కేసీఆర్ గారికి థ్యాంక్స్.. శ్రామికులందరికీ శుభాకాంక్షలు: హరీష్ రావు

తెలంగాణ ప్రభుత్వం ప్రతిష్టాత్మకంగా నిర్మించిన కాళేశ్వరం ప్రాజెక్ట్ మరికాసేపట్లో ప్రారంభం కానుంది. ఈ నేపథ్యంలో మాజీ మంత్రి, సిద్దిపేట ఎమ్మెల్యే హరీష్ రావు ట్విట్టర్‌లో స్పందించారు. కాళేశ్వరం ప్రాజెక్టు ప్రారంభోత్సవము జరుగుతున్న శుభ సమయాన నా ఆనందాన్ని.. ఉద్వేగాన్ని మీ అందరితో పంచుకుంటున్నానని ట్వీట్ చేసిన హరీష్ రావు.. ఓ నోట్‌ను షేర్ చేశారు.

అందులో గౌరవ ముఖ్యమంత్రి కేసీఆర్ గారు అపర భగీరథుడిలా తానే ఒక ఇంజనీర్‌గా మారి అహోరాత్రులు శ్రమించి ప్రాజెక్ట్‌ను రీడిజైన్ చేశారని పేర్కొన్నారు. నిరంతరం ప్రాజెక్ట్‌ను పర్యవేక్షిస్తూ రికార్డు సమయంలో ప్రాజెక్ట్ నిర్మాణం పూర్తి చేయించిన గౌరవ సీఎం కేసీఆర్ గారికి హృదయ పూర్వక ధన్యవాదాలు తెలియజేస్తున్నానని తెలిపారు. ఈ సందర్భంగా ప్రాజెక్ట్ నిర్మాణంలో ఎండ, వాన, చలిని లెక్క చేయకుండా రేయింబవళ్లు శ్రమించిన ఇంజనీర్లకు, ఉద్యోగులకు, కార్మికులుకు ప్రతి ఒక్కరికి పేరు పేరున శుభాకాంక్షలు అని వెల్లడించారు. అలాగే ఈ సన్నివేశాన్ని ఆనందబాష్పాలతో తిలకిస్తున్న తెలంగాణ రైతుల పాదాలకు శిరస్సు వంచి నమస్కరిస్తున్నానని హరీష్ రావు ట్వీట్ చేశారు.

కాళేశ్వరం ప్రాజెక్టు ప్రారంభోత్సవము జరుగుతున్న శుభ సమయాన నా ఆనందాన్ని.. ఉద్వేగాన్ని మీ అందరితో పంచుకుంటున్నాను. pic.twitter.com/Xxg9jblCGv

— Harish Rao Thanneeru #StayHome #StaySafe (@trsharish) June 20, 2019