Ugadi Panchangam 2025: ఉగాది రోజున పంచాంగం ఎందుకు చూస్తారు..? చూడకపోతే ఏమైనా జరుగుతుందా..?

ఉగాది అంటే “యుగాది” అంటే కొత్త సంవత్సరపు ఆరంభం. ఉత్తర భారతదేశంలో ఇది దుర్గాదేవికి అంకితమైన తొమ్మిది రోజుల పండుగ అయిన చైత్ర నవరాత్రులతో సమానంగా జరుపుకుంటారు. ఈ సంవత్సరం ఉగాది మార్చి 30న వస్తుంది. హిందూ చాంద్రమాన క్యాలెండర్ ప్రకారం ఇది చైత్ర మాసంలో మొదటి రోజు. 12వ శతాబ్దానికి చెందిన భాస్కరాచార్యుడు ఉగాదిని కొత్త సంవత్సరానికి అంకితమైన తొలి రోజుగా గుర్తించాడు.

పంచాంగ శ్రవణం హిందూ సంప్రదాయంలో అత్యంత ముఖ్యమైన ఆచారం. భవిష్యత్తును అంచనా వేసే మార్గంగా దీన్ని పండితులు భావిస్తారు. పంచాంగం ద్వారా రాశుల ప్రభావం, వర్షపాతం, వ్యాపారం, ఆరోగ్యం, సమాజంపై వచ్చే మార్పులను తెలుసుకోవచ్చు. వచ్చే ఏడాది శుభశకునాలు, గ్రహ మార్పుల ప్రభావాలు, మనం పాటించాల్సిన జాగ్రత్తలను పండితులు వివరంగా తెలియజేస్తారు. గురు, శని, రాహు, కేతు వంటి గ్రహాల సంచారాలు మన జీవితంపై ఎలా ప్రభావం చూపుతాయో పంచాంగంలో వివరంగా చెప్పబడుతుంది.

కొన్నిసార్లు గ్రహ దోషాల నివారణ కోసం యజ్ఞయాగాదులు, దానధర్మాలు, ప్రత్యేక పూజలు చేయాల్సిన అవసరం ఉంటుందని పండితులు సూచిస్తారు. అంతేకాదు.. కొత్త సంవత్సరంలో పెళ్లిళ్లు, గృహప్రవేశాలు, ఇతర శుభకార్యాలకు ముహూర్తాలను తెలుసుకోవడానికి కూడా పంచాంగం ఎంతో ఉపయోగపడుతుంది.

హిందూ పంచాంగం అనేది ఖచ్చితమైన గణనాత్మక విధానం. దీనిలో పండుగలు, శుభ ముహూర్తాలు, రోజువారీ తిధులు, నక్షత్రాలు, యోగాలు వంటి అంశాలు ప్రాముఖ్యత పొందుతాయి. ఇది తిథి, నక్షత్రాలు, యోగాలు ఆధారంగా రూపొందించబడుతుంది.

ప్రతి సంవత్సరం ఉగాది పండుగ రోజున పండితులు పంచాంగాన్ని చదివి భవిష్య ఫలితాలను తెలియజేస్తారు. దీనిని వివరిస్తూ పండితులు చెప్పే శ్లోకం ఒక్కటి ఉంది..

శ్రీకల్యాణ గుణావహం రిపుహరం దుస్స్వప్న దోషాపహం గంగాస్నాన విశేష పుణ్య ఫలదం గోదాన తుల్యం నృణాం ఆయుర్ వృద్ధిదముత్తమం శుభకరం సంతాన సంపత్ ప్రదం నానాకర్మ సుసాధనం సముచితం పంచాంగమాకర్ణ్యతాం

ఈ శ్లోకం ప్రకారం పంచాంగ శ్రవణం వల్ల శుభ ఫలితాలు లభిస్తాయని, చెడు స్వప్నాలు, అనర్ధాలను తొలగించగలదని, గంగాస్నానం, గోదానం వంటి పుణ్య ఫలితాలను అందిస్తుందని నమ్మకం ఉంది. ఇది ఆయువును పెంచుతూ, శుభకార్యాలు, సంపదలను అందిస్తుందని విశ్వసిస్తారు. అంతేకాదు పంచాంగ శ్రవణానంతరం జ్యోతిష్కులు, పురోహితులను సత్కరించడం వల్ల మరింత శ్రేయస్సు కలుగుతుందని హిందూ సంప్రదాయం చెబుతోంది.

పంచాంగం ఐదు ప్రధాన అంశాల సమాహారం.

• రాశి
• నక్షత్రం
• తిథి
• యోగం
• కరణం

ఈ అంశాల ఆధారంగా రోజువారీ, వార్షిక కాలగణనలు రూపొందించబడతాయి.

పంచాంగ గణన రకాలు

• దృక్ పంచాంగం – ఇది ఖగోళ శాస్త్రాన్ని ఆధారంగా చేసుకుని ఖచ్చితమైన గణనలను చేస్తుంది.
• వాక్ పంచాంగం – ఇది గ్రహాల కదలికల ఆధారంగా భవిష్యత్తును అంచనా వేస్తుంది.

పంచాంగ శ్రవణం వల్ల శ్రీ మహావిష్ణువు, కాల పురుషుని ఆరాధన జరుగుతుంది. కాల పురుషుడు సమయాన్ని సూచించే శక్తిగా భావించబడతాడు. మన జీవితంలో ప్రతి క్షణం విలువైనదని గుర్తుచేసే సంప్రదాయమే పంచాంగ శ్రవణం.

కాలం మన జీవితంలో అత్యంత కీలకమైనది. మనం కాలాన్ని నియంత్రించలేం కానీ దానిని సద్వినియోగం చేసుకోవచ్చు. ప్రతి కర్మకు ఫలితం ఉంటుంది. కర్మ ఫలితాలను తగ్గించుకోవడానికి జపాలు, పూజలు, వ్రతాలు చేయడం అవసరం.

ఉగాది రోజు తినే పచ్చడిలోని షడ్రుచులు తీపి, చేదు, ఉప్పు, పులుపు మొదలైనవి.. మన జీవితంలో అన్ని అనుభవాలను సమానంగా అంగీకరించాల్సిన అవసరం ఉందని గుర్తు చేస్తాయి.

ఉగాది పంచాంగం వినడం వల్ల భవిష్యత్తును అంచనా వేసుకోవడం మాత్రమే కాకుండా.. శుభశకునాలను తెలుసుకోవచ్చు. ఏ పనులను ఎప్పుడు చేయాలో నిర్ణయించుకోవచ్చు. అనుకోని ఆటంకాలను తగ్గించుకునేందుకు పరిహారాలు పాటించవచ్చు. కాల పురుషుని ఆరాధన ద్వారా సమయాన్ని సమర్థవంతంగా వినియోగించుకోవచ్చు. అందుకే ఉగాది పండుగ రోజున పంచాంగ శ్రవణం చేయడం ఒక ముఖ్యమైన సంప్రదాయంగా కొనసాగుతోంది.