Ranji Trophy: విరాట్ కోహ్లీ అవుట్ వెనుక బస్సు డ్రైవర్ మాస్టర్ ప్లాన్! చిన్న కథ కాదురా సామీ.!

12 సంవత్సరాల తర్వాత రంజీ ట్రోఫీలో పునరాగమనం చేసిన విరాట్ కోహ్లీకి ఆ మ్యాచ్ ఓ మరిచిపోలేని అనుభవంగా మారింది. ఢిల్లీ-రైల్వేస్ మధ్య జరిగిన ఈ మ్యాచ్‌లో, రైల్వేస్ పేసర్ హిమాన్షు సంగ్వాన్ తన అద్భుతమైన ఇన్-స్వింగర్‌తో విరాట్ కోహ్లీని కేవలం 6 పరుగులకే క్లీన్ బౌల్డ్ చేశాడు. ఈ సంఘటన క్రికెట్ ప్రపంచంలో పెద్ద చర్చనీయాంశంగా మారింది.

సంగ్వాన్ తన వికెట్ గురించి వివరించగా, ఆసక్తికరమైన విషయాలను బయటపెట్టాడు. అతని మాటల్లో, “మ్యాచ్‌కు ముందు, విరాట్ కోహ్లీ, రిషబ్ పంత్ ఢిల్లీ తరఫున ఆడతారని మాకు సమాచారం అందింది. అయితే, మ్యాచ్ ప్రత్యక్ష ప్రసారం అవుతుందని మాకు తొలుత తెలియలేదు. కానీ క్రమంగా ఆ విషయాన్ని తెలుసుకున్నాం. నేను రైల్వేస్ బౌలింగ్ దళానికి నాయకత్వం వహిస్తున్నాను. మా జట్టు సభ్యులందరూ నాకు ‘నీదే బాధ్యత! విరాట్ కోహ్లీని అవుట్ చేయాల్సింది నువ్వే!’ అని అన్నారు.

సంగ్వాన్ కేవలం తన సహచరులే కాకుండా, బస్సు డ్రైవర్ కూడా కోహ్లీ వికెట్ ఎలా తీయాలో సూచన ఇచ్చాడని చెప్పాడు. “మేము బస్సులో ప్రయాణిస్తున్నప్పుడు, మా బస్సు డ్రైవర్ నాతో చెప్పాడు – ‘నీకూ తెలుసు కదా! విరాట్ కోహ్లీకి నాల్గవ లేదా ఐదవ స్టంప్ లైన్‌లో బంతి వేయి, అప్పుడు అతను ఔట్ అవుతాడు!’ నేను ఆ మాటలు విన్నాను, కానీ నేను నా బలాలపై మాత్రమే దృష్టి పెట్టాలని నిర్ణయించుకున్నాను. చివరికి, నా బలాల ప్రకారమే బౌలింగ్ చేసి, కోహ్లీ వికెట్ తీసుకున్నాను” అని సంగ్వాన్ తెలిపాడు.

కోహ్లీని అవుట్ చేసిన తర్వాత అతని రియాక్షన్ గురించి సంగ్వాన్ మాట్లాడుతూ, “మా ఇన్నింగ్స్ ముగిసిన తర్వాత డ్రెస్సింగ్ రూమ్‌కి వెళ్తున్నాను. అదే సమయంలో విరాట్ కోహ్లీ మైదానానికి వస్తున్నాడు. ఆయుష్ బడోని కూడా అతనితో ఉన్నాడు. విరాట్ భయ్యా నన్ను చూసి స్వయంగా కరచాలనం చేసి, ‘చాలా బాగా బౌలింగ్ చేశావు!’ అని అన్నాడు. ఇది నాకు పెద్ద ప్రోత్సాహం. నేను లంచ్ బ్రేక్ సమయంలో అతనితో ఫోటో దిగాలని అనుకున్నాను, అందుకే ఢిల్లీ డ్రెస్సింగ్ రూమ్‌కి వెళ్లి ఫోటో తీసుకున్నా. నేను అతన్ని అవుట్ చేసిన అదే బంతిని అతనికి చూపించాను. అప్పుడు కోహ్లీ నవ్వుతూ, ‘ఓ తేరీ కి! మాజా ఆ గయా తుజే తో!’ (హా! నిజంగా సరదాగా ఉన్నది) అని సరదాగా అన్నాడు” అని సంగ్వాన్ గుర్తు చేసుకున్నాడు.

విరాట్ కోహ్లీ కేవలం 15 బంతులు ఆడి ఒకే ఒక్క బౌండరీతో 6 పరుగులు మాత్రమే చేయగలిగాడు. ఆ వికెట్ సంగ్వాన్ కెరీర్‌లో ఒక ముఖ్యమైన మైలురాయిగా నిలిచింది. ఈ వికెట్ వెనుక అతని కఠిన సాధన మాత్రమే కాకుండా, బస్సు డ్రైవర్ ఇచ్చిన చిన్న సలహా కూడా ఉండడం ఆసక్తికరంగా మారింది. విరాట్ కోహ్లీ లాంటి గ్రేట్ బ్యాటర్‌ను అవుట్ చేయడం సంగ్వాన్ కెరీర్‌లో ఓ గొప్ప గుర్తుగా నిలిచిపోతుందని అతను ఆనందంతో చెప్పాడు.

మరిన్ని క్రీడా వార్తల కోసం ఇక్కడ క్లిక్ చేయండి..