Operation Sindoor: ‘ఆపరేషన్ సిందూర్’ పై సినిమా.. డైరెక్టర్ ఎవరంటే?
'ఆపరేషన్ సిందూర్’ పేరుతో ఇప్పటికే ఓ సినిమా ఖరారు కాగా.. ఇదే నేపథ్యంతో మరో చిత్రం రానున్నట్లు ప్రచారం జరుగుతోంది. గతంలో ఎన్నో నిజ జీవిత సంఘటలను ధైర్యంగా తెరకెక్కించిన ఓ ప్రముఖ దర్శకుడు ఈ సినిమాను కూడా తెరకెక్కించనున్నాడు. త్వరలోనే దీనిపై ఓ అధికారిక ప్రకటన రానుంది.
Updated on: Feb 19, 2026 | 8:45 AM
బాలీవుడ్ దర్శకుడు వివేక్ అగ్నిహోత్రి గురించి ప్రత్యేక పరిచయం అక్కర్లేదు. నిజమైన సంఘటనల ఆధారంగా సినిమాలు తీయడంలో ఆయన సిద్ధ హస్తుడు. ‘ది తాష్కెంట్ ఫైల్స్’, ‘ది కశ్మీర్ ఫైల్స్’, ‘ది బెంగాల్ ఫైల్స్’, ‘ది వ్యాక్సిన్ వార్’, ‘ వంటి సినిమాలతో మంచి గుర్తింపు సొంతం చేసుకున్నారు వివేక్. ఇప్పుడు ఆయన ఒక నిజమైన సంఘటన ఆధారంగా మరో సినిమా చేయడానికి సిద్ధమవుతున్నట్లు వార్తలు వస్తున్నాయి. ‘ఆపరేషన్ సిందూర్’ ఆధారంగా ఒక సినిమా తీస్తారని చెబుతున్నారు . కానీ ఆయన దీని గురించి అధికారిక ప్రకటన చేయలేదు. పాకిస్తాన్ ఉగ్రవాదులు పహల్గామ్లో భారతీయ పర్యాటకులను లక్ష్యంగా చేసుకుని కాల్పులు జరిపారు. ఫలితంగా ఎంతో మంది అమాయకులు ప్రాణాలు కోల్పోయారు. ఈ దాడికి ప్రతీకారంగా భారతదేశం ‘ఆపరేషన్ సిందూర్’ అనే ఆపరేషన్ను ప్రారంభించింది. పాకిస్తానీ ఉగ్రవాదుల దాక్కున్న ప్రదేశాలపై భారత సైన్యం విస్తృతంగా దాడి చేసింది. ఇప్పుడు ఈ సంఘటనల ఆధారంగానే వివేక్ అగ్ని హోత్ని చిత్రం ఉంటుందని సమాచారం.
‘ఆపరేషన్ సిందూర్’ చిత్రాన్ని ప్రముఖ నిర్మాణ సంస్థ ‘టి సిరీస్’ నిర్మిస్తుంది. నిర్మాత భూషణ్ కుమార్ ఈ చిత్రాన్ని నిర్మిస్తారు. వివేక్ అగ్నిహోత్రి ‘ఐ యామ్ బుద్ధ ప్రొడక్షన్స్’ కూడా నిర్మాణంలో చేతులు కలుపుతుందని తెలుస్తోంది. అయితే ప్రస్తుతానికి ఇది కేవలం రూమర్ మాత్రమే. T-సిరీస్ నుంచి కానీ, వివేక్ అగ్నిహోత్రి నుంచి కానీ ఎటువంటి అధికారిక ప్రకటన రాలేదు. కాబట్టి, ఈ చిత్రంలో ఏ కళాకారులు నటిస్తారు? షూటింగ్ ఎప్పుడు ప్రారంభమవుతుంది వంటి సమాచారం కూడా ప్రస్తుతానికి అందుబాటులో లేదు.
‘ది కాశ్మీర్ ఫైల్స్’ సినిమాతో వివేక్ అగ్నిహోత్రి భారీ విజయాన్ని అందుకున్నాడు. కానీ ఆ తర్వాత వచ్చిన అతని సినిమాలు పెద్దగా ఆడలేదు. ‘ది వ్యాక్సిన్ వార్’ సినిమా ఆశించిన స్థాయిలో కలెక్షన్లు రాబట్టలేదు. ‘ది బెంగాల్ ఫైల్స్’ పై వివేక్ చాలా ఆశలు పెట్టుకున్నాడు. కానీ ఈ సినిమా కూడా బాక్సాఫీస్ వద్ద బోల్తా పడింది.
మరిన్ని సినిమా వార్తల కోసం ఇక్కడ క్లిక్ చేయండి.
