Rohit – Virat : విరాట్ కోహ్లీ, రోహిత్ శర్మలు ఎందుకు గుడ్బై చెప్పారు? ఆస్ట్రేలియాతో భారత్ తదుపరి వన్డే సిరీస్ ఎప్పుడో తెలుసా ?
భారత్ మూడో వన్డేలో ఆస్ట్రేలియాను ఓడించి, సిరీస్ను విజయంతో ముగించింది. ఈ వన్డే సిరీస్ను ఆస్ట్రేలియా 2-1 తేడాతో గెలుచుకున్నప్పటికీ, మూడో వన్డేలో టీమిండియా సాధించిన విజయం అభిమానుల మనసులను గెలుచుకుంది. భారత్ విజయంలో విరాట్ కోహ్లీ, రోహిత్ శర్మలు కీలక పాత్ర పోషించారు.
Updated on: Oct 26, 2025 | 11:29 AM
Rohit – Virat : భారత్ మూడో వన్డేలో ఆస్ట్రేలియాను ఓడించి, సిరీస్ను విజయంతో ముగించింది. ఈ వన్డే సిరీస్ను ఆస్ట్రేలియా 2-1 తేడాతో గెలుచుకున్నప్పటికీ, మూడో వన్డేలో టీమిండియా సాధించిన విజయం అభిమానుల మనసులను గెలుచుకుంది. భారత్ విజయంలో విరాట్ కోహ్లీ, రోహిత్ శర్మలు కీలక పాత్ర పోషించారు. ఈ ఇద్దరు స్టార్ ఆటగాళ్ల మధ్య 168 పరుగుల అద్భుత భాగస్వామ్యం నెలకొంది. రోహిత్ శర్మ 125 బంతుల్లో 121 పరుగులు చేసి నాటౌట్గా నిలిచాడు. విరాట్ కోహ్లీ 81 బంతుల్లో 74 పరుగులతో నాటౌట్గా రాణించాడు. అయితే, సిడ్నీలో జరిగిన ఈ మ్యాచ్ తర్వాత విరాట్-రోహిత్లు ఆస్ట్రేలియాకు వీడ్కోలు పలికారు.
రోహిత్ శర్మ, విరాట్ కోహ్లీ టెస్ట్, టీ20 అంతర్జాతీయ క్రికెట్ నుండి ఇప్పటికే రిటైర్మెంట్ ప్రకటించారు. భారత క్రికెట్ జట్టుకు చెందిన ఈ ఇద్దరు స్టార్ ఆటగాళ్లు ఇప్పుడు కేవలం వన్డే క్రికెట్ మాత్రమే ఆడుతున్నారు. ఈ నేపథ్యంలో రోహిత్, విరాట్లకు ఇది ఆస్ట్రేలియాలో క్రికెటర్లుగా చివరి పర్యటన కావచ్చని భావిస్తున్నారు. మూడో వన్డేలో టీమిండియాను గెలిపించిన తర్వాత విరాట్, రోహిత్ ఇద్దరూ స్టేడియానికి వచ్చిన ఆస్ట్రేలియా అభిమానులకు ధన్యవాదాలు తెలిపారు. ఇది వారి చివరి పర్యటన అనే అనుమానాలకు మరింత బలం చేకూర్చింది.
భారత్, ఆస్ట్రేలియా మధ్య 2027 ప్రపంచకప్ వరకు ఇకపై ఎలాంటి వన్డే సిరీస్ జరగదు. భారత క్రికెట్ జట్టుకు తదుపరి వన్డే ప్రపంచకప్ వరకు షెడ్యూల్ ఇప్పటికే ఖరారైంది. రోహిత్ శర్మ, విరాట్ కోహ్లీలు వన్డే ప్రపంచకప్ 2027 తర్వాత రిటైర్మెంట్ ప్రకటించే అవకాశం ఉంది. అలాంటప్పుడు విరాట్, రోహిత్లు తదుపరి వన్డే సిరీస్ కోసం ఆస్ట్రేలియాకు రావడం చాలా కష్టమని చెప్పవచ్చు. అంటే సిడ్నీ వన్డే వారి ఆస్ట్రేలియా పర్యటనలలో చివరిది కావచ్చు.
ఆస్ట్రేలియాలో తన అనుభవం గురించి రోహిత్ శర్మ మాట్లాడుతూ, “సిడ్నీలో ఆడటం నాకు చాలా ఇష్టం. నాకు 2008 నాటి జ్ఞాపకాలు గుర్తుకొచ్చాయి, అవన్నీ చాలా బాగున్నాయి” అని అన్నాడు. రోహిత్ ఇంకా కొనసాగిస్తూ.. “మేము క్రికెటర్లుగా మళ్ళీ ఇక్కడ ఆడగలమో లేదో నాకు తెలియదు, కానీ ఈ రోజు ఇక్కడ ప్రతి క్షణాన్ని నేను ఆస్వాదించాను” అని చెప్పాడు.
విరాట్ కోహ్లీ కూడా ఆస్ట్రేలియా అభిమానులకు కృతజ్ఞతలు తెలుపుతూ, “మేము 2013 నుండి ఇక్కడ మొదలుపెట్టినట్లు నాకు అనిపిస్తుంది. నాకు ఈ దేశానికి వచ్చి ఆడటం చాలా ఇష్టం, మేము ఇక్కడ చాలా ఎక్కువ క్రికెట్ ఆడాము. ఇక్కడ ఈ మైదానంలో ఆస్ట్రేలియా ప్రేక్షకుల నుండి మాకు ఎల్లప్పుడూ మద్దతు లభిస్తుంది” అని అన్నాడు.
మరిన్ని క్రికెట్ వార్తల కోసం ఇక్కడ క్లిక్ చేయండి..
