Samatha Kumbh 2024: భగవద్ రామానుజ, 108 దివ్యదేశాల ద్వితీయ బ్రహ్మోత్సవాలు.. గరుడసేవల వివరాలు

మధ్యాహ్నం వేదికపై పలు సాంస్కృతిక కార్యక్రమాలు నిర్వహించారు. చిన్నారుల నృత్యాలు భక్తులను అలరించాయి. సమతాకుంభ్ బ్రహ్మోత్సవాల సందర్భంగా ఈక్వాలిటీ కప్ పేరుతో నిర్వహించిన క్రికెట్ టోర్నీలో గెలుపొందిన జట్ల సభ్యులకు త్రిదండి చినజీయర్ స్వామివారు మంగళాశాసనాలు అందించారు. విన్నర్, రన్నరప్‌గా నిలిచిన జట్లకు స్వయంగా బహుమతులు అందజేశారు..

Samatha Kumbh

Subhash Goud |

Updated on: Feb 24, 2024 | 10:10 PM

హైదరాబాద్ శివారు ముచ్చింతల్‌ (Muchintal)లోని శ్రీరామనగరంలో సమతాకుంభ్-2024 భగవద్ రామానుజ, 108 దివ్యదేశాల ద్వితీయ బ్రహ్మోత్సవాలు ఘనంగా జరుగుతున్నాయి. ఐదో రోజు శనివారం ఉదయం త్రిదండి చినజీయర్ స్వామి ఆధ్వర్యంలో అర్చకస్వాములు, ఋత్వికులు, వేద విద్యార్థులు కలిసి ధాన్యం చేశారు. స్వామివారు అష్టాక్షరీ లఘుజప విధానాన్ని అనుగ్రహించారు. ధాన్యం తర్వాత ఆరాధన, సేవాకాలం, శాత్తుముఱై పూర్తి చేసుకుని, వేద విన్నపాలతో యాగ కార్యక్రమం జరిపించారు. త్రిదండి చినజీయర్ స్వామివారు భక్తులందరికీ స్వయంగా తీర్థాన్ని అనుగ్రహించారు. రెండు, మూడు గంటలైనా సరే ఎంతో ఓపికగా చినజీయర్ స్వామివారు భక్తులందరికీ తీర్థాన్ని ఇచ్చారు. నిత్యపూర్ణాహుతి కార్యక్రమం తర్వాత బలిహరణ, వేదవిన్నపాలు పూర్తికాగానే వేదికపై 18 దివ్యదేశాధీశులకు తిరుమంజన సేవ జరిపించారు.

మధ్యాహ్నం వేదికపై పలు సాంస్కృతిక కార్యక్రమాలు నిర్వహించారు. చిన్నారుల నృత్యాలు భక్తులను అలరించాయి. సమతాకుంభ్ బ్రహ్మోత్సవాల సందర్భంగా ఈక్వాలిటీ కప్ పేరుతో నిర్వహించిన క్రికెట్ టోర్నీలో గెలుపొందిన జట్ల సభ్యులకు త్రిదండి చినజీయర్ స్వామివారు మంగళాశాసనాలు అందించారు. విన్నర్, రన్నరప్‌గా నిలిచిన జట్లకు స్వయంగా బహుమతులు అందజేశారు. ఈరోజు విశేష కార్యక్రమాల్లో భాగంగా గ్లోబల్‌ రామాయణ క్విజ్‌ కాంటెస్ట్‌ను నిర్వహించారు. చినజీయర్‌ స్వామివారితో పాటు పలువురు స్వాములు భక్తులను రామాయణంపై ప్రశ్నలు అడిగారు.

సాయంత్రం త్రిదండి చినజీయర్‌ స్వామితో పాటు భక్తులంతా సామూహికంగా విష్ణు సహస్రనామ పారాయణం చేశారు. ఆ తర్వాత రామయణ క్విజ్‌లో ఫైనల్ చేరిన వారికి బజర్ రౌండ్ నిర్వహించి విజేతలకు స్వామివారు బహుమతులు అందించారు. ప్రముఖ బాలీవుడ్ నటుడు, సామాజిక వేత్త సోనూసూద్ సతీమణి సమతామూర్తిని దర్శించుకున్నారు, 108 దివ్యదేశాలను సందర్శించారు. ఆ తర్వాత వేదికపై ఎదుర్కోలు కార్యక్రమం నిర్వహించారు. అనంతరం సాకేత రామచంద్రప్రభువుకు గజవాహన సేవ, సాకేతవల్లీ అమ్మవారికి హంసవాహన సేవ జరిపించారు. ఈ సేవల తర్వాత 18 దివ్యదేశాధీశులకు 18 గరుడ సేవలు వైభవంగా జరిగాయి.