Gabba stadium demolition: క్రికెట్ ఫ్యాన్స్ కి గుండె పగిలే బ్యాడ్ న్యూస్! నేలకొరగనున్న ఫేమస్ ఆస్ట్రేలియన్ స్టేడియం!

ఆస్ట్రేలియాలోని అత్యంత ప్రఖ్యాత క్రికెట్ మైదానాలలో ఒకటైన బ్రిస్బేన్ గబ్బా స్టేడియం ఇక చరిత్రలో నిలిచిపోయింది. 2032 ఒలింపిక్ గేమ్స్ తర్వాత దీనిని పూర్తిగా కూల్చివేయాలని క్వీన్స్‌ల్యాండ్ ప్రభుత్వం అధికారికంగా ప్రకటించింది. ఈ నిర్ణయం క్రికెట్ అభిమానులను, విశ్లేషకులను ఆశ్చర్యపరచింది. గబ్బా, దశాబ్దాలుగా ఆస్ట్రేలియా క్రికెట్ కోటగా నిలిచి, ఎన్నో చిరస్మరణీయ విజయాలకు వేదికైంది. అయితే, స్టేడియం వయసు కారణంగా పునర్నిర్మాణ ఖర్చులు భారీగా ఉండటంతో కొత్త స్టేడియం నిర్మించే దిశగా ప్రభుత్వం ముందుకు వెళ్లింది.

2032 ఒలింపిక్స్‌కు ఆతిథ్యం ఇవ్వనున్న క్వీన్స్‌ల్యాండ్ ప్రభుత్వం, ఈ ప్రతిష్టాత్మక గేమ్స్ కోసం కొత్తగా ఒక ఆధునిక మైదానాన్ని నిర్మించాలని భావిస్తోంది. ఈ క్రమంలోనే గబ్బాను పూర్తిగా కూల్చివేసి, దాని స్థానంలో విక్టోరియా పార్క్‌లో 63,000 మంది ప్రేక్షకుల సామర్థ్యం కలిగిన ఒక ఆధునిక స్టేడియం నిర్మించాలని నిర్ణయించారు.

క్రికెట్ ఆస్ట్రేలియా (CA), క్వీన్స్‌ల్యాండ్ ప్రభుత్వం గబ్బా మైదానాన్ని కొనసాగించడం చాలా ఖర్చుతో కూడుకున్నదని, మౌలిక సదుపాయాలు పాతబడిపోయాయని గుర్తించాయి. మైదానం పునరుద్ధరణకు పెట్టే ఖర్చుతో కొత్త మైదానం నిర్మించడం ఉత్తమ ఎంపికగా భావించారు.

2032 ఒలింపిక్స్ కోసం కొత్తగా నిర్మించే విక్టోరియా పార్క్ స్టేడియం ప్రారంభ, ముగింపు వేడుకలకు ప్రధాన వేదికగా నిలవనుంది. అంతేకాదు, ఈ స్టేడియం ఆస్ట్రేలియాలోనే అత్యంత ఆధునిక మైదానాలలో ఒకటిగా రూపొందనుంది.

అయితే, గబ్బా స్టేడియం పూర్తిగా మూతపడే వరకు ఇక్కడ కొన్ని ప్రధాన ఈవెంట్లు నిర్వహించనున్నారు. ముఖ్యంగా, 2025 యాషెస్ సిరీస్‌లో ఇంగ్లాండ్‌తో జరగబోయే రెండో టెస్ట్ మ్యాచ్, అలాగే 2032 ఒలింపిక్స్‌లో కొన్ని పోటీలు, బంగారు పతక మ్యాచ్‌లు, వేసవి కాలంలో జరిగే కొన్ని వైట్ బాల్ క్రికెట్ మ్యాచ్‌లు ఇక్కడే జరుగుతాయి.

అయితే, రాబోయే ఏడు సంవత్సరాల కాలంలో గబ్బాకు కేవలం ఒకే ఒక టెస్ట్ మ్యాచ్‌ను ఇవ్వడం ఖాయమైంది. పరిస్థితులను బట్టి మరికొన్ని మ్యాచ్‌లు ఇక్కడ నిర్వహించే అవకాశమున్నప్పటికీ, 2032 ఒలింపిక్స్ ముగిసిన తర్వాత గబ్బా చరిత్రలో నిలిచిపోయే అవకాశం ఉంది.

గబ్బా కూల్చివేత, కొత్త స్టేడియం నిర్మాణానికి AU$2.7 బిలియన్లను కేటాయించారు. అయితే, ఈ భారీ ఖర్చును ప్రజలు వ్యతిరేకిస్తున్నారు. ప్రజా వ్యతిరేకత నేపథ్యంలో క్వీన్స్‌ల్యాండ్ ప్రభుత్వం ముందుగా ప్రకటించిన ప్రణాళికను సవరించింది.

ప్రారంభంలో ప్రభుత్వం AU$600 మిలియన్‌తో పునరుద్ధరణ చేసే యోచనలో ఉండగా, ఆ తర్వాత దీనిని పూర్తిగా రద్దు చేసి కొత్త విక్టోరియా పార్క్ స్టేడియం ప్రాజెక్ట్‌ను ఆమోదించింది. ప్రస్తుతం 2029 నాటికి టాస్మానియాలో మరో హోబర్ట్ స్టేడియం నిర్మాణం కూడా ప్రారంభమయ్యే అవకాశం ఉంది.

మరిన్ని క్రీడా వార్తల కోసం ఇక్కడ క్లిక్ చేయండి..