WTC 2025 Final: ఆస్ట్రేలియాపై చారిత్రాత్మక ప్రదర్శన.. క్రికెట్ పుట్టినింట్లో రబాడ అరుదైన రికార్డ్..!

లార్డ్స్ మైదానంలో జరుగుతున్న ప్రతిష్టాత్మక వరల్డ్ టెస్ట్ ఛాంపియన్‌షిప్ (WTC) ఫైనల్ 2025లో దక్షిణాఫ్రికా పేస్ సంచలనం కగిసో రబాడ చరిత్ర సృష్టించాడు. ఆస్ట్రేలియాపై తన అద్భుతమైన బౌలింగ్‌తో క్రికెట్ ప్రపంచాన్ని ఆకట్టుకున్న రబాడ, పలు రికార్డులను తన పేరిట లిఖించుకున్నాడు. ఈ ఫైనల్‌లో అతని ప్రదర్శన కేవలం దక్షిణాఫ్రికాకు కీలక మలుపు మాత్రమే కాదు, అతని అంతర్జాతీయ కెరీర్‌లో ఒక మైలురాయిగా నిలిచింది.

లార్డ్స్ హానర్స్ బోర్డుపై డబుల్ ధమాకా..!

లార్డ్స్ క్రికెట్ గ్రౌండ్‌లో సెంచరీ సాధించిన లేదా ఐదు వికెట్ల హాల్ తీసిన ఆటగాళ్ళ పేర్లు ప్రఖ్యాత హానర్స్ బోర్డుపై బంగారు అక్షరాలతో చెక్కబడతాయి. ఇది ప్రతి క్రికెటర్ కల. కగిసో రబాడ ఈWTC ఫైనల్‌లో ఆస్ట్రేలియాపై మొదటి ఇన్నింగ్స్‌లో 5 వికెట్ల (5/51) అద్భుతమైన ప్రదర్శనతో ‘హోమ్’ డ్రెస్సింగ్ రూమ్ హానర్స్ బోర్డుపై తన పేరును నమోదు చేసుకున్నాడు. అంతకుముందు 2022లో ఇంగ్లండ్‌పై 5 వికెట్ల (5/52) హాల్ తీసి ‘అవే’ డ్రెస్సింగ్ రూమ్ బోర్డుపై చోటు సంపాదించుకున్నాడు.

దీంతో, లార్డ్స్ 141 సంవత్సరాల టెస్ట్ చరిత్రలో ‘హోమ్’, ‘అవే’ డ్రెస్సింగ్ రూమ్ హానర్స్ బోర్డులు రెండింటిలోనూ తన పేరును నమోదు చేసుకున్న రెండవ ఆటగాడిగా కగిసో రబాడ చరిత్ర సృష్టించాడు. వెస్టిండీస్ లెజెండ్ గోర్డన్ గ్రీనిడ్జ్ మాత్రమే ఈ అరుదైన ఘనతను గతంలో సాధించాడు. గ్రీనిడ్జ్ బ్యాటింగ్‌తో ఈ ఫీట్‌ను సాధించగా, రబాడ ఒక బౌలర్‌గా ఈ ఘనతను సాధించడం విశేషం.

ఇతర కీలక రికార్డులు..

రబాడ ఈ అద్భుతమైన ప్రదర్శనతో ఇతర కీలక రికార్డులు కూడా నమోదయ్యాయి:

• WTC ఫైనల్‌లో అత్యధిక వికెట్లు: ఈ WTC ఫైనల్‌లో మొత్తం 9 వికెట్లు (మొదటి ఇన్నింగ్స్‌లో 5, రెండవ ఇన్నింగ్స్‌లో 4) తీసిన రబాడ, ఒకే WTC ఫైనల్‌లో అత్యధిక వికెట్లు తీసిన బౌలర్‌గా నిలిచాడు. 2021 ఫైనల్‌లో కైల్ జేమీసన్, ప్రస్తుత ఫైనల్‌లో ఆస్ట్రేలియా కెప్టెన్ ప్యాట్ కమిన్స్ సాధించిన 6 వికెట్ల రికార్డులను రబాడ బద్దలు కొట్టాడు.
• దక్షిణాఫ్రికా తరపున టాప్ 5 వికెట్ టేకర్: ఈ మ్యాచ్‌లో తన ఐదు వికెట్ల హాల్‌తో, రబాడ జాక్వెస్ కల్లిస్‌ను అధిగమించి దక్షిణాఫ్రికా తరఫున అన్ని ఫార్మాట్లలో ఐదో అత్యధిక వికెట్లు తీసిన బౌలర్‌గా నిలిచాడు.
• ఆస్ట్రేలియాపై అత్యుత్తమ స్ట్రైక్ రేట్: ఆస్ట్రేలియాపై టెస్ట్ క్రికెట్‌లో 50 లేదా అంతకంటే ఎక్కువ వికెట్లు తీసిన బౌలర్‌లలో రబాడ అత్యుత్తమ స్ట్రైక్ రేట్ (38.0) సాధించాడు. ఈ విషయంలో అతను భారత పేసర్ జస్ప్రీత్ బుమ్రా (39.9)ను అధిగమించాడు.
• లార్డ్స్‌లో ఐదు వికెట్ల హాల్స్: రబాడ లార్డ్స్‌లో రెండుసార్లు ఐదు వికెట్ల హాల్ తీసిన మూడవ దక్షిణాఫ్రికా బౌలర్‌గా నిలిచాడు. అలన్ డోనాల్డ్, మఖయ ఎన్తిని మాత్రమే గతంలో ఈ ఘనత సాధించారు.

డ్రగ్ బ్యాన్ తర్వాత తిరిగి మైదానంలోకి అడుగుపెట్టిన రబాడ, తన ప్రదర్శనతో విమర్శకులకు సమాధానం చెప్పాడు. తన కెరీర్‌లో ఎదురైన సవాళ్లను అధిగమించి, ఈ కీలకమైన ఫైనల్‌లో ఇంతటి అద్భుతమైన ప్రదర్శన కనబరచడం అతని అంకితభావానికి, పట్టుదలకు నిదర్శనం. రబాడ ఈ చారిత్రాత్మక ప్రదర్శన దక్షిణాఫ్రికాకు WTC టైటిల్ గెలుచుకునే అవకాశాలను గణనీయంగా పెంచింది.

5 Wickets In the 1st Innings ✅🆚🇦🇺 4 wickets in the 2nd innings ✅🆚🇦🇺

KAGISO RABADA in world Test Championship final vs Australia #KagisoRabada #WTCFinal #JoshHazlewood #SAvsENG #cricket #MitchellStarc #WTC2025 pic.twitter.com/F1O808IpkT

— @sportaddict (@rkmgr1998) June 13, 2025