Virat Kohli : గేల్, వార్నర్, కేఎల్ రాహుల్ రికార్డులు బ్రేక్.. రికార్డులకే చెమటలు పట్టించిన రన్ మెషిన్

Virat Kohli : రాయల్ ఛాలెంజర్స్ బెంగళూరు (RCB) రన్ మెషిన్ విరాట్ కోహ్లీ ఐపీఎల్ 2026 లో సరికొత్త చరిత్ర సృష్టించాడు. ఐపీఎల్ సుదీర్ఘ చరిత్రలో ఇప్పటివరకు ప్రపంచంలో ఏ ఒక్క బ్యాటర్‌కూ సాధ్యం కాని ఒక అరుదైన మైలురాయిని కోహ్లీ తన పేరిట లిఖించుకున్నాడు. ధర్మశాల వేదికగా గుజరాత్ టైటాన్స్ (GT) తో జరిగిన క్వాలిఫైయర్ 1 మ్యాచ్‌లో విరాట్ ఈ చారిత్రాత్మక ఘనతను అందుకున్నాడు. ఐపీఎల్‌లో వరుసగా నాలుగు సీజన్లలో (2023, 2024, 2025, 2026) 600 కంటే ఎక్కువ పరుగులు చేసిన ఏకైక ప్రపంచ బ్యాటర్‌గా రికార్డులకెక్కాడు.

గుజరాత్ టైటాన్స్‌తో జరిగిన ఈ హై-ప్రెషర్ నాకౌట్ మ్యాచ్‌లో విరాట్ కోహ్లీ కేవలం 25 బంతుల్లోనే 5 ఫోర్లు, 1 సిక్సర్‌తో 172.00 స్ట్రైక్ రేట్‌తో కీలకమైన 43 పరుగులు చేశాడు. జేసన్ హోల్డర్ బౌలింగ్‌లో అవుట్ కావడానికి ముందే.. రషీద్ ఖాన్ వేసిన ఓవర్లో సింగిల్ తీసి ఈ సీజన్‌లో తన 600 పరుగుల మార్కును దాటేశాడు. ఈ 43 పరుగుల మెరుపు ఇన్నింగ్స్   కెప్టెన్ రజత్ పటీదార్ (33 బంతుల్లో 93*) విధ్వంసం కారణంగా ఆర్‌సీబీ ఈ మ్యాచ్‌లో 254 పరుగుల రికార్డు స్కోరు సాధించి, ఫైనల్లోకి దూసుకెళ్లింది.

ఐపీఎల్ 2026 సీజన్ లో విరాట్ కోహ్లీ బ్యాటింగ్ పర్ఫార్మెన్స్ అత్యంత భయంకరంగా సాగింది. ఈ సీజన్‌లో ఆడిన 15 ఇన్నింగ్స్‌లలో కోహ్లీ సరిగ్గా 50.00 సగటుతో మరియు అతని ఐపీఎల్ కెరీర్‌లోనే అత్యుత్తమమైన 164.38 స్ట్రైక్ రేట్‌తో 600 పరుగులు పూర్తి చేశాడు. ఇందులో ఒక అద్భుతమైన సెంచరీ (105 నాటౌట్) తో పాటు నాలుగు హాఫ్ సెంచరీలు కూడా ఉన్నాయి. టీ20 ఇంటర్నేషనల్స్ నుంచి రిటైర్ అయినప్పటికీ, వయసు పెరుగుతున్నా తనలోని పవర్ హిట్టింగ్ ఏమాత్రం తగ్గలేదని కోహ్లీ మరోసారి నిరూపించాడు.

వరుసగా నాలుగు సీజన్ల పరుగుల సునామీ ట్రాక్ రికార్డ్

2022 సీజన్ లో కేవలం 341 పరుగులతో తీవ్ర ఫామ్ లేమితో సతమతమైన కోహ్లీ.. ఆ తర్వాత రీ-ఇన్వెంట్ అయి పుంజుకున్న తీరు అద్భుతం. గత నాలుగు ఏళ్లుగా అతను సృష్టించిన పరుగుల విధ్వంసం ఇలా ఉంది:

2023 సీజన్: 14 ఇన్నింగ్స్‌ల్లో 2 సెంచరీలు, 6 హాఫ్ సెంచరీలతో 639 పరుగులు (స్ట్రైక్ రేట్: 139.82).

2024 సీజన్: 15 ఇన్నింగ్స్‌ల్లో 1 సెంచరీ, 5 హాఫ్ సెంచరీలతో ఏకంగా 741 పరుగులు (స్ట్రైక్ రేట్: 154.69). ఈ సీజన్ లో కోహ్లీ 38 సిక్సర్లు బాదాడు.

2025 సీజన్: ఆర్‌సీబీ టైటిల్ గెలిచిన గత సీజన్ లో కోహ్లీ ఫ్రంట్ నుండి లీడ్ చేస్తూ 15 ఇన్నింగ్స్‌ల్లో 8 హాఫ్ సెంచరీలతో 657 పరుగులు చేశాడు.

2026 సీజన్ (ప్రస్తుత సీజన్): 15 ఇన్నింగ్స్‌ల్లో 1 సెంచరీ, 4 హాఫ్ సెంచరీలతో 600* పరుగులు సాధించి చరిత్ర పుటల్లోకెక్కాడు.

గేల్, వార్నర్, కేఎల్ రాహుల్ రికార్డులు బద్దలు

ఇంతకుముందు ఐపీఎల్ లో వరుసగా అత్యధిక సార్లు 600 ప్లస్ స్కోర్లు చేసిన రికార్డు క్రిస్ గేల్ (3 సార్లు: 2011-2013), డేవిడ్ వార్నర్ (3 సార్లు: 2016-2019), కేఎల్ రాహుల్ (3 సార్లు: 2020-2022) ల పేరిట ఉండేది. వీరందరినీ వెనక్కి నెట్టి విరాట్ కోహ్లీ వరుసగా 4వ సారి ఈ మార్కును దాటి టాప్‌లో నిలిచాడు. ఓవరాల్ ఐపీఎల్ కెరీర్ లో అత్యధికంగా 6 సార్లు 600 ప్లస్ పరుగులు చేసిన ఏకైక ఆటగాడు కూడా విరాట్ కోహ్లీనే కావడం విశేషం.