఫ్రంట్ లోడ్ మిషన్లే బట్టలను చాలా శుభ్రంగా ఉతుకుతాయని నిపుణులు చెబుతున్నారు. ఈ మిషన్లలో బట్టలు గుండ్రంగా తిరుగుతూ, ఒకదానిపై ఒకటి పడటం ద్వారా చేత్తో ఉతికినట్లుగా క్లీన్ అవుతాయి. టాప్ లోడ్ విషయానికి వస్తే.. ఇందులో బట్టలు నీటిలో మునిగి, అజిటేటర్ సాయంతో అటు ఇటు తిరుగుతాయి. ఇది కూడా బాగున్నా, ఫ్రంట్ లోడ్ ఇచ్చే పర్‌ఫెక్ట్ ఫినిషింగ్ ఇందులో లభించదు. ఖరీదైన దుస్తులు ఎక్కువ కాలం మన్నాలంటే ఫ్రంట్ లోడ్ మిషన్ బెస్ట్ ఛాయిస్. టాప్ లోడ్ మిషన్లలో బట్టలు గట్టిగా ముడుచుకుపోవడం వల్ల దారాలు త్వరగా బలహీనపడే అవకాశం ఉంటుంది. ఫ్రంట్ లోడ్ మిషన్లలో బట్టలు సున్నితంగా ఉతకబడటం వల్ల కొత్తవిలా మెరిసిపోతాయి.

ఏది ఎవరికి అనుకూలం?

పొదుపు విషయానికి వస్తే ఫ్రంట్ లోడ్ మిషన్లు చాలా తక్కువ నీటిని వాడుకుంటాయి. డ్రమ్ సగం కంటే తక్కువ నీటితోనే క్లీనింగ్ ప్రాసెస్ పూర్తవుతుంది. దీనివల్ల డిటర్జెంట్ కూడా ఆదా అవుతుంది. అయితే విద్యుత్ బిల్లు, సమయం విషయాల్లో టాప్ లోడ్ మిషన్లదే పైచేయి. టాప్ లోడ్ మిషన్లలో వాషింగ్ సైకిల్ చాలా వేగంగా అయిపోతుంది. తక్కువ బడ్జెట్‌లో అందుబాటులో ఉండటం వీటి ప్రత్యేకత.

ఫ్రంట్ లోడ్ మిషన్లలో నీటిని వేడి చేసే ఇన్‌బిల్ట్ హీటర్లు ఉండటం వల్ల విద్యుత్ ఖర్చు కాస్త ఎక్కువగా ఉండొచ్చు. ఫ్రంట్ లోడ్ మిషన్లకు వంగి బట్టలు వేయాల్సి ఉంటుంది, ఇది వృద్ధులకు లేదా నడుం నొప్పి ఉన్నవారికి ఇబ్బందిగా మారవచ్చు. బడ్జెట్ పరిమితి లేని వారికి ఫ్రంట్ లోడ్ ఉత్తమం, తక్కువ బడ్జెట్‌లో వేగవంతమైన వాషింగ్ కోరుకునే వారికి టాప్ లోడ్ సరైన ఎంపిక. మీ అవసరాలను బట్టి సరైన నిర్ణయం తీసుకోండి.