LPG: మారిన రూల్స్‌.. ఇకపై ఇలా గ్యాస్‌ బుకింగ్‌ చేయలేరు!

మధ్యప్రాచ్యంలో పెరుగుతున్న యుద్ధ ఉద్రిక్తతలు ఇప్పుడు భారతదేశంలోని గృహ వినియోగ గ్యాస్ సరఫరాపై కూడా ప్రభావం చూపుతున్నాయి. ఇరాన్‌, ఇజ్రాయెల్‌ మధ్య పెరుగుతున్న సైనిక ఘర్షణలు, అలాగే అమెరికా జోక్యం కారణంగా ఆ ప్రాంతంలో ముడి చమురు, సహజ వాయువు సరఫరా గొలుసులో అంతరాయాలు ఏర్పడుతున్నాయి. దీని ప్రభావం ప్రపంచ ఇంధన మార్కెట్లపై పడుతుండగా, భారత్‌లో కూడా LPG సరఫరా వ్యవస్థపై ఒత్తిడి పెరిగింది. ఈ పరిస్థితిలో ఆయిల్ మార్కెటింగ్ కంపెనీలు గృహ వినియోగ LPG సిలిండర్ బుకింగ్‌పై కొత్త నియమాన్ని అమలు చేశాయి. నివేదికల ప్రకారం ఇకపై వినియోగదారులు 21 రోజుల ముందే కొత్త LPG సిలిండర్‌ను బుక్ చేసుకునే అవకాశం ఉండదు. అంటే ఒకసారి సిలిండర్ డెలివరీ అయిన తర్వాత కనీసం 21 రోజులు గడిచిన తర్వాత మాత్రమే మరో సిలిండర్‌ను బుక్ చేసుకోవచ్చు. ఇటీవల ప్రజల్లో పెరిగిన ‘పానిక్ బుకింగ్’ కారణంగా సరఫరా వ్యవస్థపై వచ్చిన ఒత్తిడిని తగ్గించడానికే ఈ నిర్ణయం తీసుకున్నట్లు అధికారులు చెబుతున్నారు.

ఇక ఇదే సమయంలో దేశంలో గృహ వినియోగ LPG ధరలు కూడా పెరిగాయి. రాజధాని న్యూఢిల్లీలో 14.2 కిలోల డొమెస్టిక్‌ LPG సిలిండర్ ధరను రూ.60 పెంచారు. దీంతో సిలిండర్ ధర రూ.853 నుండి రూ.913కి చేరింది. మధ్యప్రాచ్యంలో పెరుగుతున్న అనిశ్చిత పరిస్థితుల కారణంగా గ్యాస్ సరఫరాపై ప్రజల్లో ఆందోళన పెరిగింది. ఫలితంగా చాలా మంది ముందుగానే సిలిండర్లు బుక్ చేయడం ప్రారంభించారు. ఈ నేపథ్యంలో ఇండియన్‌ ఆయిల్‌ కార్పొరేషన్‌, భారత్‌ పెట్రోలియం శుక్రవారం నుంచి 21 రోజుల బుకింగ్ నియమాన్ని అమలు చేశాయి. ఈ నియమం ప్రకారం మునుపటి సిలిండర్ డెలివరీ అయిన తేదీ నుండి కనీసం 21 రోజుల తర్వాత మాత్రమే కొత్త బుకింగ్ చేయగలరు.

పరిశ్రమ వర్గాల ప్రకారం ఇటీవల బుకింగ్‌ల సంఖ్య అకస్మాత్తుగా పెరిగింది. ఉదాహరణకు కోల్‌కతా పరిసర ప్రాంతాల్లో ఒక రోజులో దాదాపు 1.5 లక్షల LPG బుకింగ్‌లు నమోదయ్యాయి. సాధారణ రోజుల్లో ఈ సంఖ్య సుమారు 1 లక్ష మాత్రమే ఉంటుంది. ఈ పెరుగుదల వల్ల పంపిణీ వ్యవస్థపై భారీ ఒత్తిడి ఏర్పడింది. అందువల్ల సరఫరా వ్యవస్థను సమతుల్యం చేయడం, అన్ని వినియోగదారులకు సమానంగా LPG అందేలా చూసేందుకు ఈ కొత్త 21 రోజుల నియమాన్ని అమలు చేసినట్లు అధికారులు తెలిపారు. నిపుణుల ప్రకారం మధ్యప్రాచ్య పరిస్థితులు సాధారణ స్థితికి వచ్చే వరకు ఇంధన మార్కెట్లలో అస్థిరత కొనసాగవచ్చు.

మరిన్ని బిజినెస్‌ వార్తల కోసం ఇక్కడ క్లిక్‌ చేయండి