Vande Bharat Express: గుడ్ న్యూస్.. మరో రెండు వందేభారత్ రైళ్లు.? సికింద్రాబాద్ నుంచి ఎక్కడెక్కడికంటే..
ఇప్పటికే తెలుగు రాష్ట్రాల మధ్య రెండు వందేభారత్ ఎక్స్‌ప్రెస్ రైళ్లు పరుగులు పెడుతోన్న సంగతి తెలిసిందే..
Updated on: Apr 13, 2023 | 5:12 PM
ఇప్పటికే తెలుగు రాష్ట్రాల మధ్య రెండు వందేభారత్ ఎక్స్‌ప్రెస్ రైళ్లు పరుగులు పెడుతోన్న సంగతి తెలిసిందే. ఇందులో ఒకటి సికింద్రాబాద్-విశాఖపట్నం, మరొకటి సికింద్రాబాద్-తిరుపతి. ప్రస్తుతం ఈ రెండు రైళ్లకు ప్రజాదరణ ఎక్కువగా ఉంది. ఆయా రైళ్లలో రిజర్వేషన్లు కూడా ఫుల్ అవుతున్నాయని రైల్వేశాఖ చెబుతోంది. ఇదిలా ఉంటే.. ఈ రెండు రైళ్లతో పాటు మరో రెండు లేదా మూడు నెలల్లో సికింద్రాబాద్ నుంచి బెంగళూరుకు వందేభారత్ రైలు నడపాలని కేంద్ర రైల్వేశాఖ నిర్ణయం తీసుకున్నట్లు సమాచారం. ఈ మేరకు దక్షిణ మధ్య రైల్వే అధికారులు కూడా ప్రణాళికలు సిద్దం చేస్తున్నట్లు తెలుస్తోంది. ఈ వందేభారత్ రైలు కాచిగూడ-బెంగళూరు రూట్‌లో ఉంటుందట.
ఇప్పటికే ఈ రెండు నగరాల మధ్య అనేక రైళ్లు నడుస్తున్నాయ్. అలాగే ఈ రైళ్ల ప్రయాణ సమయం కూడా దాదాపుగా 12 గంటలు పడుతోంది. ఆ ప్రయాణ సమయాన్ని వందేభారత్ 8 గంటలకు కుదిస్తుంది. ఇప్పటికీ ఈ ట్రైన్‌ను వీలైనంత త్వరగా పట్టాలెక్కించాలని రైల్వే అధికారులు భావిస్తున్నారట.
అటు కర్ణాటకలో ఎన్నికలకు డేట్ దగ్గర పడుతుండటంతో.. అనుకున్న డేట్ కన్నా ముందే సికింద్రాబాద్-బెంగళూరు మధ్య వందేభారత్ రైలును కేంద్రం ప్రారంభించే అవకాశం ఉందని అధికారిక వర్గాలు చెబుతున్నాయ్. కాగా, బెంగళూరుకు వందేభారత్ రైలును ప్రారంభించాక.. ఆ తర్వాత సికింద్రాబాద్ నుంచి పూణేకు కూడా వందేభారత్ రైలును కేంద్ర రైల్వేశాఖ నడిపే అవకాశాలున్నట్లు తెలుస్తోంది.
