Video: వింటేజ్ డేస్ ని తిరిగి తెచ్చిన శ్రీలంక లెజెండ్! ఏకంగా 225 స్ట్రైక్ రేట్ తో క్లాస్ సెంచరీ..
IMLT20 2025లో శ్రీలంక క్రికెట్ లెజెండ్ కుమార్ సంగక్కర తన బ్యాటింగ్ ప్రతిభను మరోసారి ప్రదర్శించాడు. ఇంగ్లాండ్ మాస్టర్స్‌పై 47 బంతుల్లో 106* పరుగులతో అజేయ శతకం సాధించి, తన జట్టుకు అద్భుత విజయాన్ని అందించాడు. 19 ఫోర్లు, 1 సిక్స్‌తో అతని ఇన్నింగ్స్ మాస్టర్స్ లీగ్‌లో ఓ ప్రత్యేక గుర్తింపు తెచ్చుకుంది. ఈ విజయంతో శ్రీలంక మాస్టర్స్ సెమీఫైనల్‌కు అర్హత సాధించింది.
Narsimha |
Updated on: Mar 11, 2025 | 8:35 AM
ఇంటర్నేషనల్ మాస్టర్స్ లీగ్ T20 (IMLT20) 2025లో శ్రీలంక క్రికెట్ దిగ్గజం కుమార్ సంగక్కర తన అద్భుతమైన బ్యాటింగ్‌తో క్రికెట్ అభిమానులకు పాత జ్ఞాపకాలను మళ్లీ తెచ్చాడు. ఇంగ్లాండ్ మాస్టర్స్ జట్టుపై అద్భుతమైన సెంచరీ బాది, తానే ఒంటరి పోరాటం చేసి తన జట్టుకు ఘన విజయాన్ని అందించాడు. రాయ్‌పూర్‌లోని షహీద్ వీర్ నారాయణ్ సింగ్ స్టేడియంలో జరిగిన ఈ మ్యాచ్‌లో సంగక్కర కేవలం 47 బంతుల్లోనే 106* పరుగులు చేసి తన క్లాస్‌ను మరోసారి నిరూపించుకున్నాడు.
నాలుగు సీజన్ల పాటు రాజస్థాన్ రాయల్స్ ప్రధాన కోచ్‌గా పనిచేసిన సంగక్కర, IPL 2025లో రాజస్థాన్ రాయల్స్‌కు క్రికెట్ డైరెక్టర్‌గా వ్యవహరించనున్నాడు. అయితే ప్రస్తుతం జరుగుతున్న ఇంటర్నేషనల్ మాస్టర్స్ లీగ్ T20 (IMLT20) 2025లో శ్రీలంక మాస్టర్స్ తరపున బ్యాట్‌తో సునామీ సృష్టిస్తున్నాడు. ఈ మ్యాచ్‌లో ఇంగ్లాండ్ మాస్టర్స్ మొదట బ్యాటింగ్ చేసి 20 ఓవర్లలో ఐదు వికెట్ల నష్టానికి 146 పరుగులు చేసింది. ఫిల్ మస్టర్డ్ 39 బంతుల్లో 50 పరుగులు చేయగా, శ్రీలంక బౌలర్లు క్రమశిక్షణతో బౌలింగ్ చేశారు.
147 పరుగుల లక్ష్యంతో బరిలోకి దిగిన శ్రీలంక మాస్టర్స్ జట్టు సంగక్కర బ్యాటింగ్ ధాటికి మ్యాచ్‌ను ఒకపక్కా చేసుకుంది. మొదటి నుంచి దూకుడుగా ఆడిన సంగక్కర, ఇంగ్లీష్ మాస్టర్స్ బౌలర్లను చిత్తు చేసి మ్యాచ్‌ను ఏకపక్షంగా మార్చేశాడు. ఓపెనర్ రోమేష్ కలువితరాన 18 బంతుల్లో 16 పరుగులు చేసి ఔటైనప్పటికీ, సంగక్కర మాత్రం ఆగలేదు.
ఆట 10వ ఓవరుకు చేరుకునే సరికి, సంగక్కర ఇప్పటికే 86 పరుగులు సాధించాడు. 13వ ఓవర్లో మాంటీ పనేసర్ బౌలింగ్‌లో మూడో బంతికి సింగిల్ తీసుకుని తన శతకాన్ని పూర్తి చేసుకున్నాడు. సెంచరీ తర్వాత కూడా అతని దూకుడు తగ్గలేదు. వెంటనే మరో బంతికి భారీ సిక్స్ బాది, తన జట్టుకు విజయాన్ని అందించాడు.
సంగక్కర తన ఇన్నింగ్స్‌ను 47 బంతుల్లో 106* పరుగులతో, 19 బౌండరీలు, 1 సిక్స్‌తో ముగించాడు. అతని స్ట్రైక్ రేట్ 225.53 ఉండటం విశేషం. అసెల గుణరత్నే కూడా 12 బంతుల్లో 22* పరుగులు చేసి అతనికి సహకరించాడు. ఈ విజయంతో శ్రీలంక మాస్టర్స్ జట్టు కేవలం 12.5 ఓవర్లలోనే లక్ష్యాన్ని ఛేదించింది.
ఈ విజయంతో, శ్రీలంక మాస్టర్స్ 5 మ్యాచ్‌ల్లో 4 విజయాలతో 8 పాయింట్లు సాధించి సెమీఫైనల్‌కు అర్హత సాధించింది. మరోవైపు, ఇంగ్లాండ్ మాస్టర్స్ జట్టు 4 మ్యాచ్‌ల్లో 4 ఓటములతో లీగ్ నుంచి నిష్క్రమించింది. అయితే, మార్చి 12న ఆస్ట్రేలియన్ మాస్టర్స్‌తో ఒక చివరి లీగ్ మ్యాచ్ ఆడాల్సి ఉంది. ఇక శ్రీలంక మాస్టర్స్ సెమీఫైనల్‌లో ఏ జట్టుతో తలపడనుందో త్వరలో తేలనుంది.
ఈ విజయంతో సంగక్కర మరోసారి తన క్లాస్‌ను నిరూపించాడు. లెజెండ్స్ క్రికెట్ లీగ్‌లోనూ ఇంతటి అద్భుత ప్రదర్శన ఇవ్వగలగడం ఆయన గొప్పతనానికి నిదర్శనం!
𝗧𝗵𝗲 𝗔𝗿𝘁 𝗼𝗳 𝗕𝗮𝘁𝘁𝗶𝗻𝗴, 𝗣𝗮𝗶𝗻𝘁𝗲𝗱 𝗕𝘆 𝗦𝗮𝗻𝗴𝗮! 🤌🎨
Every shot, a 𝑴𝒂𝒔𝒕𝒆𝒓𝒑𝒊𝒆𝒄𝒆. Every frame, pure 𝑬𝒍𝒆𝒈𝒂𝒏𝒄𝒆! 💙#IMLT20 #TheBaapsOfCricket #IMLonJioHotstar #IMLonCineplex pic.twitter.com/cAospAFSaK
— INTERNATIONAL MASTERS LEAGUE (@imlt20official) March 10, 2025
మరిన్ని క్రీడా వార్తల కోసం ఇక్కడ క్లిక్ చేయండి..
