Khammam: బైక్‌ను ఢీ కొట్టిన కారు.. భర్తతో కలిసి సినిమాకి వెళ్తూ మృతి చెందిన నవ వధువు
సరదాగా సినిమా చూద్దామని భావించిన ఈ దంపతులు రాత్రి ద్విచక్ర వాహనం బుల్లెట్‌పై సినిమా చూసేందుకు మధిరకి బయలుదేరారు. ఈ క్రమంలో ఎదురుగా వస్తున్న కారు వీరి బైకును ఢీ కొట్టింది. ఈ ప్రమాదంలో సంధ్య తీవ్రంగా గాయపడింది.
Updated on: Jun 18, 2023 | 9:59 AM
ఇటీవలే వివాహం చేసుకొని కొత్త జీవితంలోకి అడుగుపెట్టింది. ఎన్నో కలలు కన్న తన వైవాహిక జీవితాన్ని పండించుకోడానికి అత్తింట్లో అడుగుపెట్టింది. భర్త, అత్తమామలు అందమైన కుటుంబం అంతా బాగానే ఉంది అనుకునే సమయంలో విధి.. ఆ యువతిని మృత్యు రూపంలో వెక్కిరించింది. ప్రమాద రూపంలో ప్రాణాలను మింగేసింది. సరదాగా భర్తతో కలసి సినిమాకు వెళ్తూ ప్రమాదానికి గురై ప్రాణాలను పోగొట్టుకుంది నవ వధువు. కారు ప్రమాదంలో గాయపడి అక్కడికక్కడే మృతి చెందింది. ఈ విషాధ ఘటన ఉమ్మడి ఖమ్మం జిల్లాలో చోటుచేసుకుంది. వివరాల్లోకి వెళ్తే..
ఖమ్మం పట్టణ శివారు టేకులపల్లి కి చెందిన సంధ్యకు ఐదు నెలల క్రితమే పెళ్లి అయింది. సంధ్య తన భర్తతో కలిసి నందిగామ మండలం కొంతమత్కూరులోని బంధువుల ఇంటికి వచ్చారు. అక్కడ సరదాగా సినిమా చూద్దామని భావించిన ఈ దంపతులు రాత్రి ద్విచక్ర వాహనం బుల్లెట్‌పై సినిమా చూసేందుకు మధిరకి బయలుదేరారు. ఈ క్రమంలో ఎదురుగా వస్తున్న కారు వీరి బైకును ఢీ కొట్టింది. ఈ ప్రమాదంలో సంధ్య తీవ్రంగా గాయపడింది. తలకి బలమైన గాయం కావడంతో సంఘటనా స్థలంలోనే ఆమె మృతి చెందింది. సంధ్య భర్తకు స్వల్ప గాయాలయ్యాయి. ఐదు నెలల క్రితమే పెళ్ళై కొత్త జీవితాన్ని మొదలు పెట్టిన సంధ్య.. ఇంతలోనే రోడ్డు ప్రమాదంలో మృతి చెందటంతో ఇరు కుటుంబంలో విషాదఛాయలు అలముకున్నాయి. పోలీసులు కేసు నమోదు చేసి మృతదేహానికి పోస్ట్ మార్టం నిమిత్తం ప్రభుత్వ ఆస్పత్రికి తరలించి దర్యాప్తు చేస్తున్నారు.
మరిన్ని తెలంగాణ వార్తల కోసం ఇక్కడ క్లిక్ చేయండి..
