శ్రీ కృష్ణాష్ట‌మి

శ్రావణ మాసం జరుపుకునే పండగలలో శ్రీ కృష్ణాష్ట‌మికి విశిష్టమైన స్థానం ఉంది. ఈ రోజు ప్రపంచానికి సకల ధర్మాలను తెలియజేస్తున్న భగవద్గీతను అందజేసిన శ్రీ కృష్ణుడి జన్మదినం. దీనినే గోకులాష్టమి అని కూడా అంటారు. కృష్ణ పక్షం అష్టమి తిథి, రోహిణి నక్ష్తత్రం లగ్నలో అర్ధరాత్రి దేవకి-వసుదేవుడు దంపతులకు కృష్ణుడు జన్మించాడు. ఈ రోజు అత్యంత పర్వదినం..ఈ రోజున బాల కృష్ణుడిని పూజించడం వలన సకల శుభాలు కలుగుతాయని నమ్మకం. సంతానం లేని దంపతులు గోపాలున్ని పూజిస్తే సంతానప్రాప్తి లభిస్తుందని విశ్వాసం. అందుకనే శ్రీకృష్ణాష్ట‌మి వస్తోందంటే చాలు దేశ వ్యాప్తంగా సందడి నెలకొంటుంది. ఈ పండగ అంటే సందడి అంతా పిల్లలదే అని చెప్పవచ్చు. శ్రీకృష్ణుడి రూపంలో సందడి చేస్తారు.

దేవకీ గర్భాన జన్మించి.. యశోద ఇంటి పెరిగిన చిన్ని కృష్ణుడు వెన్న దొంగగా అందరి మనసుని దోచుకున్నాడు. చిలిపి చేష్టలతో జీవిత పరమార్థాన్ని చెప్పాడు. గోప బాలకుడిగా, సోదరునిగా, అసురసంహారిగా, ధర్మసంరక్షకుడిగా.. దుష్ట శిక్షణ.. శిష్ట రక్షణ కోసం లోక కల్యాణం ఆయుధం పట్టకుండా కురుక్షేత్రాన్ని నడిపించిన కృష్ణుడి జన్మాష్టమి అందరికీ ఇష్టమైన పండగ. అల్లరి కృష్ణయ్య.. అందరికీ ఇష్టమైన కన్నయ్య జన్మదినోత్సవాన్ని ఈ ఏడాది ఆగష్టు 16వ తేదీ శనివారం జరుపుకోనున్నారు.