Bombay High Court: విడాకులు తీసుకున్న భర్తకు భరణం ఇవ్వాల్సిందే.. బొంబాయి హైకోర్టు కీలక తీర్పు

భార్యాభర్తలు చట్టప్రకారం విడిపోయినప్పుడు భార్యకు భర్త భరణం(alimony) ఇవ్వడం చాలా కాలం నుంచి వస్తున్న పద్ధతి. అయితే ఈ విషయంలో బొంబాయి హైకోర్టు ఔరంగాబాద్​ బెంచ్ కీలక తీర్పు వెల్లడించింది. ఓ కేసులో భార్యే భర్తకు భరణం ఇవ్వాలని ఆదేశించింది. అంతేకాకుండా భరణం అంశంపై మహారాష్ట్రలోని(Maharashtra) నాందేడ్​ సివిల్​కోర్టు ఇచ్చిన తీర్పును సమర్థించింది. ఈ మేరకు సివిల్ కోర్టు తీర్పును సవాల్ చేస్తూ ఇచ్చిన పిటిషన్ ను కొట్టివేసింది.1992లో వివాహమైన ఓ జంట మధ్య విభేదాలు తలెత్తాయి. కుటుంబ కలహాలతో కలిసి ఉండలేమని భావించి విడాకులు కోరుతూ న్యాయస్థానాన్ని (Court) ఆశ్రయించారు. భర్త నుంచి విడాకులు ఇప్పించాలని 2015లో భార్య నాందేడ్​సివిల్ కోర్టును ఆశ్రయించింది. విచారణ చేపట్టిన కోర్టు వారికి అదే ఏడాది విడాకులు ఇచ్చింది. ఈ క్రమంలో హిందూ వివాహ చట్టం 1955లోని సెక్షన్​24, 25 ప్రకారం భార్య నుంచి శాశ్వత భరణం ఇప్పించాలని కోరుతూ ఆమె భర్త పిటిషన్​ వేశారు. తనకు జీవనాధారం ఏమీ లేదని, భార్య ప్రభుత్వ ఉద్యోగం చేస్తూ మంచి వేతనం తీసుకుంటున్నట్లు పిటిషన్​లో పేర్కొన్నారు. ఆమె ఆ స్థానంలో ఉండేందుకు తానెంతో కష్టపడ్డానని తెలిపారు. భర్త పిటిషన్​ను విచారించిన నాందేడ్​ సివిల్​ కోర్టు భరణం ఇవ్వాలని భార్యను ఆదేశించింది.

అయితే భర్తకు భరణం ఇవ్వాలంటూ నాందేడ్​సివిల్ కోర్టు ఇచ్చిన తీర్పును సవాల్ చేస్తూ ఔరంగాబాద్​హైకోర్టును ఆశ్రయించింది భార్య. విడాకులు మంజూరయ్యాక వారి బంధం ముగిసిపోయిందని, ఎలాంటి భరణం, ఖర్చులు ఇవ్వాల్సిన అవసరం లేదని పిటిషనర్​తరఫు న్యాయవాది కోర్టుకు తెలిపారు. హిందూ వివాహ చట్టంలోని సెక్షన్​25 ప్రకారం ఎప్పుడైనా భరణం కోరుతూ పిటిషన్​ వేయవచ్చని భర్త తరఫు న్యాయవాది తెలిపారు. ఇరువురి వాదనలు విన్న ధర్మాసనం.. భర్తకు భార్య భరణం ఇవ్వాలని తీర్పు వెల్లడించింది.

Also Read

Hyderabad Metro: సూపర్ సేవర్ కార్డు.. రూ.59తో రోజంతా ఎక్కడి నుంచి ఎక్కడికైనా తిరగొచ్చు

Srinivas Goud: మంత్రి శ్రీనివాస్ గౌడ్ హత్యకు కుట్ర కేసు మరో మలుపు.. నిందితులకు బెయిల్ మంజూరు చేసిన కోర్టు!

Shriya Saran: ఆర్ఆర్ఆర్‏లో చరణ్, తారక్ ఉన్నారని నాకు తెలీదు.. శ్రియా సరన్ ఆసక్తికర కామెంట్స్..