మరీ ఇంత వైలెంట్‌గా ఉన్నారేంట్రా.. ఛాయ్ పెట్టలేదని భార్య గొంతు కోసి చంపిన భర్త!

మధ్యప్రదేశ్‌లో జరిగిన దారుణం వెలుగులోకి వచ్చింది. నర్సింగ్‌పూర్‌లో ఒక వ్యక్తి భార్య టీ పెట్టడానికి నిరాకరించిందని అత్యంత పాశవికంగా ప్రవర్తించాడు. ఆమె పెట్టేందుకు నిరాకరించడంతో కోపంతో రగిలిపోయిన భర్త ఆమె గొంతు కోసి చంపేశాడు. ఈ సంఘటన స్థానికంగా తీవ్ర కలకలం సృష్టించింది. అలస్యంగా వెలుగులోకి వచ్చిన ఈ ఘటనపై పోలీసులు కేసు నమోదు చేసుకుని దర్యాప్తు చేపట్టారు.

నర్సింగ్‌పూర్ నగరంలోని బజరంగ్ వార్డ్‌లో లతా సోని గొంతు కోసిన ఆమె భర్త మనోజ్ సోని దారుణంగా హతమార్చాడు. ఆమె ఇంటి పై అంతస్తు గదిలో ఆమె మృతదేహం లభించింది. ఈ సంఘటన గురించి సమాచారం అందిన వెంటనే, కొత్వాలి పోలీస్ స్టేషన్ హత్య కేసు నమోదు చేసి దర్యాప్తు ప్రారంభించింది.

ఈ సంఘటన జరిగినప్పటి నుండి భర్త కనిపించకుండా పోయాడు. ఈ సంఘటనపై దర్యాప్తు చేయడానికి, పోలీసులు ఒక ప్రత్యేక బృందాన్ని ఏర్పాటు చేశారు. నగరంలోని రైల్వే స్టేషన్, నర్మదా ఘాట్‌లు, పరిసర ప్రాంతాలలో నిరంతర సోదాలు నిర్వహించి, సిసిటివి ఫుటేజ్‌లను పరిశీలించారు. ఇంతలో, మృతురాలి భర్త మనోజ్ సోని నగరం చుట్టూ కనిపించాడని ఒక ఇన్ఫార్మర్ సమాచారం అందించాడు. సమాచారాన్ని నిర్ధారించిన తర్వాత, పోలీసులు నర్సింగ్‌పూర్-కరేలి రోడ్డులోని సిద్ధ బాబా ఆలయం వెనుక ఉన్న పొలంలో నిందితుడిని అరెస్టు చేశారు. విచారణలో, నిందితుడు మనోజ్ సోని తన నేరాన్ని అంగీకరించాడు.

మనోజ్ భార్య తనను పని చేయకుండా తిరుగుతున్నావంటూ నిత్యం వేధించేదని, దీని కారణంగా ఇద్దరి మధ్య తరచుగా వివాదాలు జరిగేవని చెప్పాడు. సంఘటన జరిగిన రాత్రి, తన భార్య టీ పెట్టడానికి నిరాకరించడంతో కోపంతో రగిలిపోయాడు. ఆమె నిద్రిస్తున్నప్పుడు ఆమె మెడపై కత్తితో పొడిచి చంపాడు. నిందితుడి సమాచారం మేరకు, హత్యకు ఉపయోగించిన కత్తిని, నేరం జరిగిన సమయంలో అతను ధరించిన దుస్తులను పోలీసులు స్వాధీనం చేసుకున్నారు. పోలీసులు తెలిపిన వివరాల ప్రకారం, హత్య జరిగిన సమయంలో ఇంట్లో లత ఒక్కరే ఉన్నారని, ఆమె భర్త తప్ప మిగతా వారు ఎవరూ లేరని తెలుస్తోంది. ఆమె కుమారుడు అహ్మదాబాద్‌లో పనిచేస్తున్నాడు. ప్రస్తుతం ఈ సంఘటనకు సంబంధించిన అన్ని కోణాల్లో పోలీసులు దర్యాప్తు చేస్తున్నారు.

మరిన్ని జాతీయ వార్తల కోసం ఇక్కడ క్లిక్ చేయండి..