Cricket: చరిత్ర సృష్టించిన 18 ఏళ్ల బౌలర్.. తొలి ప్రపంచకప్‌లో భారీ రికార్డ్.. అదేంటంటే?
ఐసీసీ మహిళల అండర్ -19 ప్రపంచ కప్ దక్షిణాఫ్రికాలో నిర్వహిస్తున్నారు. ఈ ప్రపంచకప్‌లో ఆతిథ్య దేశానికి చెందిన బౌలర్ హ్యాట్రిక్ సాధించిన తొలి బౌలర్‌గా నిలిచింది.
దక్షిణాఫ్రికాలో జరుగుతున్న ఐసీసీ మహిళల అండర్-19 ప్రపంచకప్‌లో సోమవారం ఆతిథ్య దేశానికి చెందిన బౌలర్ ఈ టోర్నీలో తొలి హ్యాట్రిక్ సాధించింది. సౌతాఫ్రికా జట్టుకు చెందిన మాడిసన్ లాండ్స్‌మన్ బెనోనిలోని విల్లోమోర్ పార్క్‌లో జరిగిన మ్యాచ్‌లో స్కాట్లాండ్ జట్టుపై ఈ రికార్డ్ నెలకొల్పింది. తన హ్యాట్రిక్‌తో స్కాట్లాండ్ జట్టును ఆలౌట్ చేయడంలో కీలక పాత్ర పోషించింది. దక్షిణాఫ్రికాకు 45 పరుగుల విజయాన్ని అందించింది.
ఈ మ్యాచ్‌లో దక్షిణాఫ్రికా జట్టు తొలుత బ్యాటింగ్ చేసింది. అయితే ఆ జట్టు పెద్దగా స్కోరు చేయలేకపోయింది. దీంతో ఆ జట్టు నిర్ణీత 20 ఓవర్లలో ఏడు వికెట్ల నష్టానికి 112 పరుగులు చేసింది. స్కాట్లాండ్ జట్టు 17 ఓవర్లలో 68 పరుగులకే కుప్పకూలింది.
15వ ఓవర్లో అద్భుత ప్రదర్శన..
15వ ఓవర్లో మాడిసన్ ఈ హ్యాట్రిక్ సాధించింది. ఈ ఓవర్ రెండో బంతికి మర్యమ్ ఫైసల్‌ను అవుట్ చేసింది. ఆమె కేవలం ఆరు పరుగులు మాత్రమే చేయగలిగింది. ఆ తర్వాత మూడో బంతికి నిమాహ్ ముయుయిర్‌కు పెవిలియన్ మార్గం చూపించింది. తర్వాతి బంతికి ఓర్లా మోంట్‌గోమెరీని అవుట్ చేసి హ్యాట్రిక్ పూర్తి చేసింది. ఐసీసీ తొలిసారిగా మహిళల విభాగంలో అండర్-19 ప్రపంచకప్‌ను నిర్వహిస్తోంది. ఇలాంటి పరిస్థితుల్లో మాడిసన్ ఈ టోర్నీ చరిత్రలో తొలి హ్యాట్రిక్ బౌలర్‌గా నిలిచింది.
నాలుగు ఓవర్లు బౌలింగ్ చేసి 16 పరుగులిచ్చి మొత్తం నాలుగు వికెట్లు పడగొట్టింది. హ్యాట్రిక్ తర్వాత ఆమె 17వ ఓవర్ చివరి బంతికి పెవిలియన్ దారి చూపి స్కాట్లాండ్ ఇన్నింగ్స్‌ను ముగించింది. దక్షిణాఫ్రికా తరపున అతనితో పాటు జెమా బోథా, సెస్నాయ్ నాయుడు చెరో రెండు వికెట్లు తీశారు. అయాండా హుల్బీ, కైలా రీనెకే ఒక్కో వికెట్ తీశారు.
నిరాశపరిచిన బ్యాటర్స్..
దక్షిణాఫ్రికా తొలి ఇన్నింగ్స్ ఆడినా పెద్ద స్కోరు చేయలేకపోయింది. ఆ టీంలో కైలా అత్యధికంగా 53 పరుగులు చేసింది. 49 బంతులు ఎదుర్కొని, ఐదు ఫోర్లు , ఒక సిక్స్ కొట్టింది. జెన్నా ఎవాన్స్ 22 పరుగులు చేసి నాటౌట్‌గా నిలిచింది. వీరిద్దరూ కాకుండా కేవలం ఇద్దరు ఆటగాళ్లు మాత్రమే రెండంకెల స్కోరుకు చేరుకోగలిగారు.
మరోవైపు, స్కాటిష్ బ్యాటర్స్ గురించి మాట్లాడితే జట్టులో కేవలం ముగ్గురు బ్యాటర్స్ మాత్రమే రెండంకెల స్కోరును అందుకోగలిగారు. ఎమ్మా వాల్‌సింగమ్ అత్యధికంగా 17 పరుగులు చేసింది. నైమా షేక్ 12 పరుగులు చేసి నాటౌట్‌గా నిలిచింది. అలిస్సా లిస్టర్ 10 పరుగులు మాత్రమే చేయగలిగింది. ఈ ముగ్గురు మినహా జట్టులోని మరే ఇతర బ్యాటర్స్ రెండంకెల స్కోరును అందుకోలేకపోయారు.
మరిన్ని క్రికెట్ వార్తల కోసం ఇక్కడ క్లిక్ చేయండి..
