Rohit Sharma : రోహిత్ శర్మ ఫీల్డింగ్ సెంచరీ.. సౌరవ్ గంగూలీని అధిగమించిన హిట్‌మ్యాన్

Rohit Sharma : సిడ్నీ వేదికగా ఆస్ట్రేలియాతో జరుగుతున్న మూడో వన్డేలో భారత మాజీ కెప్టెన్ రోహిత్ శర్మ సెంచరీ పూర్తి చేశాడు. అయితే, ఈ సెంచరీ బ్యాట్‌తో చేసింది కాదు, తన ఫీల్డింగ్‌తో సాధించింది. ఈ మ్యాచ్‌లో రెండు అద్భుతమైన క్యాచ్‌లు అందుకోవడం ద్వారా, రోహిత్ శర్మ వన్డే క్రికెట్‌లో 100 క్యాచ్‌లు పూర్తి చేసుకున్న ఆరో భారతీయ ఆటగాడిగా రికార్డు సృష్టించాడు. అంతేకాదు, ఈ మైలురాయిని చేరుకోవడంలో హిట్‌మ్యాన్ భారత దిగ్గజం సౌరవ్ గంగూలీని కూడా అధిగమించాడు.

ఆస్ట్రేలియాతో జరుగుతున్న సిడ్నీ వన్డేలో రోహిత్ శర్మ మొత్తం 2 క్యాచ్‌లు అందుకున్నాడు. అతను మొదట హర్షిత్ రాణా బౌలింగ్‌లో మిచెల్ ఓవెన్ క్యాచ్‌ను, రెండవది ప్రసిద్ధ్ కృష్ణ బౌలింగ్‌లో నాథన్ ఎల్లిస్ క్యాచ్‌ను తీసుకున్నాడు. ఈ రెండు క్యాచ్‌లతో రోహిత్ శర్మ వన్డే క్రికెట్‌లో తన 100 క్యాచ్‌ల మైలురాయిని విజయవంతంగా పూర్తి చేసుకున్నాడు.

రోహిత్ శర్మ తన కెరీర్‌లో ఆడుతున్న 276వ వన్డే మ్యాచ్‌లో ఈ 100 క్యాచ్‌ల ఫీట్‌ను అందుకున్నాడు. వన్డేల్లో 100 క్యాచ్‌ల మైలురాయిని చేరుకున్న ఆరవ భారతీయ ఆటగాడిగా రోహిత్ నిలిచాడు. ఈ జాబితాలో విరాట్ కోహ్లీ (164 క్యాచ్‌లు) అగ్రస్థానంలో ఉన్నాడు. కోహ్లీ తర్వాత మహ్మద్ అజారుద్దీన్ (156), సచిన్ టెండూల్కర్ (140), రాహుల్ ద్రవిడ్ (124), సురేష్ రైనా (102) ఉన్నారు. ఇప్పుడు రోహిత్ శర్మ కూడా ఈ ఎలైట్ క్లబ్‌లో చేరాడు.

వన్డే క్రికెట్‌లో రోహిత్ శర్మ, సౌరవ్ గంగూలీ ఇద్దరి పేరిట ఇప్పుడు 100 క్యాచ్‌లు ఉన్నాయి. అయితే, రోహిత్ శర్మ ఈ ఘనతను గంగూలీ కంటే వేగంగా సాధించాడు. సౌరవ్ గంగూలీ 100 క్యాచ్‌లు పూర్తి చేయడానికి 311 వన్డే మ్యాచ్‌లు ఆడగా, రోహిత్ శర్మ కేవలం 276 మ్యాచ్‌లలోనే ఈ ఫీట్‌ను చేరుకున్నాడు.

Milestone unlocked 🔓

Rohit Sharma completes his 100th catch in ODIs 🙌#TeamIndia | @ImRo45 pic.twitter.com/OORJncEFJI

— BCCI (@BCCI) October 25, 2025

మరిన్ని క్రికెట్‌ వార్తల కోసం ఇక్కడ క్లిక్‌ చేయండి..