Fake Crickters: రేయ్ ఎవర్రా మీరంతా! కక్కుర్తిపడి క్రికెటర్లమంటూ ఫోజులు.. కట్ చేస్తే.. కటకటాల పాలు
మలేషియాలో 15 మంది బంగ్లాదేశ్ వ్యక్తులు తాము క్రికెటర్లమని చెప్పుకుని నకిలీ పత్రాలతో కౌలాలంపూర్ విమానాశ్రయంలో పట్టుబడ్డారు. క్రికెట్ టోర్నమెంట్ ఆహ్వానం చూపిస్తూ అధికారులను మోసం చేయాలని యత్నించారు. కానీ, వారి నకిలీ పత్రాలు గుర్తించిన ఇమ్మిగ్రేషన్ అధికారులు వారిని అరెస్ట్ చేసి 'నాట్ టు ల్యాండ్' (NTL) సర్టిఫికేట్ జారీ చేశారు. ఈ ఘటన అంతర్జాతీయంగా చర్చనీయాంశమై, భద్రతా వ్యవస్థలు మరింత కఠిన చర్యలు తీసుకోవాలని మలేషియా అధికారులు తెలిపారు.
Updated on: Mar 20, 2025 | 8:40 AM
ప్రపంచవ్యాప్తంగా రోజూ కొత్త కొత్త సంఘటనలు జరుగుతూనే ఉంటాయి. అయితే, కొన్ని సంఘటనలు అంతర్జాతీయంగా పెద్ద దుమారం రేపుతూ అందరి దృష్టిని ఆకర్షిస్తాయి. తాజాగా మలేషియాలో జరిగిన ఒక ఘటన ఇప్పుడు ప్రపంచ క్రికెట్ వర్గాల్లో కలకలం రేపుతోంది. బంగ్లాదేశ్కు చెందిన 15 మంది వ్యక్తులు తాము క్రికెటర్లమని చెప్పుకుని మలేషియాలోని కౌలాలంపూర్ అంతర్జాతీయ విమానాశ్రయంలో పట్టుబడి అరెస్టయ్యారు. ఈ 15 మంది వ్యక్తులు అంతర్జాతీయ క్రికెటర్ల మాదిరిగా క్రికెట్ జెర్సీలు ధరించి, క్రికెట్ టోర్నమెంట్ ఆహ్వానం పొందినట్లు నకిలీ పత్రాలు చూపించి అధికారులను మోసం చేయాలని ప్రయత్నించారు. వారు తమను తాము బంగ్లాదేశ్ జాతీయ క్రికెట్ జట్టు సభ్యులమని చెప్పుకుంటూ విమానాశ్రయంలో అనుమతులను పొందేందుకు ప్రయత్నించారు. కానీ, అధికారుల అనుమానాస్పద దృష్టికి ఈ బృందం చిక్కింది.
మార్చి 17న మలేషియా బోర్డర్ కంట్రోల్ అండ్ ప్రొటెక్షన్ ఏజెన్సీ ఈ వ్యక్తులను కౌలాలంపూర్ అంతర్జాతీయ విమానాశ్రయంలో గుర్తించి అరెస్టు చేసింది. వారి మోసం బహిరంగమయ్యాక, అధికారులు పూర్తి స్థాయిలో దర్యాప్తు ప్రారంభించారు. వారు చూపించిన క్రికెట్ టోర్నమెంట్ ఆహ్వానం పూర్తిగా నకిలీ అని తేలింది.
అంతేకాదు, ఈ వ్యక్తులు మార్చి 21 నుంచి 23 వరకు మలేషియాలో జరగబోయే క్రికెట్ టోర్నమెంట్లో పాల్గొనడానికి వచ్చామని చెప్పినా, ఆ తేదీల్లో అలాంటి ఈవెంట్ ఏదీ జరగడం లేదని అధికారులు నిర్ధారించారు.
అదనంగా, విమానాశ్రయంలో ఉన్న ‘గ్యారంటర్’ (అంటే వీరికి హామీ ఇచ్చిన వ్యక్తి) కూడా ఈ టోర్నమెంట్ గురించి ఏమీ తెలియదని ఒప్పుకున్నాడు. అతను కేవలం ఓ సంస్థ తరపున ప్రతినిధిగా మాత్రమే అక్కడ ఉన్నాడని చెప్పాడు. దీంతో వారి యత్నం పూర్తిగా బహిరంగమైపోయింది.
ఈ సంఘటన జరిగిన వెంటనే మలేషియా ఇమ్మిగ్రేషన్ అధికారులు ‘నాట్ టు ల్యాండ్’ (NTL) సర్టిఫికేట్ను ఈ 15 మంది వ్యక్తులకు జారీ చేశారు. సాధారణంగా ఈ సర్టిఫికేట్ తగిన డాక్యుమెంటేషన్ లేని వ్యక్తులకు లేదా క్రిమినల్ రికార్డు ఉన్నవారికి జారీ చేస్తారు.
ఈ వ్యవహారంపై మలేషియా అధికారికంగా ఒక ప్రకటన విడుదల చేసింది. “మార్చి 21 నుండి 23 వరకు మలేషియాలో ఎటువంటి క్రికెట్ టోర్నమెంట్ జరగదని మేము ధృవీకరించాం. తమను తాము క్రికెటర్లుగా పేర్కొన్న ఈ 15 మంది వ్యక్తులు పూర్తిగా నకిలీ సమాచారం ఇచ్చారని నిర్ధారించాం” అని వారు తెలిపారు.
ఈ ఘటన అంతర్జాతీయంగా చర్చనీయాంశమైంది. ఈ తరహా మోసాలను ఎదుర్కొనేందుకు భద్రతా వ్యవస్థలు మరింత కఠినమైన చర్యలు తీసుకోవాల్సిన అవసరం ఉందని మలేషియా అధికారులు స్పష్టం చేశారు. ఈ సంఘటన క్రికెట్ ప్రపంచాన్ని ఆశ్చర్యానికి గురిచేయడమే కాకుండా, వలస అక్రమ మార్గాలను వాడేందుకు కొత్త కొత్త మార్గాలు అన్వేషిస్తున్న ముఠాలపై కొత్త చర్చకు దారితీసింది.
మరిన్ని క్రీడా వార్తల కోసం ఇక్కడ క్లిక్ చేయండి..
