శ్రీరామనవమి

శ్రీరామచంద్రుడు మానవుడు దేవుడిగా మారి భక్తుల మదిలో కొలువై పూజలను అందుకున్నాడు. ఆసేతు హిమాచలం రామాలయం లేని వీధి ఉండదు అంటే అతిశయోక్తి కాదు. తెలుగు వారు మాత్రమే కాదు ప్రపంచంలో ఉన్న ప్రతి హిందువూ శ్రీ రాముడిని తమ ఇలవేల్పుగా కొలుస్తుంది. శ్రీరాముడు త్రేతాయుగంలో వసంత ఋతువు చైత్ర శుద్ధ నవమి, గురువారము రోజు పునర్వసు నక్షత్రంలో అభిజిత్ ముహూర్తంలో అంటే మధ్యాహ్మం 12 గంటల వేళలో జన్మించినాడని నమ్మకం. అంతేకాదు ఈ రోజు సీతారాముల కళ్యాణం జరిగిందని.. శ్రీరాముడు రావణ సంహారం అనంతరం సీతా సమేతంగా అయోధ్యలో పట్టాభిషిక్తుడైన రోజు చైత్ర శుద్ధ నవమి అని నమ్మకం. అందుకనే ప్రతి ఏడాది చైత్ర శుక్లపక్ష నవమిని గొప్ప పండగగా జరుపుకుంటారు.

శ్రీరామ నవమి పండుగ రోజున అయోధ్యలో బాల రామయ్యకు జన్మ దిన వేడుకలను నిర్వహిస్తారు. రాముడంటే ఒకటే మాట, ఓకే బాణం..రాముడంటే సీతకు ప్రాణం.. ఒక్క మాటలో చెప్పాలంటే ఇదే రామాయణం. లోక కళ్యానమే శ్రీ సీతా రాముల కళ్యానం అంటూ యావత్ భరతం అంటే పట్టణం, పల్లెలు అనే తేడా లేకుండా శ్రీ సీతారాముల కళ్యాణ మహోత్సవాన్ని వైభవంగా జరుపుకుంటారు. ఈ ఏడాది అంటే శ్రీ విశ్వావసు నామ సంవత్సరంలో చైత్రమాస శుద్ధ నవమి రోజున అంటే 06వ తేదీ ఏప్రిల్ 2025 ఆదివారంన శ్రీ రామ నవమి వేడుకలను జరుపుకోనున్నారు.

ఇప్పటికే శ్రీ రామ నవమి సందడి మొదలైంది. పందిళ్ళు రెడీ అవుతున్నాయి. దేవాలయాలు ముస్తాబవుతున్నాయి. సీతారాముల కల్యాణం చూడడానికి భక్తులు ఆసక్తిగా ఎదురు చూస్తున్నారు. ఈ రోజున చలిమి పానకం ప్రసాదంగా భక్తులకు పంపిణీ చేస్తారు.