Warangal: అక్కాచెల్లెళ్లే.. తోడికోడళ్లు.. సర్పంచ్, ఎంపీటీసీలు పదవులు.. ముదిరిన ఆధిపత్య పోరు.. ఒకరిపై ఒకరు ఫిర్యాదు
తోటికోడళ్లు, అక్కాచెల్లెళ్లు.. అంతకుమించి గ్రామవారధులు. వీళ్లిద్దరి మధ్య విభేదాలు రోజురోజుకి ముదిరిపోతున్నాయి. నెల్లుట్ల ఆదర్శ గ్రామమని అధికారులు ప్రశంసలు కురిపిస్తుంటే.. ఇద్దరి మధ్య గొడవలతో అభివృద్ధి ఎక్కడ కుంటుపడుతుందోనని గ్రామస్తులు ఆందోళన వ్యక్తం చేస్తున్నారు.
Updated on: Jan 27, 2023 | 7:18 AM
జనగామ జిల్లా లింగాల ఘనపురం మండలం నెల్లుట్లలో తోటి కోడళ్ల పంచాయతీ పీక్స్‌కి చేరింది. పదవులు, ప్రోటోకాల్‌ అంటూ గొడవ పడుతున్న సర్పంచ్, ఎంపీటీసీ వ్యవహారం జిల్లా వ్యాప్తంగా సెన్షేషన్‌గా మారింది. గ్రామ సర్పంచ్‌గా చిట్ల స్వరూప, చిట్ల జయశ్రీ పోటీపడగా స్వరూప గెలుపొందారు. ఆ తర్వాత జరిగిన ఎంపీటీసీ ఎన్నికల్లో జయశ్రీ గెలుపొందారు. కాస్త లేటయినా ఇద్దర్నీ పదవులు అలకరించాయి. అప్పటి నుంచి ఇద్దరి మధ్య ఆధిపత్య పోరు ముదిరిపోయింది. దీంతో గ్రామంలో ఏ అభివృద్ది కార్యక్రమం చేపట్టినా ఇద్దరి మధ్య వాగ్వాదం సాధారణమైపోయింది. తాజాగా గ్రామ సర్వసభ్య సమావేశంలోనూ అదే సీన్ కంటిన్యూ అయింది. ఇద్దరి మధ్య మాటామాటా పెరిగి మ్యాటర్ దాడుల దాకా వెళ్లింది. ఒకరిపై మరొకరు దాడి చేసుకున్న సర్పంచ్, ఎంపీటీసీ పోలీసులకు ఫిర్యాదు చేశారు. అంతేకాదూ.. జిల్లా కలెక్టర్‌, అడిషనల్ కలెక్టర్‌కు కూడా రాతపూర్వక కంప్లైంట్ ఇచ్చారు.
తనకు ఉన్న పరిచయాలతో గ్రామానికి నిధులు తెస్తుంటే తనపైనే కక్షసాధింపు చర్యలకు పాల్పడుతున్నారని ఎంపీటీసీ జయశ్రీ ఆరోపిస్తున్నారు. కొంతమంది నేతల అండ చూసుకుని తమపై బురద చల్లే ప్రయత్నం చేస్తుందని సర్పంచ్ స్వరూప మండిపడుతున్నారు. తమపైనే దాడి చేసి మళ్లీ ఆరోపణలు చేస్తున్నారని ఆగ్రహం వ్యక్తం చేస్తున్నారు. తోటికోడళ్లు, అక్కాచెల్లెళ్లు.. అంతకుమించి గ్రామవారధులు. వీళ్లిద్దరి మధ్య విభేదాలు రోజురోజుకి ముదిరిపోతున్నాయి. నెల్లుట్ల ఆదర్శ గ్రామమని అధికారులు ప్రశంసలు కురిపిస్తుంటే.. ఇద్దరి మధ్య గొడవలతో అభివృద్ధి ఎక్కడ కుంటుపడుతుందోనని గ్రామస్తులు ఆందోళన వ్యక్తం చేస్తున్నారు. ఇప్పటికైనా ఆధిపత్య పోరు పక్కన పెట్టి అభివృద్ధిలో పోటీపడాలంటున్నారు. మరోవైపు ఇద్దరి మధ్య గొడవలకు లోకల్ ఎమ్మెల్యే రాజయ్య.. ఎమ్మెల్సీ కడియం శ్రీహరిల అండదండలు కూడా కారణమన్న గుసగుసలు వినిపిస్తున్నాయి.
మరిన్ని తెలంగాణ వార్తల కోసం ఇక్కడ క్లిక్ చేయండి,..
