మీ మ్యూచువల్‌ ఫండ్‌ లాభాలు ఏజెంట్‌ నొక్కేస్తున్నాడా? ఇలా చేయండి!

మ్యూచువల్ ఫండ్‌లో పెట్టుబడి పెట్టే సమయంలో చాలా మందికి ఒకే ఫండ్‌కు డైరెక్ట్ ప్లాన్, రెగ్యులర్ ప్లాన్ అనే రెండు ఎంపికలు కనిపిస్తాయి. పైకి చూస్తే రెండూ ఒకేలా అనిపించినా, దీర్ఘకాలంలో మీ సంపదపై గణనీయమైన ప్రభావం చూపే కీలకమైన తేడా వాటి మధ్య ఉంటుంది. ఈ రెండు ప్లాన్‌ల మధ్య ప్రధాన వ్యత్యాసం పెట్టుబడి చేసే విధానంలోనే ఉంటుంది. డైరెక్ట్ ఫండ్‌లో పెట్టుబడి పెడితే, మీ డబ్బు నేరుగా అసెట్ మేనేజ్‌మెంట్ కంపెనీ (AMC) వద్దకు వెళ్తుంది. ఇందులో ఎలాంటి మధ్యవర్తి ఉండరు. కానీ రెగ్యులర్ ఫండ్‌లో పెట్టుబడి పెట్టేటప్పుడు డిస్ట్రిబ్యూటర్, ఏజెంట్ లేదా ఫైనాన్షియల్ అడ్వైజర్ ద్వారా పెట్టుబడి జరుగుతుంది. వారు పెట్టుబడిదారుడికి సలహాలు, మార్గదర్శకత్వం అందిస్తారు.

ఇక్కడే ఎక్స్‌పెన్స్ రేషియో అనే అంశం కీలకంగా మారుతుంది. రెగ్యులర్ ఫండ్లలో డిస్ట్రిబ్యూటర్లకు కమీషన్ చెల్లించాల్సి ఉండటంతో ఖర్చులు ఎక్కువగా ఉంటాయి. డైరెక్ట్ ఫండ్లలో ఈ కమీషన్ లేకపోవడంతో ఎక్స్‌పెన్స్ రేషియో తక్కువగా ఉంటుంది. ఫలితంగా డైరెక్ట్ ప్లాన్‌ల రాబడులు సాధారణంగా రెగ్యులర్ ప్లాన్‌ల కంటే కొద్దిగా ఎక్కువగా కనిపిస్తాయి. ప్రారంభంలో ఈ తేడా చిన్నదిగా అనిపించినా, దీర్ఘకాలంలో అది పెద్ద మొత్తంగా మారుతుంది. ఉదాహరణకు 15–20 సంవత్సరాల పాటు SIP కొనసాగించినప్పుడు కేవలం 0.5 శాతం నుంచి 1 శాతం వరకు ఉండే ఖర్చు తేడా కూడా లక్షల రూపాయల అదనపు సంపదను సృష్టించగలదు.

అయితే అధిక రాబడులు ఉన్నప్పటికీ అందరూ డైరెక్ట్ ఫండ్లనే ఎంచుకోరు. కారణం రెగ్యులర్ ఫండ్లు పెట్టుబడిదారులకు ఒక రకమైన సపోర్ట్ సిస్టమ్‌ను అందిస్తాయి. మార్కెట్ పడిపోయినప్పుడు భయంతో పెట్టుబడులు ఉపసంహరించుకునే అవకాశాలు ఎక్కువగా ఉంటాయి. అటువంటి సమయంలో అనుభవజ్ఞుడైన ఫైనాన్షియల్ అడ్వైజర్ సరైన నిర్ణయాలు తీసుకునేందుకు సహాయం చేస్తాడు. మీ లక్ష్యాలకు అనుగుణంగా సరైన ఫండ్ ఎంపిక చేయడంలో కూడా మార్గనిర్దేశం చేస్తాడు. కాబట్టి ఏ ప్లాన్ మంచిదో అనేది పూర్తిగా పెట్టుబడిదారుడి అవగాహన, అనుభవంపై ఆధారపడి ఉంటుంది. మార్కెట్‌పై అవగాహన ఉన్నవారు, స్వయంగా పరిశోధన చేసుకునే వారు డైరెక్ట్ ఫండ్ల ద్వారా ఖర్చులను తగ్గించుకుని ఎక్కువ లాభాలు పొందవచ్చు. కానీ పెట్టుబడుల్లో మార్గదర్శకత్వం అవసరమని భావించే వారికి రెగ్యులర్ ఫండ్లు మరింత అనుకూలంగా ఉండవచ్చు. ఏది ఎంచుకున్నా తరచూ ఫండ్లు మార్చడం లేదా మార్కెట్ పడిపోయిందని భయపడి పెట్టుబడులను ఉపసంహరించుకోవడం మాత్రం దీర్ఘకాల లాభాలకు పెద్ద ప్రమాదమని నిపుణులు హెచ్చరిస్తున్నారు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి