నోయిడాలో భారీ అగ్నిప్రమాదం.. 12వ అంతస్తులో ఎగసిపడిన మంటలు

దేశ రాజధాని ప్రాంతంలో మరోసారి అగ్నిప్రమాదం కలకలం రేపింది. ఢిల్లీకి సమీపంలోని ఉత్తరప్రదేశ్‌లోని నోయిడాలో ఉన్న ప్రముఖ ఐవీ కౌంటీ అపార్ట్‌మెంట్ సముదాయంలో గురువారం భారీ అగ్నిప్రమాదం సంభవించింది. అపార్ట్‌మెంట్‌లోని 12వ అంతస్తులో ఉన్న ఓ ఫ్లాట్‌లో అకస్మాత్తుగా మంటలు చెలరేగడంతో స్థానికులు తీవ్ర భయాందోళనలకు గురయ్యారు. స్థానికులు చెప్పిన వివరాల ప్రకారం.. మొదట ఫ్లాట్‌లో నుంచి పొగలు రావడం గమనించిన నివాసితులు వెంటనే అపార్ట్‌మెంట్ నిర్వహణ సిబ్బందికి సమాచారం అందించారు. కొద్ది నిమిషాల్లోనే మంటలు వేగంగా వ్యాపించి భవనం పైభాగం నుంచి భారీగా పొగలు ఎగసిపడ్డాయి. దట్టమైన నల్లటి పొగ పరిసర ప్రాంతాలను కమ్మేయడంతో అపార్ట్‌మెంట్‌లోని ఇతర ఫ్లాట్లలో నివసిస్తున్న వారిని అప్రమత్తం చేసి బయటకు తరలించారు.

సమాచారం అందుకున్న అగ్నిమాపక శాఖ సిబ్బంది పలువురు ఫైర్ ఇంజిన్లతో ఘటనాస్థలికి చేరుకుని మంటలను అదుపులోకి తెచ్చేందుకు తీవ్రంగా శ్రమిస్తున్నారు. ఎత్తైన భవనం కావడంతో సహాయక చర్యలు మరింత క్లిష్టంగా మారినట్లు అధికారులు తెలిపారు. భవనంలో చిక్కుకున్న వారిని సురక్షితంగా బయటకు తీసుకురావడానికి ప్రత్యేక చర్యలు చేపట్టారు. ఇటీవల ఢిల్లీలోని మాలవీయ నగర్‌లో జరిగిన అగ్నిప్రమాదం దేశవ్యాప్తంగా సంచలనం సృష్టించిన సంగతి తెలిసిందే. ఆ ఘటనలో పలువురు ప్రాణాలు కోల్పోగా, అగ్నిమాపక భద్రతా ప్రమాణాలపై తీవ్ర చర్చ జరిగింది. ఆ ఘటనపై విచారణ కొనసాగుతుండగానే నోయిడాలో మరో అగ్నిప్రమాదం చోటుచేసుకోవడం ఆందోళన కలిగిస్తోంది.

ప్రస్తుతం మంటలు చెలరేగడానికి గల ఖచ్చితమైన కారణాలు ఇంకా తెలియరాలేదు. షార్ట్‌సర్క్యూట్ లేదా ఇతర సాంకేతిక లోపాల వల్ల ప్రమాదం జరిగి ఉండవచ్చని అధికారులు అనుమానిస్తున్నారు. ఈ ఘటనలో ఎవరైనా గాయపడ్డారా లేదా ప్రాణనష్టం సంభవించిందా అనే విషయాలపై ఇంకా అధికారిక ప్రకటన వెలువడలేదు. ప్రమాదానికి సంబంధించిన పూర్తి వివరాలు తెలియాల్సి ఉంది.

మరిన్ని జాతీయ వార్తల కోసం ఇక్కడ క్లిక్ చేయండి