Sunny Leone: సన్నీ లియోన్ 16 కోట్ల లగ్జరీ ఇల్లు చూశారా? ముంబై నడిబొడ్డున అద్భుతమైన పెంట్‌హౌస్

అయితే తాజాగా ప్రముఖ దర్శకురాలు ఫరా ఖాన్ తన ‘ఫన్ విత్ ఫరా’ షో కోసం సన్నీ నివాసానికి వెళ్లారు. అక్కడ సన్నీ తన వ్యక్తిగత జీవితం, అందమైన ఇల్లు మరియు తన పిల్లల గురించి పంచుకున్న ఆసక్తికర విశేషాలేంటో తెలుసుకుందాం..

ఆమె ఒక అంతర్జాతీయ నటి.. ఒక విజయవంతమైన పారిశ్రామికవేత్త. ముంబైలోని అంధేరీలో ఆమెకు 16 కోట్ల రూపాయల విలువైన ఒక అందమైన పెంటౌస్ ఉంది. గత 15 ఏళ్లుగా తన భర్త డానియల్ వెబర్, ముగ్గురు పిల్లలతో కలిసి ఆమె అక్కడే నివసిస్తున్నారు. బయట ప్రపంచానికి ఆమె జీవితం చాలా రంగులమయంగా కనిపిస్తుంది, కానీ ఆ అందమైన గోడల వెనుక ఒక తల్లిగా ఆమె అనుభవించిన వేదన, కన్నీళ్లు ఎవరికీ తెలియవు. ఫరా ఖాన్ తో జరిపిన సంభాషణలో సన్నీ తన జీవితంలోని అత్యంత విషాదకరమైన క్షణాలను పంచుకున్నారు.

సన్నీ లియోన్ ‘కలల సౌధం’..

ముంబైలోని సన్నీ నివాసంలో అడుగుపెట్టగానే అద్దాలతో అలంకరించిన గ్రాండ్ ఎంట్రన్స్ లాబీ కనిపిస్తుంది. నలుపు మరియు తెలుపు రంగుల టైల్స్ తో ఈ ఇల్లు ఎంతో క్లాసీగా ఉంటుంది. లివింగ్ రూమ్ అంతా ఓపెన్ ఫ్లోర్ ప్లాన్ తో ఉండి, డైనింగ్ స్పేస్ తో కలిసిపోయి ఉంటుంది. ఇంటి లోపల ఉన్న పెయింటింగ్స్ మరియు కళాఖండాల్లో కొన్ని ఆమె ప్రపంచవ్యాప్తంగా సేకరించినవి కాగా, మరికొన్ని తన పిల్లలతో కలిసి స్వయంగా తయారు చేసినవి. నేపాల్ నుండి తెచ్చిన బుద్ధుడి పెయింటింగ్, పిల్లలతో కలిసి వేసిన న్యూయార్క్ స్కైలైన్ పెయింటింగ్ వంటివి ఈ ఇంటికి ఒక ప్రత్యేకమైన అనుభూతిని ఇస్తాయి.

ఐవీఎఫ్ ప్రయాణం

పిల్లల గురించి మాట్లాడుతున్నప్పుడు సన్నీ ఎంతో ఎమోషనల్ అయ్యారు. తల్లి కావాలనే కోరికతో ఐవీఎఫ్ (IVF) పద్ధతిని ఎంచుకున్నప్పుడు.. దురదృష్టవశాత్తు నలుగురు ఆడపిల్లలను కోల్పోయినట్లు ఆమె వెల్లడించారు. “అది నా మనసును ముక్కలు చేసిన సంఘటన” అంటూ ఆమె ఆవేదన వ్యక్తం చేశారు. ఫరా ఖాన్ కూడా తనకు రెండుసార్లు ఐవీఎఫ్ విఫలమైందని గుర్తుచేసుకున్నారు. ఆ బాధాకరమైన ప్రయాణం తర్వాతే సన్నీ దంపతులు నిషాను దత్తత తీసుకోవాలని నిర్ణయించుకున్నారు. నిషా దత్తత తీసుకున్న బిడ్డ అనే విషయాన్ని తాము ముందుగానే ఆమెకు చెప్పామని సన్నీ తెలిపారు.

సన్నీ పదేళ్ల కుమార్తె నిషా అప్పుడే ఒక ఆవిష్కర్తగా గుర్తింపు తెచ్చుకుంది. ఆమె ‘బూబాక్స్’ (Boobox) అనే వినూత్నమైన వస్తువును కనిపెట్టింది. ఇది ఒక టిష్యూ బాక్స్, దానికి అనుబంధంగా ఒక డస్ట్‌బిన్ ఉంటుంది, దీనివల్ల వాడిన టిష్యూలను వెంటనే పారేయడం సులభం అవుతుంది. ఈ ఆలోచనకు పేటెంట్ కూడా లభించిందని, తన కూతురు దీని ద్వారా డబ్బు కూడా సంపాదిస్తోందని సన్నీ గర్వంగా చెప్పుకొచ్చారు.

అదిరిపోయే కిచెన్​..

దర్శకురాలు ఫరా ఖాన్ సన్నీ ఇంటి కిచెన్ చూసి అబ్బురపడ్డారు. తెలుపు రంగులో ఉండే విశాలమైన ఈ కిచెన్ లాస్ ఏంజిల్స్ లోని ఇళ్ల తరహాలో ఉంటుందని ఆమె కితాబిచ్చారు. అలాగే పచ్చదనంతో నిండిన విశాలమైన బాల్కనీ డెక్ కూడా ఈ ఇంటికి ప్రధాన ఆకర్షణ. ఆహ్లాదకరమైన వాతావరణంలో సేద తీరడానికి ఇది ఒక చక్కని ప్రదేశం. గ్లామర్ లోకంలో ఎంత బిజీగా ఉన్నా, సన్నీ లియోన్ తన ఇంటిని మరియు పిల్లలను ఎంత జాగ్రత్తగా చూసుకుంటారో ఈ ఎపిసోడ్ ద్వారా అర్థమవుతుంది. కష్టాలను ఎదుర్కొని నిలబడిన ఆమె ప్రయాణం ఎందరికో స్ఫూర్తిదాయకం.