Love Story: కేరళలో వింత ప్రేమకథ.. పదేళ్లుగా ఒకే గదిలో.. పారిపోయిన యువతి.. ఆమె ఎక్కడ ఉందంటే..?

Kerala Love Story: కేరళలో వింత ప్రేమకథ వెలుగులోకి వచ్చింది. పదేళ్ల క్రితం బాలిక ఇంటినుంచి పారిపోయింది. అయితే ట్విస్ట్ ఏమిటంటే ఆ బాలిక ఇంటికి సమీపంలోనే ఓ యువకుడి ఇంట్లో నివసిస్తోంది. అయితే ఆమె నివసిస్తున్న సంగతి ఆ యువకుడి ఇంట్లో వారికి కూడా తెలీదు. ఈ వింత ప్రేమకథ కేరళలోని పాలక్కడ్‌ జిల్లా నెమ్మర పోలీస్‌స్టేషన్‌ పరిధిలో వెలుగులోకి వచ్చింది. అయిరూర్‌ గ్రామానికి చెందిన ఓ బాలిక (18) 2010 ఫిబ్రవరిలో ఇంటి నుంచి పారిపోయింది. గత పదేళ్లుగా ఆమె ఎక్కడుందో ఇంట్లోవాళ్లకు తెలియలేదు. ఆమెకోసం వెతికినా.. జాడ తెలియకపోవడంతో వారు ఆశలు వదులుకున్నారు. తీరా పదేళ్ల తర్వాత బయటపడ్డ విచిత్రం ఏమిటంటే.. ఆ బాలిక ఇంటికి సమీపంలో ఉన్న ఓ అబ్బాయి ఇంటి దగ్గరే ఆమె ఉంటోంది. ఇందులో మరో విశేషం ఎంటంటే.. ఆమె అక్కడున్న విషయం అబ్బాయి ఇంట్లోవారికి కూడా తెలియదు.

గత పదేళ్లుగా ఆ యువతి తాళం వేసి ఉన్న ఓ గదిలో నివసిస్తోంది. ఆమె ప్రేమికుడిగా చెబుతున్న యువకుడే యోగక్షేమాలు చూసుకునేవాడని నెమ్మర పోలీసులు తెలిపారు. ఆ గదిలో బాత్‌రూం కూడా లేదని.. గదికి ఉన్న ఓ కిటికీ ద్వారా రాత్రిపూట ఆమె బయటకు వచ్చి కాలకృత్యాలు తీర్చుకునేది. పగటిపూట ఆ కిటికీ కూడా మూసి ఉండేది. ఆమెకు ఆహారం, ఇతర సదుపాయాలన్నీ యువకుడు సమకూర్చేవాడు. తర్వాత బయటి నుంచి తాళం వేసే వాడు. ఇలా పదేళ్లు గడిచాయి. మూడు నెలల కిందట.. ఆ యువకుడు అదృశ్యమైనట్లు కుటుంబ సభ్యులు పోలీసులకు ఫిర్యాదు చేశారు.

దీంతో గత పదేళ్లుగా జరుగుతున్న తతంగం బయటపడింది. అద్యశ్యమైంది ఒకరు కాదు.. ప్రేమికులిద్దరూ అని పోలీసుల విచారణలో బయటపడింది. వారిద్దరూ కలిసి నెమ్మర సమీపంలోని కుగ్రామం విథాన్‌స్సెరీలో ఓ అద్దె ఇంట్లో కాపురం పెట్టారు. యువకుడి కుటుంబసభ్యుల ఫిర్యాదు మేరకు.. ఆ ఇద్దరినీ పోలీసులు అదుపులోకి తీసుకొని మంగళవారం కోర్టులో హాజరుపరిచారు. తాము కలిసి జీవించాలని అనుకొంటున్నట్లు యువతి కోర్టుకు తెలపడంతో ప్రేమికుడితో వెళ్లేందుకు ఆమెను న్యాయమూర్తి అనుమతిస్తూ ఉత్తర్వులిచ్చారు. అయితే ఈ నిర్ణయానికి ప్రేమికులిద్దరి కుటుంబసభ్యులు వ్యతిరేకించలేదని పోలీసులు తెలిపారు.

Also Read:

Seema Patil: ఆమె జీతం రూ.100 కోట్లు.. ట్రెండింగ్ కంపెనీలకు రోల్‌మోడల్.. జీరోధా కంపెనీ డైరెక్టర్

Fuel price today: తగ్గేదేలే..! దూసుకుపోతున్న పెట్రో ధరలు.. మళ్లీ పెరిగిన ఇంధన ధరలు..