U19 AsiaCup : సెంచరీతో ప్రత్యర్థులకు చెమటలు పట్టించిన వైభవ్.. అండర్-19 ఆసియా కప్‌లో బోణీ కొట్టిన భారత్

U19 AsiaCup : భారత U19 క్రికెట్ జట్టు అండర్-19 ఆసియా కప్ 2025 టోర్నమెంట్‌లో అద్భుతమైన ఆరంభాన్ని ఇచ్చింది. దుబాయ్‌లోని ఐసీసీ అకాడమీలో శుక్రవారం జరిగిన తొలి మ్యాచ్‌లో కెప్టెన్ ఆయుష్ మాత్రే నేతృత్వంలోని టీమిండియా, ఆతిథ్య యూఏఈ U19 జట్టుపై 234 పరుగుల భారీ తేడాతో విజయం సాధించింది. ఈ విజయంలో ప్రధాన పాత్ర పోషించింది 14 ఏళ్ల యువ బ్యాటర్ వైభవ్ సూర్యవంశి. వైభవ్ కేవలం 95 బంతుల్లో 171 పరుగుల మెరుపు ఇన్నింగ్స్‌తో బ్యాట్‌తో తుఫాను సృష్టించాడు. వైభవ్ ధాటికి భారత జట్టు నిర్ణీత 50 ఓవర్లలో 6 వికెట్లు కోల్పోయి ఏకంగా 433 పరుగుల భారీ స్కోరును నమోదు చేసింది.

వన్డే ఫార్మాట్‌లో జరుగుతున్న ఈ టోర్నమెంట్‌లో వైభవ్ సూర్యవంశి బ్యాటింగ్ విధ్వంసం సృష్టించింది. క్రీజులోకి వచ్చిన తర్వాత కొద్దిసేపు నిదానంగా ఆడినప్పటికీ, ఆ తర్వాత దూకుడు పెంచడానికి ఎక్కువ సమయం తీసుకోలేదు. కేవలం 30 బంతుల్లోనే హాఫ్ సెంచరీ పూర్తి చేసిన వైభవ్ ఆ తర్వాత మరింత వేగంగా ఆడి 56 బంతుల్లోనే సెంచరీ మార్క్‌ను అందుకున్నాడు. శతకం తర్వాత కూడా అతని దూకుడు కొనసాగింది. వైభవ్ చిరస్మరణీయ ఇన్నింగ్స్‌లో 14 సిక్సర్లు, 9 ఫోర్లు ఉన్నాయి. వైభవ్‌తో పాటు ఇతర బ్యాటర్లు ఆరన్ జార్జ్, విహాన్ మల్హోత్రా కూడా హాఫ్ సెంచరీలు సాధించగా, అభిజ్ఞాన్ కుండూ, కనిష్క్ చౌహాన్ కూడా మెరుపు ఇన్నింగ్స్‌లతో జట్టు భారీ స్కోరుకు తోడ్పడ్డారు.

433 పరుగుల అసాధ్యమైన లక్ష్యంతో బరిలోకి దిగిన యూఏఈ జట్టుకు తొలి నుంచే ఎదురుదెబ్బలు తగిలాయి. కేవలం 53 పరుగులకే 6 వికెట్లు కోల్పోయి ఓటమి అంచున నిలిచింది. అయినప్పటికీ, యూఏఈ బ్యాటర్లు పృథ్వీ మధు, ఉదీశ్ సూరి ఆ తర్వాత సుదీర్ఘ భాగస్వామ్యాన్ని నెలకొల్పి, దాదాపు 24 ఓవర్ల పాటు భారత బౌలర్లకు వికెట్ దక్కకుండా నిరోధించారు. పృథ్వీ ఔటైన తర్వాత కూడా సూరి, సాలెహ్ అమీన్‌తో కలిసి ఆడి, జట్టు ఆలౌట్ కాకుండా చూసుకున్నారు. చివరికి యూఏఈ 50 ఓవర్లలో 7 వికెట్లు కోల్పోయి 199 పరుగులు మాత్రమే చేయగలిగింది. దీంతో టీమిండియా 234 పరుగుల భారీ తేడాతో విజయాన్ని అందుకుంది.

భారత్ తమ తదుపరి మ్యాచ్‌ను డిసెంబర్ 14 ఆదివారం నాడు దాయాది పాకిస్తాన్ తో ఆడనుంది. పాకిస్తాన్ కూడా తమ తొలి మ్యాచ్‌లో మలేషియాను 297 పరుగుల భారీ తేడాతో ఓడించింది. ఆ మ్యాచ్‌లో పాకిస్తాన్ ఓపెనర్ సమీర్ మిన్హాస్ 177 పరుగుల సాయంతో 345 పరుగులు చేసింది. దీనికి సమాధానంగా మలేషియా కేవలం 48 పరుగులకే ఆలౌట్ అయింది. రెండు జట్లు కూడా భారీ విజయాలతో టోర్నమెంట్‌ను ప్రారంభించడంతో, భారత్-పాక్ మ్యాచ్‌పై అంచనాలు మరింత పెరిగాయి.

మరిన్ని క్రీడా వార్తల కోసం ఇక్కడ చూడండి