Lemon Coffee: నిమ్మకాయతో కాఫీ తాగడం వల్ల కొవ్వు కరుగుతుందా? ఈ వైరల్ రెసిపీలో నిజమెంతా..?

నేటి సోషల్ మీడియా యుగంలో రకరకాల ఆరోగ్య చిట్కాలు దర్శనిమిస్తుంటాయి. మీరు స్క్రోల్ చేస్తే, సగం నిమ్మకాయతో ఒక కప్పు బ్లాక్ కాఫీ తాగడం వల్ల బరువు తగ్గడం వేగవంతం అవుతుందని చెప్పే వీడియోలు మీకు కనిపించే ఉంటాయి. ఇది బొడ్డు కొవ్వును కరిగించడానికి, తక్షణమే జీవక్రియను పెంచడానికి సులభమైన, చవకైన మార్గంగా ప్రచారం చేస్తుంటారు. బరువు తగ్గడానికి ప్రయత్నిస్తున్న వారికి, ఈ సలహా చాలా ఆకర్షణీయంగా అనిపిస్తుంది. ఒక పానీయం దీర్ఘకాలిక సమస్యకు పరిష్కారిస్తుందని అనిపిస్తుంది. నిజంగా లెమన్ కాఫీ ఏమి చేస్తుంది?

కాఫీలో సహజ ఉద్దీపన అయిన కెఫిన్ ఉంటుంది. కెఫిన్ తాత్కాలికంగా జీవక్రియను వేగవంతం చేస్తుంది. శరీరానికి చురుకుదనాన్ని పెంచుతుంది. అయితే, కొంతమందిలో ఇది తాత్కాలికంగా ఆకలిని అణిచివేస్తుంది. తద్వారా వారు తక్కువ తినేలా చేస్తుంది. ఈ ప్రభావం శాశ్వతం కాదు. శరీరం క్రమంగా కెఫిన్‌కు అలవాటుపడి, దాని ప్రభావం తగ్గుతుంది. ఆహారం, వ్యాయామంలో మార్పులు లేకుండా కాఫీ తాగడం ద్వారా గణనీయమైన బరువు తగ్గడం అసంభవం.

బరువు తగ్గడానికి సహాయపడుతుందా?

నిమ్మకాయలో విటమిన్ సి, యాంటీఆక్సిడెంట్లు పుష్కలంగా ఉంటాయి. నీటితో కలిపి తాగడం వల్ల హైడ్రేషన్ మెరుగుపడుతుంది. జీర్ణక్రియకు సహాయపడుతుంది. ఇది రుచికరంగా కూడా ఉంటుంది. ప్రముఖ ఆరోగ్య సమాచార సంస్థ ప్రకారం, కాఫీలో నిమ్మకాయను జోడించడం వల్ల కొవ్వు వేగంగా కరుగుతుందని నిరూపించడానికి ఎటువంటి దృఢమైన శాస్త్రీయ ఆధారాలు లేవు. నిమ్మకాయను నీటిలో కలిపినా లేదా మరే ఇతర పానీయాలలో కలిపినా దాని లక్షణాలు అలాగే ఉంటాయి. నిమ్మకాయ నీరు లాగా, ఇది కడుపు నిండిన అనుభూతిని ఇస్తుంది. కడుపు నిండినట్లు అనిపించినప్పుడు, ఆకలి తగ్గుతుంది. ఇది కేలరీల తీసుకోవడం తగ్గిస్తుంది. కాఫీ ఆకలిని అణచివేయడంలో సహాయపడుతుంది. కానీ కాఫీ లేదా నిమ్మకాయతో మాత్రమే ఆరోగ్యకరమైన బరువు నియంత్రణ సాధ్యం కాదని వైద్య నిపుణులు చెబుతున్నారు.

అసలు నిమ్మకాయ కాఫీ అంటే ఏమిటి?

బ్లాక్ కాఫీలో సగం నిమ్మకాయ రసం కలిపి దీన్ని తయారు చేస్తారు. దీని రుచి అందరికీ నచ్చదు, అందుకే ఈ పానీయం సాధారణంగా కేఫ్ మెనూలలో కనిపించదు. కొన్ని సంస్కృతులలో, కూల్ కాఫీ, నిమ్మకాయల మిశ్రమాన్ని మజాగ్రాన్ అని పిలుస్తారు. ఇది అల్జీరియాలో ఉద్భవించింది. పోర్చుగల్‌లో ప్రసిద్ధి చెందింది. కానీ దీనిని బరువు తగ్గించే పరిష్కారంగా ప్రచారం మాత్రం చేయడం లేదు.

ఇది సురక్షితమేనా?

ఆరోగ్యకరమైన పెద్దలకు మితంగా తీసుకుంటే లెమన్ కాఫీ సురక్షితమైనదిగా కొందరు వైద్య నిపుణులు చెబుతున్నారు. అయితే, కాఫీ – నిమ్మకాయ రెండూ ఆమ్లంగా ఉంటాయని గుర్తుంచుకోండి. వాటిని కలిపి తీసుకోవడం వల్ల మిశ్రమం మరింత ఆమ్లంగా మారుతుంది. యాసిడ్, గ్యాస్ట్రిటిస్, యాసిడ్ రిఫ్లక్స్ లేదా దంత సమస్యలు ఉన్నవారికి అసౌకర్యం, గుండెల్లో మంట లేదా దంతాల ఎనామిల్ దెబ్బతినవచ్చు. ఖాళీ కడుపుతో తాగడం వల్ల ఈ లక్షణాలు మరింత తీవ్రమవుతాయంటున్నారు వైద్య నిపుణులు.

గమనిక: ఈ సమాచారం పరిశోధన అధ్యయనాలు మరియు నిపుణుల అభిప్రాయం ఆధారంగా రూపొందించబడింది. వైద్య సలహాకు ప్రత్యామ్నాయంగా ఉపయోగించవద్దు. ఏదైనా కొత్త కార్యాచరణ లేదా వ్యాయామం చేపట్టే ముందు ఎల్లప్పుడూ మీ వైద్యుడిని లేదా సంబంధిత నిపుణుడిని సంప్రదించండి.

మరిన్ని హెల్త్ వార్తల కోసం ఇక్కడ క్లిక్ చేయండి..