సాధారణంగా మార్కెట్లో పచ్చ ద్రాక్ష ఎక్కువగా కనిపిస్తూ ఉండడంతో చాలామంది దానిని తింటూ ఉంటారు. అయితే, పచ్చ ద్రాక్షతో పోలిస్తే నల్ల ద్రాక్షలో ఎక్కువ పోషకాలు, అదనపు ఆరోగ్య ప్రయోజనాలు ఉన్నాయని నిపుణులు చెబుతున్నారు. అందుకే పచ్చ ద్రాక్షకు బదులుగా అప్పుడప్పుడు నల్ల ద్రాక్షను మీ ఆహారంలో చేర్చుకోవడం చాలా మంచిదని సూచిస్తున్నారు.
ద్రాక్షలో సాధారణంగా యాంటీ ఆక్సిడెంట్లు, ఖనిజాలు, విటమిన్లు పుష్కలంగా ఉంటాయి. నల్ల ద్రాక్షలో ఈ పోషకాల మొత్తం మరింత ఎక్కువగా అందుతాయి. ముఖ్యంగా పచ్చ ద్రాక్షతో పోలిస్తే నల్ల ద్రాక్షలో పొటాషియం, మెగ్నీషియం, కాల్షియం, విటమిన్ సి వంటివి అధికంగా లభిస్తాయి. నల్ల ద్రాక్ష తెలివితేటలను పెంపొందించడంలో సహాయపడుతుంది. అల్జీమర్స్ వ్యాధితో బాధపడేవారు వీటిని తప్పకుండా తినాలని వైద్యులు సలహా ఇస్తున్నారు.
నల్ల ద్రాక్ష రక్తంలో నైట్రిక్ ఆక్సైడ్ స్థాయిని పెంచుతుంది. ఇది రక్తనాళాల్లో ఏర్పడే అడ్డంకులను తొలగించి, రక్తం సజావుగా ప్రవహించేలా చేస్తుంది. ఫలితంగా గుండెపోటు వచ్చే అవకాశాలు గణనీయంగా తగ్గుతాయి. యాంటీ ఆక్సిడెంట్లు ఎక్కువ ఉండటం, గుండె ఆరోగ్యం, మెదడు పనితీరుకు మద్దతు ఇవ్వడం వంటి కారణాల వల్ల పచ్చ ద్రాక్షతో పోలిస్తే నల్ల ద్రాక్షకు ప్రత్యేక స్థానం ఉందని వైద్య నిపుణులు స్పష్టం చేస్తున్నారు.