Mango Coconut Laddu: నోట్లో వేస్తే కరిగిపోయే ‘మ్యాంగో కోకోనట్ లడ్డు’.. ఒక్క ముక్క కూడా మిగల్చకుండా తినేస్తారు!

ఈ వేసవిలో మీ ఇంట్లో వాళ్లకు స్వీట్ సర్ ప్రైజ్ ఇవ్వడానికి మ్యాంగో కోకోనట్ లడ్డును చాలా సులభంగా తయారు చేయవచ్చు. దీని కోసం ఎక్కువ శ్రమ పడాల్సిన అవసరం లేదు, వంటరాని వారు కూడా దీన్ని ఈజీగా చేసేయొచ్చు. మరెందుకు ఆలస్యం, కేవలం 10 నుండి 15 నిమిషాల్లో తయారయ్యే ఈ ఇన్ స్టాంట్ స్వీట్ రెసిపీని ఇప్పుడు చూద్దాం.

కావలసిన పదార్థాలు:

బాగా పండిన మామిడిపండు గుజ్జు – 1 కప్పు ఎండు కొబ్బరి పొడి లేదా పచ్చి కొబ్బరి తురుము- 2 కప్పులు కండెన్స్‌డ్ మిల్క్ లేదా చక్కెర – 1/2 కప్పు మిల్క్ పౌడర్ (రుచి టెక్స్చర్ కోసం) – 2 టేబుల్ స్పూన్లు యాలకుల పొడి – 1/4 టీస్పూన్ నెయ్యి- 1 టేబుల్ స్పూన్ గార్నిషింగ్ కోసం సన్నగా తరిగిన పిస్తా లేదా జీడిపప్పు ముక్కలు

తయారీ విధానం

ముందుగా స్టవ్ ఆన్ చేసి ఒక మందపాటి పాన్ పెట్టుకుని అందులో 1 టేబుల్ స్పూన్ నెయ్యి వేయాలి. నెయ్యి వేడెక్కిన తర్వాత, రెండు కప్పుల కొబ్బరి పొడిని వేసి (గార్నిషింగ్ కోసం కొద్దిగా పక్కన పెట్టుకోవాలి) తక్కువ మంటపై దోరగా, మంచి సువాసన వచ్చే వరకు వేయించాలి. రంగు మారకుండా చూసుకోవాలి.

కొబ్బరి వేగిన తర్వాత, అందులో ముందుగా సిద్ధం చేసుకున్న 1 కప్పు మామిడిపండు గుజ్జు, అర కప్పు కండెన్స్‌డ్ మిల్క్ మరియు 2 టేబుల్ స్పూన్ల మిల్క్ పౌడర్ వేసి బాగా కలపాలి. (ఒకవేళ కండెన్స్‌డ్ మిల్క్ లేకపోతే చక్కెర కూడా వాడుకోవచ్చు).

ఈ మిశ్రమాన్ని తక్కువ మంట మీదనే కలుపుతూ ఉడికించాలి. మిశ్రమం అంతా గట్టిపడి, పాన్ నుండి విడివడి ఒక ముద్దలా తయారయ్యే వరకు కలుపుతూనే ఉండాలి. చివరిగా ఇందులో యాలకుల పొడి చల్లి బాగా కలిపి, స్టవ్ ఆఫ్ చేసి కాసేపు చల్లారనివ్వాలి.

మిశ్రమం కొద్దిగా గోరువెచ్చగా ఉన్నప్పుడు, చేతులకు కొద్దిగా నెయ్యి రాసుకుని చిన్న చిన్న భాగాలుగా తీసుకుంటూ గుండ్రటి లడ్డుల్లా చుట్టుకోవాలి. ఇలా తయారైన లడ్డులను ముందుగా మనం పక్కన పెట్టుకున్న ఎండు కొబ్బరి పొడిలో కోట్ చేసి పైన పిస్తా ముక్కలతో గార్నిష్ చేసుకుంటే ఎంతో రుచికరమైన మ్యాంగో కోకోనట్ లడ్డులు రెడీ!

చిన్న చిట్కా: ఈ లడ్డులను తయారు చేసిన తర్వాత ఒక గంట పాటు రిఫ్రిజిరేటర్‌లో ఉంచితే, అవి చక్కగా సెట్ అయ్యి మరింత జూసీగా, రుచిగా ఉంటాయి. వీటిని ఎయిర్ టైట్ కంటైనర్‌లో పెట్టి ఫ్రిజ్‌లో ఉంచితే వారం రోజుల పాటు నిల్వ ఉంటాయి.