నెక్ట్స్‌ మూవీ ఆ టాప్‌ హీరోతోనే.. కన్ఫర్మ్ చేసిన పూరీ..!

ప్రస్తుతం విజయ్‌ దేవరకొండతో ఫైటర్ మూవీని తెరకెక్కిస్తున్నారు డేరింగ్ అండ్ డ్యాషింగ్ డైరక్టర్ పూరీ జగన్నాథ్‌. ఈ మూవీ తరువాత చిరంజీవితో గానీ, పవన్ కల్యాణ్‌తో గానీ పనిచేసేందుకు పూరీ రెడీగా ఉన్నారని.. అందుకోసం ప్రస్తుతం కథలు రాస్తున్నారని వార్తలు వచ్చాయి. కానీ తన తదుపరి చిత్రంపై క్లారిటీని ఇచ్చేశారు పూరీ జగన్నాథ్‌. నందమూరి బాలకృష్ణతో తాను తదుపరి చిత్రాన్ని తెరకెక్కించబోతున్నానని ఆయన వివరించారు.

కాగా గతంలో బాలయ్యతో పూరీ పైసా వసూల్ చిత్రాన్ని తెరకెక్కించారు. మిక్స్‌డ్‌ టాక్‌ను తెచ్చుకున్న ఈ మూవీ బాక్సాఫీస్ వద్ద యావరేజ్‌గా నిలిచింది. అయితే ఈ మూవీలో బాలయ్య మేనరిజానికి అటు అభిమానులతో పాటు ఇటు సాధారణ ప్రేక్షకుల్లోనూ మంచి మార్కులు పడ్డాయి. ఈ నేపథ్యంలో ఇప్పుడు బాలయ్యతో మరో సినిమాను తెరకెక్కించేందుకు సిద్ధమవుతున్నారు పూరీ. ఇదిలా ఉంటే ప్రస్తుతం బోయపాటి దర్శకత్వంలో ఓ చిత్రంలో నటిస్తున్నారు బాలయ్య. అన్నీ కుదిరితే ఈ మూవీ తరువాత పూరీతో సెట్స్‌ మీదకు వెళ్లనున్నారు బాలయ్య. మరి ఈ కాంబినేషన్‌లో ఎలాంటి చిత్రం రాబోతోంది..? ఈసారి పూరీ, బాలయ్యను ఎలా చూపించబోతున్నారు..? అనే ప్రశ్నలకు సమాధానం తెలియాలంటే కొద్ది రోజులు ఆగాల్సిందే.

Read This Story Also: ఇంటి పని చేసిన లెక్కల మాస్టార్‌.. మార్కులేసిన సతీమణి..!