LPG సిలిండర్ పేరుతో కొత్త మోసం! తొందరపడ్డారో తీవ్రంగా నష్టపోతారు!

దేశవ్యాప్తంగా వంట గ్యాస్‌కు డిమాండ్ పెరుగుతున్న నేపథ్యంలో కొత్త రకమైన ఆన్‌లైన్ మోసాలు వెలుగులోకి వస్తున్నాయి. LPG సిలిండర్ కొరత పరిస్థితిని అవకాశంగా తీసుకున్న మోసగాళ్లు ఇప్పుడు అమాయక ప్రజలను లక్ష్యంగా చేసుకుని కొత్త స్కామ్‌కు పాల్పడుతున్నారు. ఇప్పుడే చెల్లించండి.. రేపే గ్యాస్ డెలివరీ అనే పేరుతో వాట్సాప్, SMSలు, సోషల్ మీడియా ద్వారా సందేశాలు పంపుతూ ప్రజలను మోసం చేస్తున్న ఘటనలు పెరుగుతున్నాయని సైబర్ నిపుణులు హెచ్చరిస్తున్నారు.

ఈ మోసంలో భాగంగా స్కామర్లు ప్రముఖ గ్యాస్ కంపెనీల పేర్లు, లోగోలు ఉపయోగించి నకిలీ ప్రకటనలు రూపొందిస్తున్నారు. ముఖ్యంగా ఇండియన్‌, భారత్‌ గ్యాస్‌, హెచ్‌పీ గ్యాస్‌ వంటి కంపెనీల పేర్లను ఉపయోగించి సందేశాలు పంపుతూ ప్రజలను నమ్మించే ప్రయత్నం చేస్తున్నారు. ఈ సందేశాల్లో ఒక లింక్‌ను జత చేసి, దానిపై క్లిక్ చేసి ముందుగా చెల్లింపు చేయాలని సూచిస్తారు. లింక్‌పై క్లిక్ చేసిన తర్వాత వినియోగదారులను నకిలీ వెబ్‌సైట్‌కు తీసుకెళ్తారు. అక్కడ గ్యాస్ బుకింగ్ పేరుతో చెల్లింపు వివరాలు, బ్యాంక్ సమాచారం, UPI వివరాలు అడుగుతారు. ప్రజలు నిజమని నమ్మి డబ్బు చెల్లిస్తే ఆ మొత్తం నేరుగా మోసగాళ్ల ఖాతాలకు వెళ్లిపోతుంది. తర్వాత గ్యాస్ సిలిండర్ డెలివరీ జరగదు, అలాగే ఆ వెబ్‌సైట్ కూడా కనిపించకుండా పోతుంది.

గ్యాస్ సరఫరా సమస్యల కారణంగా చాలా మంది త్వరగా సిలిండర్ పొందాలనే ఆలోచనలో ఉండటంతో ఈ మోసాలకు సులభంగా బలవుతున్నారు. అయితే ప్రధాన గ్యాస్ కంపెనీలు ఇప్పటికే ఈ విషయంపై హెచ్చరికలు జారీ చేశాయి. యాదృచ్ఛిక లింక్‌లు, SMSలు లేదా సోషల్ మీడియా ద్వారా ఎలాంటి ముందస్తు చెల్లింపులు కోరబోమని స్పష్టం చేశాయి. నిపుణుల సూచనల ప్రకారం LPG సిలిండర్‌ను ఎప్పుడూ అధికారిక వెబ్‌సైట్ లేదా అధికారిక మొబైల్ యాప్ ద్వారానే బుక్ చేసుకోవాలి. తెలియని లింక్‌లపై క్లిక్ చేయడం, అనుమానాస్పద వెబ్‌సైట్‌లలో బ్యాంక్ లేదా UPI వివరాలు నమోదు చేయడం వంటి చర్యలను పూర్తిగా నివారించాలి. అలాగే OTP, UPI పిన్, బ్యాంకింగ్ వివరాలను ఎవరితోనూ పంచుకోకూడదు.

ఏదైనా అనుమానాస్పద సందేశం లేదా కాల్ వచ్చినట్లయితే వెంటనే అప్రమత్తంగా ఉండాలని నిపుణులు సూచిస్తున్నారు. ఒకవేళ ఇలాంటి మోసానికి గురైతే వెంటనే భారత సైబర్ క్రైమ్ హెల్ప్‌లైన్ 1930 కు ఫోన్ చేసి ఫిర్యాదు చేయాలని అధికారులు సూచిస్తున్నారు. వేగంగా స్పందిస్తే డబ్బు తిరిగి పొందే అవకాశాలు కూడా పెరుగుతాయని వారు చెబుతున్నారు.

మరిన్ని టెక్‌ వార్తల కోసం ఇక్కడ క్లిక్‌ చేయండి